by Suryaa Desk | Sun, Feb 08, 2026, 11:09 PM

మనలో చాలా మంది శరీరంలో వచ్చే చిన్న చిన్న మార్పుల్ని అంతగా పట్టించుకోరు. ముఖ్యంగా నొప్పి లేని ఏ లక్షణాలైనా సరే లైట్ తీసుకుంటారు. నొప్పి కలిగినప్పుడే కొంచెం అలర్ట్ అవుతారు. చాలా మందికి కొన్నిసార్లు మలంలో రక్తం కనిపిస్తుంటుంది. అలాంటి సమయంలో ఎలాంటి నొప్పి కనిపించకపోతే దీన్ని చాలా మంది లైట్ తీసుకుంటారు. దీన్ని పైల్స్ అంటే మొలలు కారణంగా లేదా వేడి చేయడం వల్ల అనుకుంటారు.

అయితే, నొప్పి లేకుండా మలంలో రక్తం కనిపిస్తే నిర్లక్ష్యం చేయవద్దని డాక్టర్ నీతి రైజాడ. ప్రిన్సిపల్ డైరెక్టర్ (మెడికల్ ఆంకాలజీ & హెమటో-ఆంకాలజీ, బెంగళూరు, ఫోర్టిస్ హాస్పిటల్స్) చెబుతున్నారు. ఇది పెద్ద పేగు క్యాన్సర్ యొక్క ప్రారంభ లక్షణం కావచ్చని చెబుతున్నారు. ఇది ముఖ్యమైన హెచ్చరిక సంకేతం కావచ్చు. సకాలంలో గుర్తిస్తే ఇది ముందుగానే ప్రాణాల్ని కాపాడుతుంది. పెద్ద పేగు క్యాన్సర్ వస్తే శరీరంలో కనిపించే ఇతర లక్షణాలు, ఏం చేయాలో డాక్టర్ నీతి రైజాడ నుంచి తెలుసుకుందాం.

పెద్ద పేగు క్యాన్సర్ సైలెంట్ డిసీజ్

​పెద్దపేగు క్యాన్సర్‌ని సైలెంట్ డిసీజ్ అని నిపుణులు పిలుస్తున్నారు. ఎందుకంటే ఇది శరీరంలో ఎటువంటి అసౌకర్యాన్ని కలిగించకుండానే ఏళ్లుగా అభివృద్ధి చెందుతుంది. ప్రారంభ దశల్లో నొప్పి లాంటి ఏం కనిపించదు. బదులుగా శరీరం సైలెంట్ సంకేతాల్ని ఇవ్వొచ్చు. మలంలో రక్తం అంటే ఎరుపు గీతలు లేదా మలంతో కలిసిన ముదురు రక్తం లేదా అసాధారణంగా నల్లగా, జిగటగా కనిపించే మలం పేగు క్యాన్సర్ ప్రారంభ లక్షణాల్లో ఒకటి అని డాక్టర్ అంటున్నారు.

పైల్స్ అనుకొని పొరపాటు పడుతుంటారు

చాలా సార్లు మలంలో రక్తస్రావం చాలా తక్కువగా ఉంటుంది. అది సులభంగా కనిపించదు. కానీ కాలక్రమేణా శరీరాన్ని ప్రభావితం చేయవచ్చని డాక్టర్ అంటున్నారు. చాలా మంది చేసే ఒక తప్పు ఉంది. చాలా మంది ఈ లక్షణాన్ని వెంటనే హెమోరాయిడ్లగా భావిస్తారు.

అదేనండీ పైల్స్ సమస్య అనుకుంటారు. పైల్స్ సమస్యలో తరచుగా రక్తస్రావంగా అవుతుంది. అయితే, ఇది అంత ప్రమాదం కాదు. కానీ, పెద్ద పేగు క్యాన్సర్ లేదా ఇతర పేగు పరిస్థితుల్లో కూడా ఇదే లక్షణం కనిపిస్తుంది. చాలా మంది పైల్స్ అనుకోవడంతో పేగుక్యాన్సర్ నిర్థారణలో ఆలస్యం జరుగుతుంది.

మలంలో రక్తం కాకుండా కనిపించే ఇతర లక్షణాలు

కొన్ని వారాల కంటే ఎక్కువ కాలం పాటు మలబద్ధకం

లేదా తరచుగా విరేచనాలు

తక్కువ మలవిసర్జన

మలవిసర్జన తర్వాత కూడా భారం

అలసట లేదా బలహీనత

ఉన్నట్టుండి బరువు తగ్గడం

అప్పుడప్పుడు కడుపులో తీవ్రనొప్పి

పెద్దపేగు క్యాన్సర్ ప్రమాదం ఎవరికి ఎక్కువ?

45 ఏళ్ల వయసు పైబడ్డ వారికి పెద్దపేగు క్యాన్సర్ వచ్చే ప్రమాదం ఎక్కువగా ఉంటుంది.

కుటుంబంలో ఎవరికైనా పెద్దపేగు క్యాన్సర్ లేదా పాలిప్స్ చరిత్త కలిగి ఉండటం

జీర్ణవ్యవస్థలో ఇన్ఫ్లమేటరీకి సంబంధించి వ్యాధులు ఉండటం

ధూమపానం, మద్యం ఎక్కువగా సేవించేవారికి పెద్దపేగు క్యాన్సర్ ముప్పు ఉంది.

ఊబకాయంతో బాధపడుతున్నవారు కూడా పెద్దపేగు క్యాన్సర్ బారిన పడే అవకాశం ఉందని డాక్టర్ చెబుతున్నారు.

ప్రాసెస్ చేసిన ఫుడ్ ఎక్కువగా తీసుకునేవారిలో ఈ ప్రమాదం ఉంది. ఫైబర్ లేని అనారోగ్యకరమైన ఆహారం తీసుకునేవారిలో కూడా ముప్పు ఎక్కువే.

చికిత్స విధానాలు, తీసుకోవాల్సిన జాగ్రత్తలు

శుభవార్త ఏంటంటే.. పెద్దపేగు క్యాన్సర్‌ని ముందుగానే గుర్తించినట్లయితే చికిత్స అందించవచ్చు. స్టూల్ ఆధారిత పరీక్షలు, కొలొనోస్కోపీ వంటి ఆధునిక స్క్రీనింగ్ పద్ధతులు తీవ్రమైన సమస్యను కలిగించడానికి చాలా కాలం ముందే పేగు క్యాన్సర్‌ ప్రారంభ లక్షణాల్ని గుర్తించగలవు. మలంలో రక్తం కనిపిస్తే లైట్ తీసుకోకుండా వైద్యుణ్ని సంప్రదించడం తెలివైన పని. పైల్స్ అనుకోని నిర్లక్ష్యం చేస్తే తీవ్ర పరిణామాల్ని ఎదుర్కోవాల్సి వస్తుంది.

చాలా మంది మలంలో రక్తం పడే లక్షణాన్ని చెప్పుకోవడానికి సిగ్గుపడతారు. దీని కారణంగా అప్పటికే జరగాల్సిన నష్టం జరుగుతుంది. డాక్టర్లకు ఇలాంటి విషయాలు కొత్తేమీ కాదు. వాళ్లు మీ సమస్యను అర్థం చేసుకుంటారు. మలంలో నొప్పి లేకుండా రక్తం పడితే తేలిగ్గా తీసుకోవద్దు. వెంటనే వైద్యుణ్ని సంప్రదిస్తే పెద్ద ప్రమాదం నుంచి తప్పించుకోవచ్చు.