by Suryaa Desk | Mon, Mar 16, 2026, 10:15 PM

Toyota Highlander Electric 2027 Features: అమెరికా ఆటోమొబైల్ మార్కెట్‌లో ప్రస్తుతం కొత్త లగ్జరీ కార్ల సంఖ్య క్రమంగా తగ్గుతున్నట్లు తెలుస్తోంది. నిర్మాణ వ్యయాలు, పంపిణీ ఖర్చులు అధికంగా ఉండటంతో ఈ కార్ల ధరలు కూడా ఎక్కువగా ఉంటాయి.అదే సమయంలో లగ్జరీ కార్లను కొంతమంది వినియోగదారులు మాత్రమే కొనుగోలు చేస్తారు. మాస్ మార్కెట్‌లో వాటి అమ్మకాలు పరిమితంగానే ఉంటాయి. ఈ నేపథ్యంలో లగ్జరీ కార్ల స్థానంలో SUV వాహనాలకు డిమాండ్ పెరుగుతోంది. లగ్జరీ కార్లతో పోలిస్తే వీటి తయారీ ఖర్చులు తక్కువగా ఉండటంతో ధర కూడా వినియోగదారులకు అందుబాటులో ఉంటుంది. కొత్తగా కారు కొనాలనుకునే చాలా మంది ఇప్పుడు SUV మోడళ్లకే ప్రాధాన్యం ఇస్తున్నారు. ఈ నేపథ్యంలో 2027 నాటికి ఖరీదైన కార్లకు పోటీగా జపాన్‌కు చెందిన Toyota సంస్థ కొత్త SUVను అమెరికా మార్కెట్‌లోకి తీసుకురానుంది.ప్రస్తుతం అమెరికా ఆటోమొబైల్ మార్కెట్‌లో లగ్జరీ కార్ల విక్రయాల్లో BMW, Lexus, Mercedes-Benz వంటి కంపెనీలు అగ్రస్థానాల్లో కొనసాగుతున్నాయి. ముఖ్యంగా లెక్సస్ హైబ్రిడ్ మోడళ్లు మంచి ఆదరణ పొందుతుండగా, బీఎండబ్ల్యూ కూడా ప్రజాదరణ పొందిన బ్రాండ్‌గా నిలుస్తోంది. అయితే ప్రస్తుతం మార్కెట్‌లో SUV వాహనాల అమ్మకాలు వేగంగా పెరుగుతున్నాయి.2000 దశక ప్రారంభంలో బీఎండబ్ల్యూ, మెర్సిడెస్ వంటి లగ్జరీ కార్లు వినియోగదారులను విపరీతంగా ఆకట్టుకున్నాయి. కానీ గత పదేళ్లుగా టయోటా తన SUV మోడళ్లతో మార్కెట్‌లో తన స్థానాన్ని బలోపేతం చేసేందుకు ప్రయత్నిస్తోంది. ఆధునిక సాంకేతికతతో కూడిన స్మార్ట్ ఫీచర్లు, లగ్జరీ లుక్ కలిగిన డిజైన్ కారణంగా చాలా మంది వినియోగదారులు SUV కార్లవైపు మళ్లుతున్నారు. అదేవిధంగా ఈ వాహనాల్లో సాఫ్ట్ టచ్ మెటీరియల్స్, ప్రీమియం ప్లాస్టిక్ వంటి పదార్థాలు ఉపయోగించడం వల్ల ప్రయాణం మరింత సౌకర్యవంతంగా మారుతోంది.ఇదిలా ఉండగా 2027లో టయోటా హైలాండర్ ఎలక్ట్రిక్ వెర్షన్‌ను విడుదల చేయడానికి కంపెనీ సిద్ధమవుతోంది. ఈ మోడల్‌లో బాహ్య డిజైన్‌తో పాటు ఇంటీరియర్ కూడా ప్రత్యేకంగా ఉండబోతున్నట్లు సమాచారం. ఎక్స్టీరియర్ డిజైన్ విషయానికి వస్తే క్లోజ్డ్ గ్రిల్, స్లిమ్ మరియు ఫుల్-విడ్త్ LED లైటింగ్ వంటి ఫీచర్లు ఉండనున్నాయి. వాహనం పరిమాణంలో పెద్ద మార్పులు లేకపోయినా రూఫ్ లైన్ కొంచెం తక్కువగా ఉండి, వెడల్పు సుమారు రెండు అంగుళాల మేర పెరిగినట్లు కనిపించవచ్చు. ఫ్లష్ డోర్ హ్యాండిల్స్, కొత్త వీల్ డిజైన్ కూడా ఇందులో చూడవచ్చు. 19 అంగుళాల అల్లాయ్ వీల్స్ కారుకు ప్రీమియం లుక్ ఇస్తాయి.ఇంటీరియర్ విషయంలో 12.3 అంగుళాల డ్రైవర్ డిస్ప్లే, 14 అంగుళాల ఇన్ఫోటైన్‌మెంట్ టచ్‌స్క్రీన్ వంటి ఆధునిక ఫీచర్లు ఉండనున్నాయి. పాత హైలాండర్ మోడల్‌తో పోలిస్తే ఈ కొత్త వెర్షన్ పరిమాణంలో సుమారు 8.1 అంగుళాల పెరుగుదల ఉండొచ్చని సమాచారం.ఈ ఎలక్ట్రిక్ SUVలో 77.0 kWh బ్యాటరీ ప్యాక్ ఉండనుంది. పూర్తి చార్జ్‌తో సుమారు 270 మైళ్ల వరకు ప్రయాణించగలదు. DC ఫాస్ట్ ఛార్జింగ్ సపోర్ట్ ఉండటంతో కేవలం 10 నిమిషాల్లోనే సుమారు 80% వరకు బ్యాటరీ చార్జ్ అవుతుంది. ఈ కారుకు అంచనా ధర సుమారు 48,000 డాలర్ల వరకు ఉండవచ్చని ఆటోమొబైల్ వర్గాలు చెబుతున్నాయి.