by Suryaa Desk | Sat, Jan 31, 2026, 07:26 PM

అనంతపురం జిల్లాలోని అంగన్వాడీ ఆయాలకు ప్రభుత్వం శుభవార్త వినిపించింది. జిల్లా మహిళా, శిశు సంక్షేమ శాఖలో చాలా ఏళ్ల తర్వాత అంగన్వాడీ ఆయాలకు ప్రమోషన్లు కల్పించారు. అంగన్వాడీ ఆయాలకు కార్యకర్తగా పదోన్నతులు కల్పించారు. ఐసీడీఎస్ పరిధిలో చాలా మంది అంగన్వాడీ ఆయాలుగా ఏళ్ల తరబడిగా పనిచేస్తూ వచ్చారు. అయితే వారికి మాత్రం ప్రమోషన్లు కల్పించలేదు. అయితే ప్రభుత్వం తాజాగా వారి సమస్యల పరిష్కారంమీద దృష్టి పెట్టింది. ఈ క్రమంలోనే మినీ అంగన్వాడీ కేంద్రాలను.. మెయిన్ అంగన్వాడీ కేంద్రాలుగా అప్‌గ్రేడ్ చేస్తోంది.

అనంతపురం జిల్లాలో ఈ ప్రక్రియ ఇటీవల పూర్తి అయ్యింది. అయితే మినీ అంగన్వాడీ కేంద్రాలను, మెయిన్ అంగన్వాడీ కేంద్రాలుగా అప్‌గ్రేడ్ చేయటంతో పాటుగా.. అందులో పనిచేసే అంగన్వాడీ ఆయాలకు.. అంగన్వాడీ కార్యకర్తగా ప్రమోషన్లు కల్పించారు. ఐసీడీఎస్ పీడీ అరుణకుమారి ఈ మేరకు ప్రమోషన్లకు సంబంధించిన ఉత్తర్వులు జారీ చేశారు. ప్రభుత్వం విడుదల చేసిన మార్గదర్శకాలకు అనుగుణంగా.. జిల్లా ఎంపిక కమిటీ ఆమోదం అనంతరం ఈ ఉత్తర్వులు జారీ చేశారు.

  మరోవైపు అనంతపురం జిల్లా పరిధిలో 11 ఐసీడీఎస్ ప్రాజెక్టుల పరిధిలో 2302 అంగన్వాడీ కేంద్రాలు ఉన్నాయి. అనంతపురం అర్బన్ మినహాయిస్తే మిగతా పది ప్రాజెక్టులలో 223 మినీ అంగన్వాడీ కేంద్రాలు ఉన్నాయి. ఈ 223 మినీ అంగన్వాడీ కేంద్రాలలో పదోతరగతి పాసై.. ప్రమోషన్లు అర్హులైన వారు 196 మంది ఉన్నారని అధికారులు వెల్లడించారు. వీరిలో 136 మందికి తాజాగా ప్రమోషన్లు కల్పించారు.

కళ్యాణదుర్గంలో 25, ఉరవకొండ 22, శింగనమలలో 20, అనంతపురం రూరల్ 16, కంబదూరు, తాడిపత్రిలో 11 చొప్పున, గుత్తి, రాయదుర్గంలో 10 మంది చొప్పున, నార్పలలో 9, కణేకల్లులో ఇద్దరు చొప్పున ప్రమోషన్లు కల్పించారు. అంగన్వాడీ ఆయా నుంచి అంగన్వాడీ కార్యకర్తగా ప్రమోషన్లు రావటంతో వీరి జీతాలు కూడా నెలకు రూ.7000 నుంచి రూ.11,500లకు పెరగనుంది. దీంతో ప్రమోషన్లు పొందిన అంగన్వాడీ ఆయాల కుటుంబాలు సంతోషం వ్యక్తం చేస్తున్నాయి. ఇన్నాళ్లకు తమకు ప్రమోషన్లు దక్కాయని అంగన్వాడీ ఆయాలు ప్రభుత్వానికి ధన్యవాదాలు తెలియజేశారు.