బీఆర్ఎస్ అధినేత, మాజీ ముఖ్యమంత్రి కేసీఆర్ గారికి హార్దిక జన్మదిన శుభాకాంక్షలు!

తెలంగాణ చరిత్రలో చిరస్థాయిగా నిలిచే పోయే ప్రముఖుల పేర్లలో కేసీఆర్ ఒకటి. పూర్తి పేరు కల్వకుంట్ల చంద్రశేఖరరావు. ప్రత్యేక రాష్ట్రాన్ని సాధించిన ఘనత ఆయనకే దక్కింది. ఈయన ఫిబ్రవరి 17, 1954లో చింతమడక గ్రామంలో జన్మించారు. విద్యార్థి దశలో రాజకీయాలపై ఆసక్తి పెంచుకొని కాంగ్రెస్, టీడీపీలో సేవలు అందించారు. ఎమ్మెల్యేగా, ఎంపీగా, కేంద్ర మంత్రిగా పనిచేశారు. 2001లో TRSను స్థాపించి తెలంగాణ మలిదశ ఉద్య మాన్ని ఉధృతంగా నడిపారు. తెలంగాణ తొలి సీఎంగా పదేళ్లు చేశారు.
కేసీఆర్ రాజకీయ ప్రస్థానం
TDP తరపున 1983లో తొలిసారిగా సిద్ధిపేట నుంచి ఎమ్మెల్యేగా పోటీ చేసి KCR ఓడిపోయారు. ఆ తర్వాత 1989, 1994, 1999, 2001, 2004లో వరుసగా ఎమ్మెల్యేగా ఎన్నికయ్యారు. తొలిసారిగా 1987-88లో మంత్రి అయ్యారు. చంద్రబాబు మంత్రివర్గంలోకి తీసుకోకపోవడంతో 2001 ఏప్రిల్ 21న డిప్యూటీ స్పీకర్ పదవికి, తెలుగుదేశం పార్టీకి రాజీనామా చేశారు. ఏప్రిల్ 27న TRSని స్థాపించారు. తెలంగాణ సాధించాక తొలి సీఎంగా వరుసగా పదేళ్లు పని చేశారు.

కేసీఆర్ ఏం చదువుకున్నారో తెలుసా?
కేసీఆర్ సిద్ధిపేట డిగ్రీ కళాశాలలో చరిత్ర, రాజనీతి శాస్త్రం, తెలుగు సాహిత్యం సబ్జెక్టులుగా బిఎ పూర్తి చేశారు. ఆ తర్వాత ఉస్మానియా విశ్వవిద్యాలయం ఎంఎ (తెలుగు సాహిత్యం) చదివారు. అయితే అదే విశ్వవిద్యాలయ శత వసంతాల వేడుకలను పూర్వ విద్యార్థి అయిన కేసీఆర్ ముఖ్యమంత్రి హోదాలో నిర్వహించడం విశేషం.

కేసీఆర్  కుటుంబ నేపథ్యం ఇదే..
కేసీఆర్  సొంతూరు మెదక్ జిల్లాలోని చింతమడక. 1954 ఫిబ్రవరి 17న రాఘవరావు, వెంకటమ్మ దంపతులకు జన్మించాడు. ఈయనకు ఒక అన్న, తొమ్మిది మంది అక్కాచెల్లెళ్లు. కేసీఆర్ కుటుంబం ఎగువ మానేరు డ్యాం నిర్మాణంలో భూమి కోల్పోయి చింతమడక గ్రామానికి వచ్చి స్థిరపడింది. 1969 ఏప్రిల్ 23న శోభను కేసీఆర్ పెళ్లి చేసుకున్నారు. వీరికి ఇద్దరు సంతానం. కుమారుడు కేటీఆర్, కుమార్తె, కవిత.