by Suryaa Desk | Mon, Mar 30, 2026, 08:27 PM

ఇండియన్ ప్రీమియర్ లీగ్ (ఐపీఎల్) చరిత్రలో చెన్నై సూపర్ కింగ్స్ (సీఎస్‌కే)కు టీమిండియా దిగ్గజం ఎంఎస్ ధోనీ ఎంత కీలకమైన ఆటగాడో చెప్పాల్సిన అవసరం లేదు. కెప్టెన్‌గా, ఫినిషర్‌గా, వికెట్ కీపర్‌గా ఆయన జట్టుకు ఎన్నో విజయాలు అందించాడు. మహీ నాయకత్వంలో సీఎస్‌కే ఐదు టైటిల్స్‌ను సొంతం చేసుకుంది.అయితే గాయం కారణంగా ఐపీఎల్ 2026 ప్రారంభ రెండు వారాలకు ధోనీ దూరమయ్యాడు. ఈరోజు రాజస్థాన్ రాయల్స్‌తో జరుగుతున్న మ్యాచ్‌లో కూడా అతను బరిలోకి దిగడం లేదు. ధోనీ లేని సమయంలో సీఎస్‌కే ప్రదర్శనపై అభిమానుల్లో ఆందోళన వ్యక్తమవుతోంది.ధోనీ లేకుండా సీఎస్‌కే ఆడిన మ్యాచ్‌ల గణాంకాలు చూస్తే ఆ ప్రభావం స్పష్టంగా కనిపిస్తుంది. 2008 నుంచి 2026 వరకు సీఎస్‌కే తరఫున ధోనీ నిరంతరం ఆడుతున్నప్పటికీ, అతను లేని మ్యాచ్‌లు చాలా అరుదుగా మాత్రమే జరిగాయి. కానీ ఆ మ్యాచ్‌లలో జట్టు విజయాల కంటే ఓటములే ఎక్కువగా నమోదయ్యాయి.2010లో ఢిల్లీపై సీఎస్‌కే ధోనీ లేకుండా ఆడినప్పుడు విజయం సాధించింది. కానీ ఆ తరువాత జరిగిన మ్యాచ్‌లలో మాత్రం జట్టు వరుస ఓటములను చవిచూసింది. 2010లో కింగ్స్ ఎలెవన్ పంజాబ్, ఆర్సీబీపై, 2019లో సన్‌రైజర్స్ హైదరాబాద్, ముంబై ఇండియన్స్‌పై సీఎస్‌కే ఓడిపోయింది. మొత్తంగా ధోనీ లేకుండా ఆడిన ఐదు మ్యాచ్‌లలో నాలుగింటిలో సీఎస్‌కే పరాజయం పాలైంది.ఎంఎస్ ధోనీ కేవలం కెప్టెన్ మాత్రమే కాదు… మ్యాచ్‌ను అర్థం చేసుకునే తీరు, ఒత్తిడిలో చాకచక్యంగా నిర్ణయాలు తీసుకోవడం, చివరి ఓవర్లలో మ్యాచ్‌ను ముగించే సామర్థ్యం అతన్ని ప్రత్యేకంగా నిలబెడతాయి. అతను లేని సమయంలో జట్టులో ఆత్మవిశ్వాసం కొంత తగ్గినట్లు అనిపిస్తుంది.ఐపీఎల్ 2026లో కూడా ధోనీ గాయంతో దూరమవడం సీఎస్‌కేకు పెద్ద సవాల్‌గా మారింది. యువ ఆటగాళ్లు, కొత్త నాయకత్వం ఈ లోటును భర్తీ చేయాల్సిన పరిస్థితి ఏర్పడింది. ముఖ్యంగా రాజస్థాన్ రాయల్స్‌తో మ్యాచ్‌లో ధోనీ గైర్హాజరీ జట్టు సమతౌల్యంపై ప్రభావం చూపే అవకాశం ఉంది.