నేను రాజకీయాల్లో ఉన్నంతకాలం అధికారంలోకి రానివ్వను.. సీఎం రేవంత్ రెడ్డి

సొంత నియోజకవర్గం కొడంగల్‌లో పర్యటిస్తున్న ముఖ్యమంత్రి రేవంత్ రెడ్డి .. కోస్గిలో నిర్వహించిన బహిరంగ సభలో సంచలన వ్యాఖ్యలు చేశారు. నారాయణపేట జిల్లాలోని కోస్గి పట్టణంలో కొత్తగా ఎన్నికైన సర్పంచ్‌లతో నిర్వహించిన సమావేశ సభకు హాజరైన సీఎం రేవంత్ రెడ్డి.. మాజీ ముఖ్యమంత్రి, బీఆర్ఎస్ అధినేత కేసీఆర్‌పై తీవ్ర స్థాయిలో విరుచుకుపడ్డారు. తాను ప్రత్యక్ష రాజకీయాల్లో ఉన్నంతకాలం.. కల్వకుంట్ల కుటుంబాన్ని తెలంగాణలో అధికారంలోకి రానివ్వనని సవాల్ విసిరారు. వచ్చే ఎన్నికల్లో కూడా కాంగ్రెస్ పార్టీదే విజయం అని ధీమా వ్యక్తం చేశారు.

కొడంగల్ గడ్డ నుంచి సవాల్ విసురుతున్నానని పేర్కొన్న రేవంత్ రెడ్డి.. వచ్చే 2029 అసెంబ్లీ ఎన్నికల్లో కాంగ్రెస్ పార్టీ మూడొంతుల్లో రెండొంతుల మెజార్టీతో కాంగ్రెస్ పార్టీ అధికారంలోకి వస్తుందని వెల్లడించారు. కల్వకుంట్ల కుటుంబానికి తాను అధికారం దక్కనివ్వనని తేల్చి చెప్పారు. దమ్ముంటే కాస్కోండి అంటూ సవాల్ చేశారు. ఈ సందర్భంగా కేసీఆర్, ఆయన కుటుంబ సభ్యులపై తీవ్ర పదజాలాన్ని సీఎం రేవంత్ రెడ్డి ఉపయోగించారు.

ఈ సందర్భంగా కొత్తగా ఎన్నికైన సర్పంచ్‌లకు శుభాకాంక్షలు చెప్పిన సీఎం రేవంత్.. గ్రామాల అభివృద్ధి కోసం.. కొత్త ఏడాదిలో నిధులు మంజూరు చేస్తామని హామీ ఇచ్చారు. పంచాయతీలకు వచ్చే నిధులు కాకుండా.. చిన్న ఊర్లకు రూ.5 లక్షలు.. పెద్ద ఊర్లకు రూ.10 లక్షలు ముఖ్యమంత్రి నిధి నుంచి ప్రత్యేక అభివృద్ధి నిధులను కేటాయిస్తామని చెప్పారు. మంత్రులు, ఎమ్మెల్యేలు, ఎంపీలతో సంబంధం లేకుండా ఈ నిధులను మంజూరు చేస్తానని హామీ ఇచ్చారు.

ఈ సందర్భంగా దేశానికే ఆదర్శంగా కొడంగల్‌ నియోజకవర్గాన్ని తీర్చిదిద్దుతామని సీఎం రేవంత్ రెడ్డి పేర్కొన్నారు. ప్రతి ఊరు, తండాకు రోడ్లు వేస్తామని.. గుడి, బడి, తాగునీరు, పేదలకు ఇళ్లు, రేషన్‌ కార్డులను అందిస్తామని తెలిపారు. ఇండస్ట్రియల్‌ పార్కును డెవలప్ చేసి నిరుద్యోగాన్ని తొలగిస్తామని హామీ ఇచ్చారు. కొడంగల్‌ నియోజకవర్గంలో సమస్యల పరిష్కారానికి తన సోదరుడు తిరుపతిరెడ్డిని అందుబాటులో ఉంచినట్లు చెప్పుకొచ్చారు. ఎన్నికలు ముగిశాయని.. ఇక ఎలాంటి రాజకీయాలు లేవని తెలిపారు. ఎన్నికల్లో పోటీ చేసినప్పుడే పార్టీలు, పంథాలు ఉండాలని.. రాష్ట్రానికి నాయకత్వ వహిస్తున్న వారు అందరినీ కలుపుకొని పోదామని పేర్కొన్నారు.