మద్యంప్రియులకు కిక్కెక్కిచ్చే గుడ్‌న్యూస్.. మళ్లీ వచ్చేస్తున్నాయ్

తెలంగాణలోని మద్యంప్రియులకు కిక్కెక్కిచ్చే శుభవార్త. కింగ్ ఫిషర్ బీర్లు మళ్లీ వచ్చేస్తున్నాయోచ్. ఈ విషయం ఎవరో చెప్పటం కాదు.. స్వయంగా యునైటెడ్ బ్రూవరీస్ కంపెనీనే.. అధికారికంగా ప్రకటించింది. గత కొన్ని రోజుల కింద.. రాష్ట్రానికి కింగ్ ఫిషర్ బీర్లు సరఫరా చేయబోమని యునైటెడ్ బ్రూవరీస్ సంస్థ ప్రకటించిన విషయం తెలిసిందే. ఈ ప్రకటనతో.. బీరు ప్రియులు తీవ్రం ఆందోళనకు గురయ్యారు. ముఖ్యంగా కింగ్ ఫిషర్ బీర్ల ఫ్యాన్స్ కాస్త ఎక్కువగానే కంగారుపడ్డారు. సాధారణంగానే ఏదైనా పండుగో పబ్బమో ఉన్నా.. వేసవి కాలమైనా కింగ్ ఫిషర్ బీర్లకు ఉండే డిమాండ్ ప్రత్యేక చెప్పనక్కర్లేదు. అలాంటిది ఇప్పుడు ఏకంగా సరఫరానే ఆపేస్తున్నామని ప్రకటించటంతో.. కేఎఫ్ బీర్ల ప్రియులు బెంగపెట్టుకున్నారు. ఇలాంటి సమయంలో.. వాళ్లందరికీ కిక్కెక్కించే గుడ్ న్యూస్ చెప్పింది యునైటెడ్ బ్రూవరీస్ సంస్థ.

పెండింగ్ బిల్లులు చెల్లించకపోవటం.. గత కొన్నేళ్లుగా బీర్ల ధరలు పెంచకపోవటంతో.. యునైటెడ్ బ్రూవరీస్ సంస్థ ఇకపై తెలంగాణకు బీర్ల సరఫరా నిలిపేస్తున్నట్టు ప్రకటించిన విషయం తెలిసిందే. ఈ క్రమంలో.. మందుబాబులకు వచ్చే ఇబ్బందులను గుర్తించిన రేవంత్ రెడ్డి సర్కార్.. ఈ విషయంపై ప్రత్యేక దృష్టి సారించింది. యునైటెడ్ బ్రూవరీస్ సంస్థతో కీలక చర్చలు జరిపింది. ఆ చర్చలు సఫలం కావటంతో.. రాష్ట్రాన్ని కింగ్ ఫిషర్ బీర్ల సరఫరాను మళ్లీ ప్రారంభించాలని నిర్ణయించినట్టు యునైటెడ్ బ్రూవరీస్ సంస్థ ప్రకటించింది. ఈ మేరకు సోమవారం (జనవరి 20న) రోజున యునైటెడ్ బ్రూవరీస్ సంస్థ అధికారిక ప్రకటన విడుదల చేసింది.

తెలంగాణ ప్రభుత్వంతో కీలక చర్చల తర్వాత కేఎఫ్ బీర్ల సరఫరాను మళ్లీ ప్రారంభించాలని నిర్ణయించినట్లు తెలిపింది యునైటెడ్ బ్రూవరీస్. అయితే.. ప్రస్తుతం ఉన్న ధరలకే సరఫరా చేస్తారా లేక ధరలు పెంచుతారా అన్నది మాత్రం క్లారిటీ రావాల్సి ఉంది. ధరల విషయంపై త్వరలోనే సమాచారం ఇస్తామని సంస్థ తెలిపింది. ఈ సరఫరా చేసే నిర్ణయం తక్షణమే అమల్లోకి వస్తుందని స్పష్టం చేసింది. ఈ మేరకు సోమవారం రోజు స్టాక్ ఎక్స్చేంజీ ఫైలింగ్‌లో యునైటెడ్ బ్రేవరీస్ సంస్థ వెల్లడించింది. తెలంగాణకు మళ్లీ కింగ్ ఫిషర్ బీర్లు వస్తున్నాయన్న వార్తతో మద్యం ప్రియులు హర్షం వ్యక్తం చేస్తున్నారు. ఇకపై తమ ఫెవరెట్ బ్రాండ్ బీర్ అందుబాటులో ఉంటుందని పండగ చేసుకుంటున్నారు.