అబ్బురపడేలా బాపూ ఘాట్‌.. 300 అడుగుల ఎత్తుతో గాంధీ విగ్రహం

తెలంగాణ ప్రభుత్వం మూసీ పునరుజ్జీవం ప్రాజెక్టు చేపట్టిన సంగతి తెలిసిందే. మూసీ మురికిని వదిలించి మంచినీరు పారేలా చేస్తామని సీఎం రేవంత్ రెడ్డి ఇప్పటికే ప్రకటించారు. అందుకు అనుగుణంగా చర్యలు సైతం చేపట్టారు. మూసీ నది అభివృద్ధి కార్పొరేషన్, హైడ్రా, హెచ్‌ఎండీఏ, హైదరాబాద్‌ గ్రోత్‌ కారిడార్‌.. ఇలా అన్ని శాఖల సమన్వయంతో మూసీకి పునరుజ్జీవం తీసుకొచ్చేందుకు కసరత్తు చేస్తున్నారు. మూసీ సుందరీకరణలో భాగంగా.. మూసీ ఒడ్డున అతిపెద్ద గాంధీ విగ్రహం ప్రతిష్ఠించనున్నట్లు సీఎం వెల్లడించారు.

  బాపూ ఘాట్‌ నుంచి ఉస్మాన్‌సాగర్, హిమాయత్‌సాగర్‌ల వరకు 21 కి.మీ. మేర నది పునరుజ్జీవం పేరుతో అభివృద్ధికి ప్రతిపాదించారు. అంతర్జాతీయ ప్రమాణాలతో అభివృద్ధి చేసేందుకు సిద్ధమైంది. గోదావరి నది నుంచి మళ్లించే నీటితోపాటు మూసీ, ఈసీ నదుల నీళ్లు బాపూ ఘాట్‌ వద్ద కలుస్తున్నందున.. దీనిని త్రివేణి సంగమంగా అభివృద్ధి చేయాలని అధికారులు భావిస్తున్నట్లు తెలిసింది. బాపూ ఘాట్‌ అభివృద్ధికి ప్రభుత్వం రెండు డీపీఆర్‌లు సిద్ధం చేసినట్లు సమాచారం. బాపూ ఘాట్‌ వద్ద భూసేకరణ కోసమే రూ.700 కోట్ల -రూ.800 కోట్ల వరకు వ్యయం చేయాల్సి వస్తుందని అంచనా వేస్తున్నారు.

కాగా, బాపూ ఘాట్‌ వద్ద 300 అడుగుల ఎత్తుతో ప్రపంచంలోనే ఎత్తైన గాంధీ విగ్రహం ఏర్పాటు చేయనున్నారు. అతిపెద్ద వీల్‌ ఆఫ్‌ లైఫ్‌ (జెయింట్‌ వీల్‌) సైతం నిర్మించేందుకు సిద్ధమయ్యారు. త్రికోణ పేరుతో అంతర్జాతీయ స్థాయి ధాన్య కేంద్రం, ది స్టాట్యూ ఆఫ్‌ పీస్, ట్రినిటీ పేరుతో వెల్‌నెస్‌ విలేజ్, బ్రిడ్జ్‌ ఆఫ్‌ రికవరీ, త్రివేణి, దిన్యూ గురుకుల, బ్రిడ్జి ఆఫ్‌ డిస్కవరీ.. ఇలా పలు రకాల నిర్మాణాలను అధికారులు ప్రతిపాదించారు. సింగపూర్‌లోని ప్లైయర్‌ జెయింట్‌ వీల్‌ 165 మీటర్ల ఎత్తు ఉండగా.. దుబాయ్‌ ఐ జెయింట్‌ వీల్‌ 250 మీటర్ల ఎత్తులో ఉంది. బాపూ ఘాట్ వద్ద నిర్మించే వీల్‌ ఆఫ్‌ లైఫ్‌ను ఇంకా ఎత్తుతో నిర్మించాలనేది ప్రభుత్వ ప్రతిపాదన. త్వరలోనే అందుకు సంబంధించిన డీపీఆర్‌ పూర్తవుతుందని అధికార వర్గాలు వెల్లడిస్తున్నాయి.

కాగా, బాపూ ఘాట్‌ వద్ద మూసీ ప్రాంత అభివృద్ధికోసం ఇటీవల కేంద్ర రక్షణశాఖ మంత్రి రాజ్‌నాథ్ సింగ్‌ను సీఎం రేవంత్ కలిశారు. 222.27 ఎకరాల రక్షణ శాఖ భూమిని రాష్ట్ర ప్రభుత్వానికి బదిలీ చేయాలని కోరారు. ఈ విషయంలో రక్షణశాఖ నుంచి సానుకూలత వ్యక్తమవుతుందని ప్రభుత్వం భావిస్తోంది.