by Suryaa Desk | Fri, Jan 30, 2026, 04:09 PM

 తిరుమల లడ్డూ తయారీలో ప్రాణాలు తీసే రసాయనాలను వాడుతున్నారని TTD ఛైర్మన్ బీఆర్‌ నాయుడు తీవ్ర ఆరోపణలు చేశారు. గతంలో నివేదికలను తమకు అనుకూలంగా మార్చుకున్నారని, అప్పటి ఛైర్మన్ సుబ్బారెడ్డి కార్యాలయం నుంచి మెయిల్స్ వెళ్లాయని ఆయన పేర్కొన్నారు. కమిషన్ల కోసం భోలే బాబా డెయిరీకి కాంట్రాక్టులు ఇచ్చారని, ఒక ప్రైవేటు వ్యక్తి ఇన్ని కోట్ల లావాదేవీలు చేయడం అసాధ్యమని అన్నారు. గత ప్రభుత్వ హయాంలో శ్రీవారి లడ్డూల తయారీలో ప్రాణాలు తీసే రసాయనాలు వాడారని, కల్తీ నెయ్యితో 20 కోట్ల లడ్డూలు తయారు చేశారని తిరుమల తిరుపతి దేవస్థానం(తితిదే) ఛైర్మన్‌ బీఆర్‌ నాయుడు తెలిపారు. ‘‘సుబ్బారెడ్డి పీఏ చిన్నప్ప ఖాతాలోకి రూ.కోట్లు వచ్చాయి. ఆ ఖాతా నుంచి ఎక్కడికి వెళ్లాయో సీబీఐ వెల్లడించాలి. ఈ అక్రమాల వెనుక ఉన్నవారి పేర్లు బయటపెట్టాలని సీబీఐని కోరుతున్నాం. కూటమి ప్రభుత్వం రాకుంటే ఆ కల్తీ నెయ్యి ఇంకా కొనసాగేది. దుర్మార్గుల నుంచి తితిదేని మనమంతా కాపాడుకోవాలి’’అని బీఆర్‌ నాయుడు అన్నారు.