by Suryaa Desk | Thu, Jan 29, 2026, 11:13 PM

టీ20 వరల్డ్ కప్ 2026 విషయంలో పాకిస్తాన్ క్రికెట్ బోర్డు (పీసీబీ) నిర్ణయం ఇంకా స్పష్టంగా రాకపోవడంతో, ఈ అంశంపై ఐస్లాండ్ క్రికెట్ సరదాగా చేసిన కామెంట్ ఇప్పుడు సోషల్ మీడియాలో వైరల్ అవుతోంది. పాకిస్తాన్ టోర్నీ నుంచి తప్పుకుంటే తమ జట్టు రెడీగా ఉందంటూ ఐస్లాండ్ క్రికెట్ చేసిన పోస్ట్ క్రికెట్ అభిమానులను నవ్విస్తోంది.

  ఫిబ్రవరి 7 నుంచి టీ20 వరల్డ్ కప్ ప్రారంభం కానుండగా, పాకిస్తాన్ పాల్గొనడంపై ఇంకా సందిగ్ధత కొనసాగుతోంది. పీసీబీ ఛైర్మన్ మొహ్సిన్ నక్వీ ఇప్పటికే ప్రధాని షెహబాజ్ షరీఫ్‌తో భేటీ అయ్యారు. ఈ సమావేశం తర్వాత శుక్రవారం లేదా వచ్చే సోమవారం తుది నిర్ణయం వెలువడే అవకాశం ఉందని సమాచారం.

ఇదే సమయంలో ఐస్లాండ్ క్రికెట్ తమ అధికారిక ఎక్స్ ఖాతాలో సరదా పోస్ట్ చేసింది. “పాకిస్తాన్ త్వరగా నిర్ణయం తీసుకోవాలి. వాళ్లు ఫిబ్రవరి 2న టోర్నీ నుంచి తప్పుకుంటే, మేము వెంటనే బయల్దేరేందుకు సిద్ధంగా ఉన్నాం. కానీ కొలంబోకి సమయానికి చేరుకోవడం పెద్ద లాజిస్టిక్స్ సమస్యగా ఉంది. మా ఓపెనింగ్ బ్యాట్స్‌మన్‌కు నిద్రే రాదు” అంటూ హాస్యంగా రాసింది.

దీంతో పాటు ఐస్లాండ్ నుంచి కొలంబో వరకు ప్రయాణ వివరాల స్క్రీన్‌షాట్‌ను కూడా షేర్ చేసి, చివరి నిమిషంలో జట్టును పిలిస్తే వచ్చే సమస్యలను వ్యంగ్యంగా చూపించింది. ఈ పోస్ట్‌కు అభిమానుల నుంచి భారీ స్పందన వస్తోంది. ఈ వ్యవహారానికి నేపథ్యం బంగ్లాదేశ్ తీసుకున్న నిర్ణయం. భద్రతా కారణాలను చూపుతూ భారత్‌లో టీ20 వరల్డ్ కప్ మ్యాచ్‌లు ఆడలేమని బంగ్లాదేశ్ స్పష్టం చేయడంతో, ఐసీసీ వారిని టోర్నీ నుంచి తొలగించి స్కాట్లాండ్‌ను జట్టులోకి తీసుకుంది. ఈ నిర్ణయానికి వ్యతిరేకంగా పాకిస్తాన్ అసంతృప్తి వ్యక్తం చేస్తూ, బహిష్కరణ అంశాన్ని పరిశీలిస్తున్నట్టు ప్రకటించింది.

అయితే, టోర్నీకి ఇంకా కొన్ని రోజులు మాత్రమే ఉండటంతో పాకిస్తాన్ తుది నిర్ణయం కోసం క్రికెట్ ప్రపంచం ఆసక్తిగా ఎదురుచూస్తోంది. ఇదిలా ఉండగా, పాకిస్తాన్ తమ టీ20 వరల్డ్ కప్ జట్టును ఇప్పటికే ప్రకటించింది. ఆ జట్టు, ఆస్ట్రేలియాతో ఆడబోయే సిరీస్ జట్టుతో దాదాపు ఒకేలా ఉండటం గమనార్హం. పాకిస్తాన్ నిర్ణయం ఏదైనా కావొచ్చు, కానీ ఐస్లాండ్ క్రికెట్ చేసిన ఈ సరదా ఆఫర్ మాత్రం వరల్డ్ కప్ ముందర అభిమానులకు మంచి వినోదాన్ని అందించింది.