by Suryaa Desk | Sat, Feb 14, 2026, 07:18 PM

ఒమన్ ఆల్ రౌండర్ ఆమిర్ కలీమ్ టీ20 ప్రపంచకప్ చరిత్రలో తన పేరును లిఖించుకున్నాడు. టీ20 ప్రపంచకప్‌లో హాఫ్ సెంచరీ చేసిన అత్యంత పెద్ద వయస్కుడిగా శనివారం రికార్డు సృష్టించాడు. ఐర్లాండ్‌తో జరిగిన మ్యాచ్‌లో ఈ ఘనత సాధించాడు. ఆమిర్ కలీమ్ వయసు 44 ఏళ్ల 86 రోజులు.సింహళీస్ స్పోర్ట్స్ క్లబ్ వేదికగా జరిగిన ఈ మ్యాచ్‌లో, ఐర్లాండ్ నిర్దేశించిన 236 పరుగుల భారీ లక్ష్యఛేదనలో ఒమన్ తరఫున ఆమిర్ ఇన్నింగ్స్ ప్రారంభించాడు. కేవలం 28 బంతుల్లో 5 ఫోర్లు, 2 సిక్సర్ల సహాయంతో 50 పరుగులు పూర్తి చేశాడు. ఓ వైపు వికెట్లు పడుతున్నా, హమ్మద్ మిర్జాతో కలిసి 73 పరుగుల భాగస్వామ్యం నెలకొల్పాడు. అయితే, బారీ మెక్‌కార్తీ వేసిన పదునైన బౌన్సర్‌కు ఔటయ్యాడు.ఈ హాఫ్ సెంచరీతో, తన సహచర ఆటగాడు మహ్మద్ నదీమ్ నెలకొల్పిన రికార్డును ఆమిర్ అధిగమించాడు. ఇదే టోర్నమెంట్‌లో శ్రీలంకపై నదీమ్ 43 ఏళ్ల 161 రోజుల వయసులో హాఫ్ సెంచరీ చేసి ఈ రికార్డును నెలకొల్పాడు. ఈ జాబితాలో శ్రీలంక దిగ్గజం సనత్ జయసూర్య  మూడో స్థానంలో ఉన్నాడు.ఆమిర్ రికార్డు ఇన్నింగ్స్ ఆడినప్పటికీ, ఒమన్ జట్టును గెలిపించలేకపోయాడు. అతను ఔటైన తర్వాత ఒమన్ ఇన్నింగ్స్ కుప్పకూలింది. 18 ఓవర్లలో 139 పరుగులకే ఆలౌట్ కావడంతో ఐర్లాండ్ 96 పరుగుల తేడాతో ఘన విజయం సాధించింది. ఇటీవలే టీ20 ప్రపంచకప్‌లో పాల్గొన్న అత్యంత పెద్ద వయస్కుడిగా కూడా ఆమిర్ రికార్డు సృష్టించిన విషయం తెలిసిందే.