హైదరాబాద్‌ నగరంలో ప్రపంచ స్థాయి లైబ్రరీ.. పూర్తి ఉచితంగా

హైదరాబాద్ నగరంలోని పుస్తక ప్రియులకు గుడ్‌న్యూస్. నగరంలో ప్రపంచ స్థాయి పబ్లిక్ లైబ్రరీ అందుబాటులోకి వచ్చింది. ప్రముఖ అంతర్జాతీయ డిజిటల్ సర్వీసెస్, సొల్యూషన్స్ ప్రొవైడర్ అయిన కోఫోర్జ్ లిమిటెడ్ 15 వేల పుస్తకాలతో నగరంలో ఈ పబ్లిక్ లైబ్రరీని ప్రారంభించింది. అత్యాధునిక సదుపాయాలతో అతిపెద్ద లైబ్రరీని అందుబాటులోకి తీసుకువచ్చారు. నోయిడా , గురుగ్రామ్‌లలో విజయవంతంగా లైబ్రరీలను ప్రారంభించిన కోఫోర్జ్.. కార్పొరేట్ సామాజిక బాధ్యత కార్యక్రమం కింద నగరంలో మూడో మూడో లైబ్రరీని ఏర్పాటు చేసింది.

కొండాపూర్ నివాస ప్రాంతానికి ఆనుకుని.. కొత్తగూడలోని ప్రణవ బిజినెస్ పార్క్ 8వ అంతస్తులో ఈ లైబ్రరీని ఏర్పాటు చేశారు. 15,660 చదరపు అడుగుల విస్తీర్ణంలో ఉన్న ఈ లైబ్రరీలో ఫ్లోర్-టు-సీలింగ్ గ్లాస్ గోడల ద్వారా నగర అందాలను చూడొచ్చు. పూర్తిగా ఎయిర్ కండిషన్ చేయబడిన ఈ లైబ్రరీలో వీల్‌చైర్ వినియోగదారులకు సౌలభ్యంగా ఉండేలా విశాలమైన కారిడార్లు, చిన్నారి విద్యార్థులను ఆకర్షించేలా ప్రత్యేకంగా రూపొందించిన చిల్డ్రన్స్ జోన్ ఉన్నాయి.

ఈ లైబ్రరీలో ఫిక్షన్, థ్రిల్లర్స్, ప్రయాణం, పిల్లల సాహిత్యం, సెల్ఫ్-హెల్ప్, మేనేజ్‌మెంట్, ఆర్టిఫిషియల్ ఇంటెలిజెన్స్ (AI), పర్యావరణం, కవిత్వం, ఆత్మకథలు, గ్రాఫిక్ నవలలు, రాజకీయాలు వంటి అనేక అంశాలకు సంబంధించిన 15,000కు పైగా పుస్తకాలు ఉంచారు. ఈ జాబితాలో అవార్డులు పొందిన రచయితల పుస్తకాలు, విలువైన రిఫరెన్స్ శీర్షికలు కూడా ఉన్నాయి. అంతేకాకుండా.. పాఠకులకు సులభంగా సేవలు అందించేందుకు పూర్తిగా డిజిటలైజ్ చేయబడిన కేటలాగింగ్, నిర్వహణ వ్యవస్థను ఏర్పాటు చేశారు.

ఉచిత ప్రవేశం, నిరంతర సేవలు

ఈ కో ఫోర్జ్ పబ్లిక్ లైబ్రరీ అందరికీ ఉచితంగా అందుబాటులో ఉంటుంది. ఇది సంవత్సరంలో 365 రోజులు, ప్రతిరోజూ ఉదయం 9 గంటల నుండి రాత్రి 8 గంటల వరకు తెరిచి ఉంటుంది. జ్ఞానానికి ద్వారంగా, వ్యక్తిగత ఎదుగుదలకు ఉత్ప్రేరకంగా, స్థానిక సమాజంలో సమ్మిళిత అభివృద్ధికి మూలస్తంభంగా ఈ లైబ్రరీ ఉపయోగపడుతుందని కోఫోర్జ్ ప్రతినిధులు వెల్లడించారు.

సమాజంలో మానవుల ఎదుగుదలకు లైబ్రరీలు అమూల్యమైన వనరులని, దేశ నిర్మాణంలో కీలక పాత్ర పోషిస్తాయని తాము నమ్ముతున్నట్లు కోఫోర్జ్ చీఫ్ బ్రాండ్ అండ్ సస్టైనబిలిటీ ఆఫీసర్ అనురాధ సెహగల్ తెలిపారు. హైదరాబాద్ ప్రజలకు ఈ అద్భుతమైన సదుపాయాన్ని అందిస్తున్నందుకు గర్వంగా ఉందన్నారు. ఇది భవిష్యత్తు తరాలకు జీవితకాల అభ్యాసానికి పుణ్యక్షేత్రంగా మారుతుందని ఆశిస్తున్నట్లు తెలిపారు.