తెలంగాణలో అలా చేస్తే రేషన్ కార్డు రద్దు

తెలంగాణ రాష్ట్రవ్యాప్తంగా గత కొన్ని రోజులుగా భారీ వర్షాలు కురుస్తున్నాయి. వాగులు, వంకలు ఉప్పొంగి ప్రవహిస్తుండటంతో పలు గ్రామాల్లో జనజీవనం స్తంభించిపోయింది. ఈ నేపథ్యంలో.. ప్రమాదాలను నివారించడానికి అధికారులు అప్రమత్తమయ్యారు. ముఖ్యంగా.. ఉప్పొంగి ప్రవహిస్తున్న వాగులలో చేపల వేట కోసం వెళ్లేవారిపై అధికారులు కఠిన చర్యలకు సిద్ధమయ్యారు. ఖమ్మం జిల్లాలో గత కొన్ని రోజులుగా గణనీయమైన వర్షపాతం నమోదైంది. జిల్లాలో సగటున 80 మిల్లీమీటర్ల వర్షపాతం నమోదవ్వగా.. భద్రాచలం వంటి లోతట్టు ప్రాంతాల్లో ఇది 100 మిల్లీమీటర్లకు పైగా ఉంది. వాగులు, నదులు ప్రమాదకర స్థాయిలో ప్రవహిస్తుండటంతో.. ఏన్కూర్ తహసీల్దార్ శేషగిరిరావు కీలక హెచ్చరికలు జారీ చేశారు. వరద ప్రవాహంలో చేపలు పట్టేందుకు వెళ్లేవారిని గుర్తించి.. గ్రామ కార్యదర్శులు ఇచ్చే నివేదిక ఆధారంగా వారి రేషన్ కార్డులను రద్దు చేస్తామని ఆయన స్పష్టం చేశారు. ఇప్పటికే రాష్ట్ర ప్రభుత్వం మూడు రోజుల పాటు అలర్ట్ ప్రకటించింది. ప్రజలు అత్యవసర పరిస్థితుల్లో తప్ప బయటకు రావద్దని, వరద ప్రవాహం ఉన్న ప్రాంతాలకు వెళ్లవద్దని ఆయన విజ్ఞప్తి చేశారు.

  ఎడతెరిపి లేకుండా కురుస్తున్న వర్షాల కారణంగా రోడ్లపై నీరు నిలిచిపోయింది. దీంతో రవాణాకు తీవ్ర అంతరాయం ఏర్పడింది. లోతట్టు ప్రాంతాలు నీట మునిగాయి. ఈ పరిస్థితుల్లో సహాయక చర్యలు చేపట్టడానికి అధికారులు బృందాలను సిద్ధం చేశారు. గ్రామ కార్యదర్శులు నిత్యం ప్రజలకు అందుబాటులో ఉంటూ.. వరద పరిస్థితిని ఎప్పటికప్పుడు సమీక్షిస్తున్నారు.

వర్షాల వల్ల ఏ గ్రామంలో కూడా ప్రాణ, ఆస్తి నష్టం జరగకుండా అధికారులు ముందస్తు జాగ్రత్తలు తీసుకుంటున్నారు. ప్రజలు అధికారుల సూచనలను పాటించి, సహకరించాలని అధికారులు కోరుతున్నారు. ఈ చర్యల ద్వారా వర్షాల వల్ల కలిగే నష్టాన్ని తగ్గించవచ్చని భావిస్తున్నారు. కొన్ని కుటుంబాల్లో ఉదయం లేచిన తర్వాత చేపలు పట్టేందుకే వెళ్తుంటారు. వారికి అదే జీవనాధారం. అయితే వర్షాలు కురుస్తున్న సమయంలో వేటకు వెళ్లడం మంచిది కాదు అని అధికారులు సూచిస్తున్నారు. దీనిని ప్రతి ఒక్కరు పాటించాలని.. వర్షాల కారణంగా అవసరం ఉంటే తప్ప బయటకు రావొద్దంటూ హెచ్చరిస్తున్నారు.