హైదరాబాద్‌లో ఏడేళ్లపాటు నిరంతర వెలుగులు.. కీలక నిర్ణయం తీసుకున్న ప్రభుత్వం

హైదరాబాద్ నగరాన్ని ఏడేళ్లపాటు చీకట్లు లేకుండా.. నిరంతరం వెలుగులతో నింపడానికి జీహెచ్‌ఎంసీ (గ్రేటర్ హైదరాబాద్ మున్సిపల్ కార్పొరేషన్) సిద్ధమవుతోంది. ఇందుకోసం రూ. 900 కోట్లతో భారీ వీధిలైట్ల నిర్వహణ ప్రాజెక్టుకు ప్రణాళికలు సిద్ధం చేసింది. పురపాలకశాఖ కార్యదర్శి ఇలంబర్తి పచ్చజెండా ఊపడంతో.. కమిషనర్ కర్ణన్ ఆధ్వర్యంలో టెండర్ల ప్రక్రియ మొదలైంది. ఈ ప్రాజెక్టు రెండు నెలల్లో కార్యరూపం దాల్చనుంది. గతంలో కాంట్రాక్టు నిబంధనలు సరిగా లేక, లైట్లు వెలగకపోయినా కఠిన చర్యలు తీసుకోలేకపోయామని.. అందుకే ఇప్పుడు కొత్త నిబంధనలతో బలోపేతమైన వ్యవస్థను తీసుకొస్తున్నామని అధికారులు చెబుతున్నారు.

ఈ కొత్త ప్రాజెక్టులో నాణ్యత, జవాబుదారీతనం, భద్రతకు అధిక ప్రాధాన్యత ఇస్తున్నారు. గతంలో వీధిలైట్లు ఆరిపోవడం లేదా 48 గంటలకు మించి వెలగకపోవడం లాంటివి జరిగితే సదరు కాంట్రాక్టర్లపై కఠిన చర్యలు తీసుకోవడం కష్టమయ్యేది. కానీ ఇప్పుడు కొత్త విధానంలో.. 48 గంటలు దాటితే జరిమానా విధించడం వంటి కఠిన నిబంధనలను పొందుపరిచారు.

ప్రతి స్తంభానికి ఎర్తింగ్..

వర్షాలు, గాలి దుమారం వంటి సమయాల్లో వీధిలైటు స్తంభాలను ముట్టుకోవాలంటే కరెంటు షాక్ భయంతో ప్రజలు వణుకుతుంటారు. చాలా చోట్ల ఎర్తింగ్ లేకపోవడం వల్లే ఇలాంటి ప్రమాదాలు జరుగుతున్నాయి. ఈ ప్రాణాపాయాన్ని నివారించడానికి, నగరంలోని ప్రతి వీధిలైటు స్తంభానికి తప్పనిసరిగా ఎర్తింగ్ చేయాలనే నిబంధనను జీహెచ్‌ఎంసీ పక్కాగా సిద్ధం చేసింది. ఇది ప్రజల భద్రతకు ఎంతో అవసరం.

కొత్త టెండరు నిబంధనల ప్రకారం.. కొత్తగా ఏర్పాటు చేసే ఒక్కో వీధిలైటుకు జీహెచ్‌ఎంసీ ప్రతి నెలా రూ. 168 చెల్లించనుంది. ఈ ధరలో లైట్లతో పాటు, విద్యుత్తు స్తంభం, తీగలు, ఇతర నిర్వహణ ఖర్చులన్నీ సదరు కాంట్రాక్ట్ సంస్థవే అని నిబంధన పెట్టారు. గతంలో జీహెచ్‌ఎంసీ ఈ అన్నింటికీ వేర్వేరుగా బిల్లులు చెల్లించేది. ఈ కొత్త విధానంతో జీహెచ్‌ఎంసీకి ఆర్థికంగా ఖర్చులు తగ్గుతాయని, అదే సమయంలో వీధిలైట్లు నిరంతరాయంగా వెలుగుతాయని అధికారులు ఆశాభావం వ్యక్తం చేస్తున్నారు.

ఈ ప్రాజెక్టు ప్రజలకు మెరుగైన రాత్రిపూట ప్రయాణ సౌకర్యాన్ని, భద్రతను అందిస్తుంది. చీకటి ప్రదేశాల్లో నేరాలు తగ్గుతాయి. నగరంలో రాత్రిపూట కార్యకలాపాలు పెరిగి, ఆర్థిక వ్యవస్థకు కూడా మేలు చేకూరుతుంది. మొత్తంగా.. ఈ కొత్త వీధిలైట్ల ప్రాజెక్టు హైదరాబాద్‌ను మరింత సురక్షితమైన, ప్రకాశవంతమైన నగరంగా మార్చనుంది.