by Suryaa Desk | Tue, Feb 24, 2026, 07:46 PM

అగ్రరాజ్యం అమెరికా అధ్యక్షుడు డొనాల్డ్ ట్రంప్ తన ప్రాణాలకు పొంచి ఉన్న ముప్పుపై మొదటిసారి అత్యంత ఆందోళనకర వ్యాఖ్యలు చేశారు. తనను అంతమొందించేందుకు అనేక శక్తులు నిరంతరం ప్రయత్నిస్తున్నాయని, ప్రస్తుత పరిస్థితులు గమనిస్తుంటే తాను ఎంతకాలం జీవిస్తానో కూడా తనకే తెలియని అనిశ్చితి నెలకొందని పేర్కొన్నారు. ఫ్లోరిడాలోని తన నివాసం మార్-ఎ-లాగో వద్ద శనివారం అర్ధరాత్రి జరిగిన తాజా చొరబాటు ఉదంతంపై స్పందిస్తూ ఆయన ఈ వ్యాఖ్యలు చేశారు.

సాధారణ వ్యక్తులపై దాడి చేయరు..

తనపై జరుగుతున్న దాడులను చారిత్రక కోణంలో విశ్లేషించిన ట్రంప్.. షూటర్లు లేదా హంతకులు ఎప్పుడూ సాధారణ అధ్యక్షుల జోలికి వెళ్లరని వ్యాఖ్యానించారు. "కేవలం అసాధారణ విజయాలు సాధించే, దేశ గతిని మార్చే శక్తి ఉన్న నాయకులనే లక్ష్యంగా చేసుకుంటారు" అని అన్నారు. ఈ సందర్భంగా అమెరికా చరిత్రలో అత్యంత విషాదకరంగా హత్యకు గురైన మాజీ అధ్యక్షులు అబ్రహం లింకన్, జాన్ ఎఫ్. కెన్నడీ ఉదంతాలను ఆయన గుర్తు చేశారు. వారి తరహాలోనే తాను కూడా గొప్ప మార్పుల కోసం కృషి చేస్తున్నందున తనను టార్గెట్ చేస్తున్నారని అభిప్రాయ పడ్డారు.

మార్-ఎ-లాగోలో అసలేం జరిగింది?

శనివారం అర్ధరాత్రి సమయంలో ఒక గుర్తుతెలియని వ్యక్తి ఫ్లోరిడాలోని ట్రంప్ నివాసం మార్-ఎ-లాగోలోకి అక్రమంగా చొరబడ్డాడు. ఆ సమయంలో అతడి చేతిలో ఒక ఆయుధంతో పాటు ఇంధనం ఉన్న క్యాన్ కూడా ఉన్నట్లు సీక్రెట్ సర్వీస్ ఏజెంట్లు గుర్తించారు. తక్షణమే స్పందించిన భద్రతా సిబ్బంది.. ఆయుధాన్ని కింద పడేయాలని హెచ్చరించారు. అయితే ఆ దుండగుడు లొంగిపోవడానికి నిరాకరించి ప్రతిఘటించడంతో ఏజెంట్లు అతడిని అక్కడికక్కడే కాల్చి చంపారు.

ట్రంప్‌పై హత్యాయత్నం జరగడం ఇది మొదటిసారి కాదు. గతంలో జరిగిన కొన్ని కీలక ఘటనలు భద్రతా వైఫల్యాలను ఎత్తిచూపాయి. పెన్సిల్వేనియాలో ఎన్నికల ప్రచార సభలో ప్రసంగిస్తుండగా ట్రంప్‌పై కాల్పులు కూడా జరిగాయి. ఆ సమయంలో ఒక తూటా ఆయన కుడి చెవిని తాకుతూ వెళ్లడంతో తృటిలో ప్రాణాపాయం తప్పింది. అంతేకాకుండా పామ్ బీచ్ గోల్ఫ్ కోర్సులో ట్రంప్ ఆడుతున్న సమయంలో.. రైఫిల్‌తో పొదల్లో దాక్కున్న ఒక అనుమానితుడిని పోలీసులు అరెస్ట్ చేశారు. "ఎన్ని బెదిరింపులు వచ్చినా, నన్ను భయపెట్టాలని చూసినా నేను భయపడను. అమెరికా ప్రయోజనాల కోసం నేను తీసుకునే కఠిన నిర్ణయాల్లో మార్పు ఉండదు" అని ట్రంప్ ధీమా వ్యక్తం చేశారు. ప్రస్తుతానికి మార్-ఎ-లాగో వద్ద భద్రతను మరింత కఠినతరం చేశారు.