by Suryaa Desk | Mon, Jan 26, 2026, 08:17 PM

జనవరి 3న వెనుజులాపై మెరుపు దాడిచేసి, ఆ దేశ అధ్యక్షుడు నికోలస్ మదురోను అదుపులోకి తీసుకోడానికి ‘ది డిస్కంబులేటర్ ’ అనే రహస్య ఆయుధం ఉపయోగించామని, దాని సాయంతో ఆ దేశ సైనిక పరికరాలను స్తంభింపజేశామని అమెరికా అధ్యక్షుడు డొనాల్డ్ ట్రంప్ తెలిపారు. ఈ ఆయుధం గురించి తాను మాట్లాడటానికి అనుమతి లేదని, కానీ, ఇది వెనుజులా పరికరాలను ‘పనిచేయకుండా చేసింది’ అని ఆయన చెప్పారు. అంతేకాదు, రష్యా, చైనాలు రాకెట్లు ప్రయోగించడానికి ప్రయత్నించినా, అవి పనిచేయలేదని ట్రంప్ పేర్కొన్నారు. న్యూయార్క్ పోస్ట్‌కు ఇచ్చిన ఇంటర్వ్యూలో ట్రంప్ ఈ వ్యాఖ్యలు చేశారు. మదురో దంపతులు అరెస్ట్‌కు ముందు తనకు ఫోన్ చేసి, 15 నిమిషాలే టైమ్ ఇచ్చారని వెనుజులా తాత్కాలిక అధ్యక్షురాలు డెన్సీ రోడ్రిగ్జ్ మాట్లాడిన వీడియో బయటకు వచ్చిన కొద్ది గంటల్లోనే ట్రంప్ వ్యాఖ్యలు చోటుచేసుకోవడం గమనార్హం.

డ్రగ్స్ మాఫియాలపై సైనిక దాడులు కొనసాగిస్తామని, మెక్సికోతో సహా ఉత్తర అమెరికా వరకు విస్తరిస్తామని కూడా ఆయన మరోసారి హెచ్చరించారు. ‘వారి మార్గాలు మాకు తెలుసు. వారి ఇళ్లు తెలుసు. మేము వారిని కొడతాం’ అని అమెరికా అధ్యక్షుడు డొనాల్డ్ ట్రంప్ ఉద్ఘాటించారు. ఈ దాడులు ఎక్కడైనా జరగవచ్చని ఆయన సూచించారు. వెనుజులా అధ్యక్షుడు మదురోను డ్రగ్స్ అక్రమ వ్యాపార సామ్రాజ్యానికి అధినేతగా ట్రంప్ ఆరోపించిన సంగతి తెలిసిందే. ఇదిలా ఉండగా, శుక్రవారం తూర్పు పసిఫిక్ మహాసముద్రంలో ఒక డ్రగ్స్ రవాణా పడవపై అమెరికా దాడి చేసింది. సెప్టెంబర్ నుంచి ఇలాంటివి కనీసం 36 దాడులు జరిగాయి, వీటిలో 117 మందికి పైగా మరణించారు.

వెనుజులాకు చెందిన ఏడు చమురు ట్యాంకర్లను స్వాధీనం చేసుకున్నామని, వాటిలోని చమురును అన్‌లోడ్ చేశామని, అయితే ఆ ఓడలు ఎక్కడున్నాయో చెప్పలేమని ట్రంప్ తెలిపారు. వెనుజులా ప్రతిపక్ష నాయకురాలు కొరినా మచాడో తనకు ఇచ్చిన నోబెల్ శాంతి బహుమతిని ఎక్కడ ఉంచాలో ఆలోచిస్తున్నారని ట్రంప్ చెప్పారు. ఆర్కిటిక్ భద్రతా ఒప్పందం అమెరికాకు సైనిక స్థావరాలు ఉండే ప్రాంతాలపై అధికారాన్ని కల్పిస్తుందని కూడా ఆయన తెలిపారు. అయితే, డెన్మార్క్, గ్రీన్‌లాండ్ నాయకులు ద్వీపం సార్వభౌమాధికారంపై రాజీ పడబోమని స్పష్టం చేశారు. సూపర్ బౌల్‌కు వెళ్లబోనని, అక్కడ ప్రదర్శనకు ఎంచుకున్న బ్యాడ్ బన్నీ, గ్రీన్ డేల ఎంపికను ట్రంప్ విమర్శించారు.