by Suryaa Desk | Sat, Jan 24, 2026, 09:21 PM

అమెరికా అధ్యక్షుడు డొనాల్డ్ ట్రంప్ కెనడా పై తీవ్ర ఆగ్రహం వ్యక్తం చేశారు. గ్రీన్‌ల్యాండ్‌పై నిర్మించాలనుకున్న "గోల్డెన్ డోమ్" క్షిపణి రక్షణ ప్రాజెక్టును కెనడా తిరస్కరించడంపై ఆయన మండిపడ్డారు. కెనడా అమెరికాకు బదులుగా చైనాతో సన్నిహిత సంబంధాలు కోరుకుంటోందని, అలా చేస్తే చైనా వారిని ఏడాదిలోనే "మింగేస్తుందని" ట్రంప్ హెచ్చరించారు.

ట్రంప్ తన సోషల్ మీడియా ప్లాట్‌ఫామ్ "ట్రూత్ సోషల్" వేదికగా ఈ వ్యాఖ్యలు చేశారు. "గ్రీన్‌ల్యాండ్‌పై గోల్డెన్ డోమ్ నిర్మించడాన్ని కెనడా వ్యతిరేకిస్తోంది. వాస్తవానికి ఈ గోల్డెన్ డోమ్ కెనడాను కూడా రక్షిస్తుంది. కానీ దానికి బదులుగా వారు చైనాతో వ్యాపారం చేయడానికి మొగ్గు చూపుతున్నారు. అయితే చైనా వారిని ఏడాదిలోపే మింగేస్తుంది" అంటూ ఆయన పేర్కొన్నారు.

ఇటీవల కెనడా ప్రధానమంత్రి మార్క్ కార్నీ వరల్డ్ ఎకనామిక్ ఫోరమ్ వేదికగా చేసిన వ్యాఖ్యలతో ఈ వివాదం రాజుకుంది. బుధవారం డబ్ల్యూఈఎఫ్ 56వ వార్షిక సదస్సులో ట్రంప్ మాట్లాడుతూ.. అమెరికా నుంచి కెనడా పొందుతున్న ఉచిత సేవలకు గాను వారు తమ దేశం పట్ల కృతజ్ఞతతో ఉండాలని చెప్పారు. కానీ కెనడా ప్రధానమంత్రి ఆ స్థాయిలో కృతజ్ఞతతో లేరని ట్రంప్ అసహనం వ్యక్తం చేశారు. తాను ప్రతిపాదించిన "గోల్డెన్ డోమ్" క్షిపణి రక్షణ వ్యవస్థ కెనడాకు కూడా భద్రత కల్పిస్తుందని ఆయన నొక్కి చెప్పారు.

"మార్క్ మాట్లాడే ముందు.. అమెరికా వల్లే తన దేశం మనుగడ సాగిస్తుందనే విషయాన్ని గుర్తుంచుకోవాలి" అని ట్రంప్ సూచించారు. అమెరికా తన ఉత్తర పొరుగు దేశాన్ని రక్షించడంలో కీలకమైన వ్యూహాత్మక, భద్రతా పాత్ర పోషిస్తుందని ఆయన స్పష్టం చేశారు.

ఇరు దేశాల మధ్య వివాదానికి కారణమైన చైనా-కెనడా ఒప్పందం విషయానికి వస్తే.. జనవరి 17న కెనడా ప్రధాని మార్క్ కార్నీ చైనాతో కొత్త వాణిజ్య ఒప్పందాన్ని ప్రకటించారు. ఈ ఒప్పందం కెనడియన్ వ్యాపారాలకు, కార్మికులకు కొత్త మార్కెట్లను తెరుస్తుందని కార్నీ తెలిపారు. అయితే ఈ ఒప్పందం ట్రంప్‌కు తీవ్ర ఆగ్రహాన్ని కలిగించింది. చైనాతో కుదిరిన ఈ డీల్ వల్ల కెనడాకు సుమారు 7 బిలియన్ డాలర్ల మార్కెట్ అందుబాటులోకి రానుంది.

చైనా నుంచి వచ్చే ఎలక్ట్రిక్ వాహనాలపై కెనడా గతంలో విధిస్తున్న 100 శాతం పన్నును తగ్గించింది. దానికి బదులుగా కెనడా నుంచి ఎగుమతయ్యే కనోలా గింజలపై చైనా విధిస్తున్న పన్నును 84 శాతం నుంచి 15 శాతానికి తగ్గించింది. అమెరికాతో పోలిస్తే చైనా ఇప్పుడు మరింత నమ్మదగిన భాగస్వామిలా కనిపిస్తోందని కార్నీ ప్రకటించడం గమనార్హం.

దీనికి తోడు, గ్రీన్‌ల్యాండ్‌ విషయంలో అమెరికా చేస్తున్న ప్రయత్నాలను కెనడా ముందు నుంచి వ్యతిరేకిస్తోంది. అమెరికా విధిస్తున్న భారీ టారిఫ్‌ల నుంచి తప్పించుకోవడానికి కెనడా తన ఆర్థిక వ్యూహాన్ని మార్చుకుంది. అమెరికాపైనే పూర్తిగా ఆధారపడకుండా.. ప్రపంచంలో రెండో అతిపెద్ద ఆర్థిక వ్యవస్థ అయిన చైనాతో సంబంధాలను బలోపేతం చేసుకోవాలని కెనడా భావిస్తోంది.