by Suryaa Desk | Sun, Jan 25, 2026, 09:10 PM

వెనుజులా రాజధాని కరాకస్‌ నగరంపై భారీ పేలుళ్లు జరిపిన అమెరికా దళాలు.. అధ్యక్షుడు నికోలస్‌ మదురో, ఆయన భార్యను నిర్బంధించిన విషయం తెలిసిందే. ఈ సమయంలో తనకు ఎదురైన సవాళ్ల గురించి వెనుజులా తాత్కాలిక అధ్యక్షురాలు డెన్సీ రోడ్రిగ్జ్ మాట్లాడిన వీడియో లీక్‌ అయింది. దాడుల సందర్భంగా అమెరికా దళాలు తమను తీవ్రంగా హెచ్చరించినట్లు ఆ వీడియోలో రోడ్రిగ్జ్ తెలిపారు. ఈ క్రమంలో తమ డిమాండ్లు అంగీకరిస్తారా లేక చస్తారా అని అమెరికా దళాలు బెదిరించినట్లు చెప్పారు. అయితే అధికారం కోసం డెన్సీ రోడ్రిగ్జ్ అమెరికాతో రహస్య ఒప్పందం కుదుర్చుకుందని.. ఈ క్రమంలోనే యూఎస్ దళాలు వెనుజులా అధ్యక్షుడిని గద్దెదించాయని గార్డియన్ పత్రిక కథనం ప్రచురించిన నేపథ్యంలో ఈ వీడియో లీక్ కావడం గమనార్హం.

నికోలస్ మదురోను నిర్బంధించి అమెరికాకు తీసుకెళ్లిన తర్వాత అంతర్గత సమావేశం జరిగింది. ఆ సమావేశానికి సంబంధించిన వీడియో రికార్డింగ్ తాజాగా లీక్ అయ్యింది. అందులో రోడ్రిగ్జ్‌ మాట్లాడారు. అధికారాన్ని కాపాడుకోవడమే తన ప్రాధాన్యం అని డెన్సీ రోడ్రిగ్జ్ చెప్పినట్లుగా అందులో ఉంది. అధ్యక్షుడు నికోలస్ మదురో కిడ్నాప్‌ అయిన తర్వాతి నిమిషం నుంచి తమకు బెదిరింపులు మొదలయ్యాయని డెన్సీ అన్నారు.

కాగా, తమ డిమాండ్లపై స్పందించేందుకు తనతో పాటు అంతర్గత మంత్రి డియోస్టాడో కాబెల్లో, తన సోదరుడు, మంత్రి జార్జ్‌ రోడ్రిగ్జ్‌లకు.. అమెరికా దళాలు కేవలం 15 నిమిషాల సమయం మాత్రమే ఇచ్చినట్లు డెన్సీ వెల్లడించారు. మదురో ఆయన భార్యను కిడ్నాప్‌ చేయలేదని.. చంపేశాం అని యూఎస్ దళాలు తమతో చెప్పినట్లు డెన్సీ వెల్లడించారు. డిమాండ్లకు ఒప్పుకోకపోతే మీకు కూడా అదే గతి పడుతుందని హెచ్చరించినట్లు చెప్పారు. ఇలాంటి పరిస్థితుల్లో అధ్యక్ష బాధ్యతలు స్వీకరించాల్సి రావడం బాధాకరమని డెన్సీ రోడ్రిగ్జ్ లీక్ అయిన వీడియోలో పేర్కొన్నారు.

అమెరికాతో సీక్రెట్ డీల్!

వెనుజులాలో అధికార మార్పిడి కోసం డెన్సీ రోడ్రిగ్జ్‌ అమెరికాతో రహస్య డీల్‌ కుదుర్చుకున్నారనే ప్రచారం జరుగుతోంది. ఈ మేరకు గార్డియన్ పత్రిక ఓ కథనం ప్రచురించింది. 2025 నవంబరు నుంచే అమెరికా అధికారులతో ఆమె సంప్రదింపులు జరుపుతున్నట్లు పేర్కొంది. మదురో వెళ్లాల్సిన అవసరం వచ్చిందని.. ఆయన్ను తొలగించి అధికారం చేపట్టేందుకు సిద్ధంగా ఉన్నానని రోడ్రిగ్జ్‌ చెప్పినట్లు వెల్లడించింది.

దాదాపు ఇదే సమయంలో అధికారం నుంచి దిగిపోవాలని అమెరికా అధ్యక్షుడు డొనాల్డ్ ట్రంప్.. వెనుజులా అధ్యక్షుడు నికోలస్ మదురోను కోరారు. అయితే దీనికి మదురో ఒప్పుకోలేదు. ఈ క్రమంలోనే అమెరికా దాడులు చేసి ఆయన్ను నిర్బంధించడం.. డెన్సీ రోడ్రిగ్స్ తాత్కాలిక అధ్యక్షురాలిగా బాధ్యతలు చేపట్టడం చకచకా జరిగిపోయింది. దీంతో అమెరికాతో డెన్సీ సీక్రెట్ డీల్ చేసుకున్నట్లు జోరుగా ప్రచారం జరుగుతోంది.