ఎంబీఏతో సాఫ్ట్‌వేర్ ఉద్యోగం

సాధారణంగా ఎంబీఏ (మాస్టర్ ఆఫ్ బిజినెస్ అడ్మినిస్ట్రేషన్) పూర్తి చేసిన విద్యార్థులు మార్కెటింగ్, ఫైనాన్స్ లేదా హెచ్‌ఆర్ వంటి మేనేజ్‌మెంట్ రంగాల్లో స్థిరపడతారు. అయితే.. ప్రస్తుత టెక్నాలజీ యుగంలో, సాఫ్ట్‌వేర్ పరిశ్రమ కేవలం కోడింగ్ నేపథ్యం ఉన్నవారికి మాత్రమే పరిమితం కాలేదు. మేనేజ్‌మెంట్ సామర్థ్యాలు, సరైన సాంకేతిక నైపుణ్యాలు (టెక్నికల్ స్కిల్స్) జోడైతే.. ఎంబీఏ పూర్తి చేసినవారు కూడా అత్యుత్తమ సాఫ్ట్‌వేర్ ఉద్యోగాలను పొందవచ్చు.

మీకు కోడింగ్ నేపథ్యం లేకపోయినా.. ఎంబీఏ ద్వారా పొందిన ప్రాజెక్ట్ నిర్వహణ (ప్రాజెక్ట్ మేనేజ్‌మెంట్), సమస్య పరిష్కార సామర్థ్యం, కమ్యూనికేషన్ , వ్యాపార విశ్లేషణ (బిజినెస్ అనాలసిస్) వంటి నైపుణ్యాలు ఐటీ రంగంలో గొప్పగా ఉపయోగపడతాయి. సాఫ్ట్‌వేర్ ప్రాజెక్టుల నిర్వహణకు, క్లయింట్‌ల అవసరాలను అర్థం చేసుకోవడానికి, టీమ్‌లను సమర్థవంతంగా నడపడానికి ఈ నైపుణ్యాలు తప్పనిసరి. సాఫ్ట్‌వేర్ రంగంలో ప్రవేశించడానికి, మీరు కొన్ని కీలక సాంకేతిక అంశాలను నేర్చుకోవాల్సి ఉంటుంది. ముందుగా ప్రైవేట్ రంగంలో పని చేసిన అనుభవం ఉంటే.. మీకు ఈ మార్పు సులభమవుతుంది.

సాఫ్ట్‌వేర్ టెస్టింగ్ రంగంలో మీ ఎంబీఏ నైపుణ్యాలకు తగిన ఉద్యోగాలు లభిస్తాయి. మీరు ఇప్పటికే నేర్చుకున్న జావా, సెలీనియంలకు ప్రస్తుత ఐటీ మార్కెట్‌లో భారీ డిమాండ్ ఉంది. ఈ కలయిక ప్రత్యేకంగా ఆటోమేషన్ టెస్టింగ్ రంగంలో ఎక్కువ అవకాశాలను కల్పిస్తుంది. సెలీనియం ఆటోమేషన్‌తో పాటు టెస్ట్ ఎన్‌జీ, కుకుంబర్ , పేజ్ ఆబ్జెక్ట్ మోడల్ వంటి ఫ్రేమ్‌వర్క్‌లను నేర్చుకోవాలి. వీటిపై కనీసం రెండు ప్రాక్టికల్ ప్రాజెక్టులు పూర్తి చేస్తే ఉద్యోగావకాశాలు మెరుగుపడతాయి. ఈ రంగంలో తక్కువ సమయంలో స్థిరమైన ఉద్యోగాన్ని పొందడానికి వీలవుతుంది.

మీరు నేర్చుకున్న వర్డ్‌ప్రెస్, బూట్‌స్ట్రాప్ వంటి వెబ్ టెక్నాలజీలు వెబ్ డెవలప్‌మెంట్ వైపు అవకాశాలను కల్పిస్తాయి. అయితే.. ఈ రంగంలో ముందుకు సాగాలంటే మీరు మరిన్ని ఆధునిక టూల్స్ నేర్చుకోవాలి. జావా స్క్రిప్ట్, అలాగే రియాక్ట్ లేదా యాంగ్యులర్ వంటి ఆధునిక ఫ్రంట్‌ఎండ్ ఫ్రేమ్‌వర్క్‌లను నేర్చుకోవడం తప్పనిసరి. ఈ రంగంలో రాణించడానికి ఎక్కువ సమయం కేటాయించి, సొంత ప్రాజెక్టులను అభివృద్ధి చేయడం ముఖ్యం. మీకు కోడింగ్‌పై ఆసక్తి ఉంటే, జావా డెవలపర్‌గా కూడా రాణించవచ్చు. జావాతో పాటు స్ప్రింగ్‌బూట్, రెస్ట్ ఏపీఐ డెవలప్‌మెంట్, మైక్రో సర్వీసెస్ ఆర్కిటెక్చర్ వంటి ఆధునిక అంశాలను కూడా నేర్చుకోవాలి. ఈ నైపుణ్యాలు భవిష్యత్తులో మంచి వేతనంతో కూడిన ఉద్యోగాలు పొందడానికి మార్గం సుగమం చేస్తాయి.

ఎంబీఏ చేసినవారికి సాఫ్ట్‌వేర్ కంపెనీలలో అత్యంత అనుకూలమైన పాత్ర వ్యాపార విశ్లేషకులు. ఈ పాత్రలో టెక్నికల్ స్కిల్స్ కంటే కమ్యూనికేషన్, క్లయింట్ మేనేజ్‌మెంట్ మరియు వ్యాపార అవగాహన ముఖ్యం. సాఫ్ట్‌వేర్ బృందానికి, క్లయింట్‌లకు మధ్య వారధిగా వీరు పనిచేస్తారు. మీరు నేర్చుకున్న ఎస్.క్యూ.ఎల్ నైపుణ్యం డేటా విశ్లేషణకు, సాఫ్ట్‌వేర్ టెస్టింగ్‌కు ఎంతో సహాయపడుతుంది. ఈ నైపుణ్యాన్ని మరింత పదును పెట్టండం మంచిదని కెరియర్ కౌన్సిలర్స్ చెబుతున్నారు.

కేవలం కోర్సులు నేర్చుకోవడం కాకుండా, నేర్చుకున్న వాటిని ఉపయోగించి కనీసం రెండు లేదా మూడు రియల్ టైమ్ ప్రాజెక్టులు మీ రెజ్యూమె లో చూపించడం ద్వారా ఉద్యోగం పొందే అవకాశాలు మెరుగుపడతాయి. సాఫ్ట్‌వేర్ రంగంలో మీ నిర్వహణ నైపుణ్యాలకు సాంకేతిక పరిజ్ఞానాన్ని జోడించడం ద్వారా మీరు ఉన్నత స్థానాలకు చేరుకోగలుగుతారు.