రేషన్ కార్డుల దారులకు ఈ కేవైసీ,,,డిసెంబర్ 31 వరకు గడువు పొడగింపు

సంక్షేమ పథకాలు అర్హులకు మాత్రమే అందించడానికి కేంద్ర, రాష్ట్ర ప్రభుత్వాలు చర్యలు తీసుకుంటున్నాయి. అయితే ప్రధానంగా పేదలకు అందాల్సిన రేషన్ బియ్యం, పప్పులు, ఇతర సరుకులు పక్కదారి పడుతున్నట్లు గత కొంతకాలంగా ఆరోపణలు ఉన్నాయి. ఈ నేపథ్యంలో అర్హులకే రేషన్ సరుకులు అందే విధంగా చర్యలు తీసుకునేందుకు ప్రభుత్వం సిద్ధమైంది. అందులో భాగంగానే రేషన్‌ కార్డులకు ఈ కేవైసీ (ఎలెక్ట్రానిక్‌- నో యువర్‌ కస్టమర్‌) తప్పనిసరి చేశారు.

రేషన్ కార్డులో ఉన్న సభ్యుల వేలి ముద్రల ఆధారంగా వారు కుటుంబంలో సభ్యుడా ? కాదా ? అనే విషయాలను ఈ కేవైసీ ద్వారా ఈజీగా గుర్తించనున్నారు. ఈ ప్రక్రియ ద్వారా రేషన్ బియ్యం సహా ఇతర సరుకులు అర్హులకు మాత్రమే అందే విధంగా కేంద్ర, రాష్ట్ర ప్రభుత్వాలు చర్యలు తీసుకుంటున్నాయి. ఇక రేషన్ కార్డులో ఎంత మంది పేర్లయితే ఉన్నాయో.. వారందరి ఈ కేవైనీని అధికారులు తప్పనిసరి చేశారు. ఎవరైతే కేవైసీ చేయించుకోరో.. వారి పేరును రేషన్ కార్డు నుంచి పూర్తిగా తొలగించనున్నారు. అప్పుడు వారికి రేషన్ సరుకులు అందవు. అందుకే రేషన్ కార్డు కలిగిన లబ్ధిదారులు కచ్చితంగా ఈ-కేవైసీ చేయించుకోవాల్సి ఉంటుంది. సమీపంలోని రేషన్ డీలర్ల వద్దకు వెళ్లి ఈ కేవైసీని ఈజీగా పూర్తి చేసుకోవచ్చు.

అయితే ఈ కేవైసీకి విధించిన తుది గడువును ప్రభుత్వం తాజాగా మళ్లీ పొడిగించింది. ఈ నెలాఖరుతో ముగియనున్న తేదీని డిసెంబరు 31 వరకు తాజాగా పెంచింది. మరోసారి ఈ అవకాశం ఉండే ఛాన్స్ లేని.. ఈ కేవైసీని పూర్తి చేయటంలో నిర్లక్ష్యం చేసిన లబ్ధిదారులు ఆ తర్వాత రేషన్‌ పొందలేరని ప్రభుత్వం స్పష్టం చేసింది. ఇప్పటి వరకు రాష్ట్రవ్యాప్తంగా మూడోవంతు మంది మాత్రమే ఈకేవైసీని పూర్తిచేశారని అధికారులు వెల్లడించారు. ప్రభుత్వం గడువు పొడిగిస్తుందనో.. ఇతర కారణాలతో చాలామంది రేషన్ లబ్ధిదారులు నిర్లక్ష్యం చేస్తున్నారని.. ఇక ఆ అవకాశం ఉండబోదని హెచ్చరించారు.

ప్రతి ఒక్క లబ్ధిదారుడు సమీపంలోనే రేషన్ డీలరును సంప్రదించి తమ వివరాలు నమోదు చేయించుకోవాలని సూచించారు. ఆధార్‌కు సంబంధించి సమస్యలుంటే వాటిని ముందే పరిష్కరించుకోవాలని సూచించారు. ఈ సారీ గడువు మీరే వరకు నిర్లక్ష్యం చేస్తే మాత్రం.. రేషన్ బియ్యం బంద్ అయిపోతాయని.. ఇతర ప్రభుత్వ పథకాలకు అర్హత సాధించే విషయంలో ఇబ్బందులు ఎదురవుతాయని అధికారులు హెచ్చరిస్తున్నారు.