by Suryaa Desk | Sat, Jan 10, 2026, 11:32 PM

యాషెస్‌ సిరీస్‌ 2025-26లో ఐదో టెస్టులో ఇంగ్లాండ్‌పై ఆస్ట్రేలియా 5 వికెట్ల తేడాతో విజయం సాధించి.. 4-1 తేడాతో ఆసీస్‌ సిరీస్‌ నెగ్గిన విషయం తెలిసిందే. దీంతో సిరీస్‌ను ఎలాగైనా నెగ్గాలనీ గంపెడాశలతో ఆస్ట్రేలియా పర్యటనకు వచ్చిన ఇంగ్లండ్‌.. ఘోర ఓటమిపాలు కావడంపై విమర్శలు వెల్లువెత్తున్నాయి. అయితే అగ్నికి ఆజ్యం పోసినట్టు.. ఈ విమర్శలకు తోడు, ఈ సిరీస్‌లో ఇంగ్లీష్ ప్లేయర్లు ఫుల్లుగా మద్యం తాగినట్లు వస్తున్న ఆరోపణలు ఇంగ్లండ్ జట్టు మెడకు చుట్టకున్నాయి. దీనిపై తాజాగా ఆ జట్టు కోచ్ బ్రెండన్ మెక్‌కల్లమ్ స్పందించాడు. నూసా వెకేషన్‌ను సమర్థించాడు.

"నిజం చెప్పాలంటే.. మా జట్టులో సగం మంది రెగ్యులర్ డ్రింకర్లు కాదు. క్రికెట్ అనేది చాలా ఒత్తిడితో కూడుకున్న గేమ్. ఒత్తిడిలో వారు రెండు బీర్లు తాగడం సాధారణం. ఇంతకుముందు తాగారు.. ఇకపై కూడా తాగుతారు. వీరే కాదు.. చాలా రంగాల్లో ఉన్నవారు కూడా ఇలా చేస్తారనేది నా అభిప్రాయం" బ్రెండన్ మెక్‌కల్లమ్ అన్నాడు. అంతేకాకుండా, తమ ప్లేయర్లు మద్యం తీసుకోవడాన్ని కూడా మెక్‌కల్లమ్ వెనుకేసుకొచ్చాడు. అందులో చాలా మంది రెగ్యులర్ డ్రింకర్లు కాదని చెప్పుకొచ్చాడు.

గబ్బా వేదికగా ఆస్ట్రేలియాతో రెండో టెస్ట్ తర్వాత ఇంగ్లండ్ ప్లేయర్లకు 9 రోజుల గ్యాప్ దొరికింది. ఇందులో 4 రోజుల పాటు వారు బ్రేక్ తీసుకున్నారు. మూడో టెస్ట్‌కు ఫ్రెష్‌గా రావాలని.. కోచ్ బ్రెండన్ మెక్కల్లమ్ సారథ్యంలో.. సమీపంలోని రిసార్ట్ టౌన్ అయిన నూసాలో ప్లేయర్లు నాలుగు రాత్రులు ఎంజాయ్ చేశారు. ఈ క్రమంలో ప్లేయర్లంతా ఫుల్లుగా మద్యం తాగారనే ఆరోపణలు వచ్చాయి. ఇక ఇంగ్లండ్ ఓపెనర్ బెన్ డకెట్ తాగిన మత్తులో.. ఇంటికి తిరిగి వెళ్లే దారి తెలియక ఇబ్బంది పడుతున్నట్లుగా ఉన్న ఒక వీడియో వైరల్ అయింది. దీంతో పరిస్థితి మరింత దిగజారింది. ఈ నేపథ్యంలో.. జట్టులో మద్యం సేవించడంపై వచ్చిన ఆరోపణలపై విచారణ జరుగుతుందని జట్టు మేనేజింగ్ డైరెక్టర్ రాబ్ కీ పేర్కొన్నారు.

ఇదే కాకుండా తాజాగా ముగిసిన యాషెస్ సిరీస్‌తో బ్రెండన్ మెక్‌కల్లమ్ కోచింగ్ కెరీర్‌పై కూడా నీలినీడలు కమ్ముకున్నాయి. అతడి బజ్‌బాల్ క్రికెట్‌పై కూడా విమర్శలు వచ్చాయి. ఈ నేపథ్యంలో ఇంగ్లాంగ్ కోచింగ్‌ సెటప్‌లో మార్పులు చేయాలని ఇంగ్లండ్ మాజీ క్రికెటర్ కెవిన్ పీటర్సన్ అన్నాడు. అంతేకాకుండా తమ మాజీ హెడ్ కోచ్.. ఆండీ ఫ్లోవర్‌ను మళ్లీ హెడ్ కోచ్‌గా నియమించాలని చెప్పాడు. అతడు మోడర్న్ క్రికెట్‌ను చాలా బాగా అర్థం చేసుకున్నాడని తెలిపాడు.