నిర్మల్ ఆర్డీఓ కారుపై దాడి.. నిప్పు పెట్టిన రైతులు.. లగచర్ల ఘటన మరవక ముందే

ఫార్మా కంపెనీ ఏర్పాటును వ్యతిరేకిస్తూ.. ఇటీవల వికారాబాద్ జిల్లా లగచర్లలో జిల్లా కలెక్టర్ బృందంపై రైతులు, గ్రామస్థులు దాడి చేసిన విషయం తెలిసిందే. ఈ ఘనటలో పలువురు అధికారులు తీవ్రంగా గాయపడగా.. కలెక్టర్‌తో పాటు ఇతరుల వాహనాలు ధ్వంసం చేశారు. ఈ ఘటన మరవక ముందే నిర్మల్ జిల్లాలో ఉద్రిక్తత నెలకొంది. దిలావర్‌పూర్‌ ,గుండవపల్లి గ్రామాల మధ్య ఇథనాల్ ఫ్యాక్టరీని ఏర్పాటు చేయాలని ప్రభుత్వం నిర్ణయం తీసుకోగా.. స్థానికులు వ్యతిరేకిస్తున్నారు. ఈ క్రమంలో గత రెండ్రోజులుగా స్థానికులు నిరసనలు వ్యక్తం చేస్తున్నారు.

  దీంతో ప్రస్తుతం అక్కడ ఉద్రిక్త పరిస్థితులు నెలకొన్నాయి. ఆందోళనకారులతో చర్చించేందుకు నిర్మల్ ఆర్డీవో రత్న కళ్యాణి మంగళవారం (నవంబర్ 26) రాత్రి అక్కడకు చేరుకున్నారు. వారితో మాట్లాడేందుకు ప్రయత్నించగా.. స్థానికులు వినిపించుకోలేదు. ఆర్డీవోను కారులోనే నిర్భందించారు. కలెక్టర్ వచ్చి సమాధానం చెప్పాలని డిమాండ్ చేస్తూ పెద్ద ఎత్తున నినాదాలు చేశారు. ఇక్కడ ఇథనాల్ ఫ్యాక్టరీ పెట్టమని స్పష్టమైన హామీ ఇస్తేనే ఆర్డీవోను విడిచిపెడ్తామని తెగేసి చెప్పారు.

ఆర్డీవోను పోలీసుల సాయంతో పంపేందుకు ప్రయత్నం చేయగా.. ఆందోళనకారులు రెచ్చిపోయారు. ఆర్డీవో కారుపై దాడికి యత్నించారు. కారు అద్దాలు ధ్వసం చేయటంతో పాటుగా.. కారుపై మండుతున్న కర్రలు విసిరేశారు. ఈ క్రమంలో ఓ మహిళా ఎస్సైకి గాయాలయ్యాయి. పరిస్థితి చేయిదాటే ప్రమాదం ఉండటంతో పోలీసులు అప్రమత్తమై మరో వాహనంలో ఆర్డీవోను అక్కడి నుంచి పంపించేశారు.

ఇవాళ ఉదయం దిలావర్‌పూర్‌ గ్రామానికి పెద్ద ఎత్తున చేరుకున్న పోలీసులు గతరాత్రి దాడిలో పాల్గొన్న రైతులను అరెస్టు చేసేందుకు ప్రయత్నించారు. దీంతో గ్రామస్తులు వారిని అడ్డుకున్నారు. ఉదయం నుంచి నిరసనకారులను పోలీసులు అరెస్టు చేసేందుకు ప్రయత్నించటంతో రోడ్లపైకి వచ్చి వాహనాలను అడ్డుకున్నారు. గ్రామం నుంచి వెళ్లిపోవాలంటూ పెద్ద ఎత్తున నినాదాలు చేశారు. ఇథనాల్ పరిశ్రమ తరలించేంతవరకు ఎన్ని అక్రమ అరెస్టులు జరిగినా భయపడేది లేదని రైతులు తేల్చి చెప్పారు. గ్రామస్తులంతా మూకుమ్మడిగా ఇళ్లలో నుంచి బయటకు వచ్చి రోడ్లపై నిరసన వ్యక్తం చేశారు. గ్రామంలోని ప్రధాన కూడలిలో పోలీసు బలగాలు పహార కాస్తున్న లెక్క చేయకుండా వందల సంఖ్యలో గ్రామస్తులు ర్యాలీగా రోడ్ల పైకి వచ్చి ఆందోళలు వ్యక్తం చేశారు.