by Suryaa Desk | Mon, Feb 02, 2026, 12:23 PM

టిబెట్‌కు చెందిన ప్రముఖ బౌద్ధ ఆధ్యాత్మిక గురువు దలైలామాకు ప్రతిష్ఠాత్మక గ్రామీ అవార్డు వరించింది. బెస్ట్‌ ఆడియో బుక్‌ నెరేషన్‌ విభాగంలో ‘మెడిటేషన్’ అనే ఆల్బమ్‌కు ఈ అవార్డు దక్కింది. ఇందులో ఆయన తన ఆలోచనలు, సందేశాలను ఆడియో రూపంలో అందించారు. సంగీత రంగంలో ప్రతిష్ఠాత్మకంగా భావించే ఈ అవార్డును 90 ఏళ్ల వయసులో సాధించారు. ఈ అవార్డును దలైలామా తరఫున ప్రముఖ సంగీతకారుడు రూఫస్ వేన్‌రైట్ స్వీకరించారు.ఈ వేడుకలో పలు విభాగాల్లో యువ గాయకులు, బృందాలు సత్తా చాటగా, సీనియర్ కళాకారులు కూడా తమ ప్రతిభను మరోసారి నిరూపించుకున్నారు.పాప్, రాక్, జాజ్, క్లాసికల్, హిప్‌హాప్ వంటి విభిన్న శైలుల్లో ఉత్తమ ప్రతిభ కనబర్చిన వారికి అవార్డులు అందజేశారు. సంగీత ప్రదర్శనలు, లైవ్ పెర్ఫార్మెన్స్‌లు ప్రేక్షకులను మంత్రముగ్ధులను చేశాయి.వేడుకలో పలువురు కళాకారులు తమ సంగీత ప్రయాణం, సృజనాత్మకతపై భావోద్వేగ ప్రసంగాలు చేయడం కూడా ప్రత్యేకంగా నిలిచింది. గ్రామీ అవార్డులు కేవలం సంగీతానికి మాత్రమే కాకుండా సాహిత్యం, ఆడియో బుక్స్, నెరేషన్ వంటి విభాగాలకు కూడా ప్రాధాన్యతనిస్తూ ప్రపంచవ్యాప్తంగా ప్రతిభను గౌరవిస్తాయని ఈసారి మరొకసారి స్పష్టమైంది. 90 ఏళ్ల వ‌య‌స్సులో తొలి గ్రామీ అవార్డ్‌ని ద‌క్కించుకొని రికార్డ్ సృష్టించారు ద‌లైలామా.