by Suryaa Desk | Sat, Jan 31, 2026, 08:21 PM

అమెరికా ప్రభుత్వం మళ్లీ షట్‌డౌన్ అయింది. కాంగ్రెస్‌లో బడ్జెట్ ఆమోదం పొందకపోవడంతో 2026లో అమెరికా మళ్లీ పాక్షిక షట్‌డౌన్‌లోకి వెళ్లింది. ఇమిగ్రేషన్ అధికారుల కాల్పుల ఘటనపై డెమోక్రాట్లు తీవ్ర నిరసన వ్యక్తం చేయడం వల్ల ఈ పరిస్థితి వచ్చింది. దాదాపు 75 శాతం అమెరికా ప్రభుత్వంలోని విభాగాలు ఈ షట్‌డౌన్ కారణంగా ప్రభావితం అవుతున్నప్పటికీ.. వచ్చే వారం నాటికి కొత్త ఒప్పందం ద్వారా నిధులు విడుదలయ్యే అవకాశాలు ఉన్నాయని ప్రభుత్వ వర్గాలు పేర్కొంటున్నాయి. గత నాలుగు నెలల కాలంలో అమెరికా ప్రభుత్వం ఇలా షట్‌డౌన్‌లోకి వెళ్లడం రెండోసారి కావడం ట్రంప్ పాలనపై తీవ్ర విమర్శలకు తావిస్తోంది.

2026 ఆర్థిక సంవత్సరానికి సంబంధించిన బడ్జెట్‌ను అమెరికా కాంగ్రెస్ గడువులోగా ఆమోదించకపోవడంతో.. శనివారం అర్ధరాత్రి నుంచి ప్రభుత్వం పాక్షిక షట్‌డౌన్‌లోకి ప్రవేశించింది. మినియాపొలిస్‌లో ఇమిగ్రేషన్ అధికారుల కాల్పుల్లో ఇద్దరు ఆందోళనకారులు చనిపోవడం డెమోక్రాట్లు తీవ్ర ఆగ్రహానికి గురయ్యారు. హోంలాండ్ సెక్యూరిటీ, ఐసీఈ విభాగాల్లో సంస్కరణలు తీసుకురాకపోతే.. బిల్లుకు ఓటు వేసేది లేదని డెమోక్రాట్లు తేల్చి చెప్పడంతో అమెరికా కాంగ్రెస్‌లో ప్రతిష్టంభన ఏర్పడింది. శాంతియుత నిరసనలు తెలిపే వారిని టార్గెట్ చేసుకోవడం వల్ల అమెరికన్ల సెక్యూరిటీ క్షీణిస్తోందని సెనెట్ సభ్యులు తీవ్ర విమర్శలు చేస్తున్నారు.

షట్‌డౌన్ ప్రభావం

అమెరికాలో మళ్లీ షట్‌డౌన్ రావడంతో.. ప్రభుత్వ కార్యకలాపాల్లో దాదాపు 75 శాతంపై ప్రభావం పడనుంది. ఎడ్యుకేషన్, హెల్త్, గృహనిర్మాణం, రక్షణ వంటి కీలక రంగాలు పాక్షికంగా ప్రభావితం కానున్నాయి. ఇప్పటికే విధించిన షట్‌డౌన్ మరింత పొడిగిస్తే వేలాది మంది అమెరికా ప్రభుత్వ ఉద్యోగులకు వేతనాలు లేకుండానే పని చేయాల్సిన పరిస్థితి తలెత్తే అవకాశం ఉంది. లేదా సెలవుపై వెళ్లాల్సిన పరిస్థితి ఉంటుంది.

మరోవైపు.. అమెరికా చరిత్రలోనే అత్యంత సుదీర్ఘ షట్‌డౌన్‌.. గతేడాది అక్టోబర్‌లో విధించారు. ఆ షట్‌డౌన్ ఏకంగా 43 రోజుల పాటు కొనసాగింది. అయితే.. ప్రస్తుతం అలాంటి పరిస్థితులు రాకపోవచ్చు అంటూ అధికారులు ఆశాభావం వ్యక్తం చేస్తున్నారు. ఇప్పటికే సెనెట్ ఒక తాత్కాలిక ప్యాకేజీకి ఆమోదం కల్పించింది. సోమవారం కానున్న హౌస్ ఆఫ్ రిప్రజెంటేటివ్స్ సమావేశమై.. ఈ తాత్కాలిక ప్యాకేజీకి ఆమోదం తెలిపితే.. కొద్ది రోజుల్లోనే అమెరికా ప్రభుత్వం మళ్లీ పూర్తిస్థాయిలో పట్టాలెక్కే అవకాశం ఉంది. అమెరికా ప్రభుత్వం 1981 నుంచి యూఎస్‌ ప్రభుత్వం 16 సార్లు షట్‌డౌన్ అయింది. 2018-2019 మధ్య డొనాల్డ్ ట్రంప్ హయాంలోనే దాదాపు 35 రోజుల పాటు షట్‌డౌన్ విధించారు.