by Suryaa Desk | Thu, Jan 29, 2026, 11:15 PM

టీమిండియా స్టార్ ఆల్‌రౌండర్ వాషింగ్టన్ సుందర్ ఫిట్‌నెస్‌పై ఇంకా స్పష్టత రాలేదు. టీ20 వరల్డ్ కప్ 2026కు ముందు అతని అందుబాటు సందేహంలోనే ఉండగా, ఫిబ్రవరి 4న బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో ఫిట్‌నెస్ టెస్ట్ నిర్వహించనున్నారు. జనవరి 11న న్యూజిలాండ్‌తో జరిగిన తొలి వన్డేలో వాషింగ్టన్ సుందర్ సైడ్ స్ట్రెయిన్‌కు గురయ్యాడు. అప్పట్లో గాయం తేలికపాటిదే అనుకున్నప్పటికీ, కోలుకోవడానికి ఊహించిన దానికంటే ఎక్కువ సమయం పడుతోంది. దీంతో వరల్డ్ కప్ తొలి మ్యాచ్‌కు ముందే అతను ఫిట్ అవుతాడా లేదా అన్న దానిపై సెలెక్టర్లు వేచి చూస్తున్నారు.

పండ్ల ఈగలు + బొద్దింకలు + దోమలు అన్నింటికీ కర్పూరం ఉంటే చాలు, ఇంట్లోకి వచ్చే పురుగులన్నీ మాయం, ఎలా వాడాలో తెలుసా?

టైమ్స్ ఆఫ్ ఇండియా కథనం ప్రకారం.. వాషింగ్టన్ ఫిట్‌నెస్‌పై అధికారిక మెడికల్ రిపోర్ట్ వచ్చే వరకు బ్యాకప్ ప్లాన్స్‌ను అమలు చేయకూడదని సెలక్షన్ కమిటీ నిర్ణయించింది. జనవరి 30 వరకు జట్టులో మార్పులు చేసుకునే అవకాశం ఉన్నప్పటికీ, టోర్నమెంట్ టెక్నికల్ కమిటీ ఆమోదిస్తే పోటీ మధ్యలో కూడా గాయపడిన ఆటగాడి స్థానంలో రీప్లేస్‌మెంట్‌ను తీసుకునే అవకాశం ఉంటుంది.

భారత జట్టు ఫిబ్రవరి 3న ముంబైలో తొలి ట్రైనింగ్ సెషన్‌కు చేరుకోనుంది. ఫిబ్రవరి 4న దక్షిణాఫ్రికాతో జరిగే వార్మప్ మ్యాచ్‌కు ముందు వాషింగ్టన్ ఫిట్‌నెస్ టెస్ట్ ఫలితం కీలకంగా మారనుంది. సుందర్ గాయం గురించి బీసీసీఐ అధికారికంగా వివరాలు వెల్లడించకపోయినా, వాషింగ్టన్‌కు వెన్నెముక దగ్గర, పక్క భాగంలో మసిల్ టియర్ ఉన్నట్లు వర్గాలు చెబుతున్నాయి. ఈ గాయం సహజంగా మానాల్సి ఉండటంతో అతన్ని ఇంకా రిటర్న్ టు ప్లే ప్రక్రియలోకి తీసుకురాలేదని బీసీసీఐ వర్గాలు తెలిపాయి. బుధవారం జరిగిన ప్రాక్టీస్‌లో వాషింగ్టన్ గట్టి డ్రిల్స్ చేయలేదని సమాచారం. అయితే తిలక్ వర్మ, రియాన్ పరాగ్ మాత్రం సిమ్యులేషన్ మ్యాచ్‌లో పాల్గొన్నారు.

వాషింగ్టన్ స్థానంలో తిలక్ వర్మను అవసరమైతే జట్టులోకి తీసుకునే అవకాశం ఉందని తెలుస్తోంది. ఇప్పటికే అక్షర్ పటేల్ ఈ సిరీస్‌లో ఒక్క మ్యాచ్ మాత్రమే ఆడినా, జట్టు కాంబినేషన్ బాగానే ఉందని టీమ్ మేనేజ్‌మెంట్ భావిస్తోంది. స్పిన్ ఆల్‌రౌండర్ లేకపోయినా సమతూకం బాగానే ఉన్నట్లు విశ్లేషిస్తున్నారు. రియాన్ పరాగ్‌ను వాషింగ్టన్‌కు ప్రత్యామ్నాయంగా పరిగణిస్తున్నారు. అయితే వాషింగ్టన్ సుందర్ టోర్నమెంట్ ఆఖరి దశలకు అయినా ఫిట్ అవుతాడన్న నమ్మకం ఉంటే, అతని కోసం జట్టు వేచి చూసే అవకాశముందని బోర్డు వర్గాలు సూచిస్తున్నాయి. అతని ఫిట్‌నెస్ టెస్ట్ ఫలితం వరల్డ్ కప్ ప్లాన్స్‌పై కీలక ప్రభావం చూపనుంది.