by Suryaa Desk | Sat, Jan 10, 2026, 11:33 PM

దిగ్గజ పారిశ్రామిక వేత్త రాధాకిషన్ దమానీ స్థాపించిన డీమార్ట్ అంటే తెలియని వారుండరని చెప్పొచ్చు. ప్రధాన నగరాల్లో ఎక్కువ సంఖ్యలో స్టోర్లను నిర్వహిస్తుంటుంది. తక్కువ ధర- ఎక్కువ అమ్మకాలు (లో కాస్ట్- హై వాల్యూమ్) అనే ఫార్ములాతో ఇది పని చేస్తుంది. ఇంకా చాలా వరకు అద్దెకు తీసుకోకుండా.. సొంత స్థలాల్లోనే భవనాల్ని నిర్మించడం వల్ల ఖర్చుల్ని తగ్గించుకొని.. వినియోగదారులకు ఇంకా తక్కువ ధరకే వస్తువుల్ని అందిస్తుంది. ఇక్కడ నిత్యావసర సరకుల నుంచి మొదలుపెడితే ఇంట్లోకి కావాల్సిన పాలు, పెరుగు, కూరగాయలు, దుస్తులు, ఫుట్‌వేర్, హోం అప్లియెన్సెస్, కిచెన్‌వేర్, పర్సనల్ కేర్ ప్రొడక్ట్స్ ఇలా అన్నీ ఒకే చోట మనకు అందుబాటులో ఉంటాయి. అందుకే ఇది సక్సెస్‌ఫుల్‌గా రన్ అవుతోంది. అవెన్యూ సూపర్‌మార్ట్స్ లిమిటెడ్ డీమార్ట్‌ లిమిటెడ్‌కు.. మాతృసంస్థగా ఉంది.

>> ఈ అవెన్యూ సూపర్‌మార్ట్స్ లిమిటెడ్ ఇప్పుడు ప్రస్తుత ఆర్థిక సంవత్సరం 2025-26 మూడో త్రైమాసికం (అక్టోబర్- డిసెంబర్) ఫలితాల్ని శనివారం రోజు ప్రకటించింది. ఇక్కడ ఏకీకృత ప్రాతిపదికన కంపెనీ నికర లాభం క్యూ3లో రూ. 855.92 కోట్లుగా నమోదైంది. దీనినే టాక్స్ తీసేసిన తర్వాత ప్రాఫిట్‌గా చెప్పొచ్చు. ఇది అంతకుముందు ఆర్థిక సంవత్సరం ఇదే సమయంతో పోలిస్తే 18.3 శాతం పెరిగింది. 2024-25 క్యూ3లో లాభం రూ. 723.72 కోట్లుగా వచ్చింది.

 రాశిఫలాలు 10 జనవరి 2026:ఈరోజు అమల యోగం వేళ మేషం, మిథునం సహా ఈ 5 రాశులకు శని దేవుని ప్రత్యేక ఆశీస్సులు..!

ఇక కంపెనీ కార్యకలాపాల ఆదాయం కూడా వార్షిక ప్రాతిపదికన 13.3 శాతంగా నమోదైంది. ఇది అంతకుముందు ఆర్థిక సంవత్సరం క్యూ3లో రూ. 15,972.55 కోట్లుగా ఉండగా.. ఇప్పుడు రూ. 18,100.88 కోట్లకు చేరుకుంది. ఎబిటా మార్జిన్ 7.6 శాతం నుంచి 8.1 శాతానికి పెరిగింది. ఇక 2025 డిసెంబరుతో ముగిసిన ఆర్థిక సంవత్సరం 9 నెలల కాలానికి ఆదాయం రూ. 51,137 కోట్లుగా ఉంది. అంతకుముందు ఇది కేవలం రూ. 44,486 కోట్లుగానే ఉంది. ఈ 9 నెలల సమయంలో నికర లాభం రూ. 2,157 కోట్ల నుంచి రూ. 2,313 కోట్లకు పెరిగింది.

డీమార్ట్ స్టోర్ల విషయానికి వస్తే సమీక్షా త్రైమాసికంలో 3 నెలల కాలంలో 10 కొత్త స్టోర్లను తెరిచింది. దీంతో 2025, డిసెంబర్ 31 నాటికి మొత్తం డీమార్ట్ స్టోర్ల సంఖ్య 442 కు చేరింది. డీమార్ట్ (అవెన్యూ సూపర్‌మార్ట్స్) షేర్ ధర విషయానికి వస్తే జనవరి 9న 0.45 శాతం లాభంతో రూ. 3,807 వద్ద ముగిసింది. కంపెనీ మార్కెట్ విలువ రూ. 2.48 లక్షల కోట్లుగా ఉంది. స్టాక్ 52 వారాల గరిష్ఠ ధర రూ. 4,949.50 గా ఉండగా.. కనిష్ఠ ధర రూ. 3,340 గా ఉంది.