సంక్రాంతికి ఊరెళ్లే వారు ఈ పనిచేయాల్సిందే,,,,హైదరాబాద్ సీపీ సజ్జనార్

తెలుగువారి అతిపెద్ద పండుగ సంక్రాంతి వచ్చేసింది. నగరాల్లోని ఉద్యోగులు, విద్యార్థులు, వ్యాపారులు అంతా తమ సొంత ఊర్లకు వెళ్లేందుకు ప్రయాణమవుతున్నారు. అయితే పండుగ పూట ఇళ్లకు తాళాలు వేసి వెళ్లే వారిని లక్ష్యంగా చేసుకుని దొంగలు పంజా విసిరే ప్రమాదం ఉందని హైదరాబాద్ పోలీస్ కమిషనర్ సజ్జనార్ నగరవాసులను అప్రమత్తం చేశారు. ప్రజల భద్రత కోసం ట్విట్టర్ ఎక్స్ వేదికగా పలు కీలక సూచనలు జారీ చేశారు.

కుటుంబంతో కలిసి కొన్ని రోజుల పాటు ఇల్లు విడిచి వెళ్తున్నట్లయితే.. ఆ విషయాన్ని మీ పరిధిలోని పోలీస్ స్టేషన్‌లో గానీ, బీట్ ఆఫీసర్‌కు గానీ తెలియజేయాలని కమిషనర్ కోరారు. ఇలా చేయడం వల్ల పోలీసులు తమ రెగ్యులర్ పెట్రోలింగ్‌లో భాగంగా మీ ఇల్లు ఉన్న వీధిపై ప్రత్యేక నిఘా ఉంచుతారని ఆయన తెలిపారు. ఆధునిక పోలీసింగ్ అంటే కేవలం నేరం జరిగిన తర్వాత స్పందించడం మాత్రమే కాదని.. నేరం జరగకుండా ముందే నిరోధించడం కూడా అని ఆయన ఈ సందర్భంగా గుర్తుచేశారు.

ప్రయాణంలో ఉన్నప్పుడు ఇంట్లో భారీగా నగదును గానీ, బంగారు ఆభరణాలను గానీ ఉంచవద్దని సీపీ సజ్జనార్ హెచ్చరించారు. 'మీ విలువైన వస్తువులను బ్యాంక్ లాకర్లలో లేదా ఇతర సురక్షితమైన ప్రదేశాలలో భద్రపరుచుకోండి. చిన్నపాటి అజాగ్రత్త దొంగలకు అవకాశంగా మారుతుంది' అని ఆయన సూచించారు. తాళం వేసి ఉన్న ఇళ్లను గుర్తించేందుకు దొంగలు కిటికీలు, గుమ్మాల వద్ద నిఘా పెడతారని అందుకే విలువైన వస్తువులు ఇంట్లో లేకపోవడమే ఉత్తమమని ఆయన స్పష్టం చేశారు.

నేటి కాలంలో సీసీటీవీ కెమెరాలు భద్రతలో కీలక పాత్ర పోషిస్తున్నాయి. వీలైతే మీ ఇళ్లకు నిఘా కెమెరాలను ఏర్పాటు చేసుకోవాలని, స్మార్ట్‌ఫోన్ ద్వారా వాటిని ఎప్పటికప్పుడు గమనిస్తూ ఉండాలని పోలీసులు సూచిస్తున్నారు. అలాగే, ఇంటి బయట లైట్లు రాత్రంతా వెలిగేలా చూసుకోవడం వల్ల కూడా దొంగతనాలను అరికట్టవచ్చునని చెబుతున్నారు. ఇరుగుపొరుగు వారితో మాట్లాడి, అనుమానాస్పద వ్యక్తులు కనిపిస్తే వెంటనే సమాచారం ఇచ్చేలా సమన్వయం చేసుకోవాలని కోరారు.

శాంతిభద్రతల పరిరక్షణలో ప్రజల సహకారం ఎంతో కీలకమని కమిషనర్ పేర్కొన్నారు. ఏదైనా అత్యవసర పరిస్థితి ఎదురైనా లేదా మీ కాలనీలో అనుమానాస్పద కదలికలు గమనించినా వెంటనే 'డయల్ 100' కు కాల్ చేయాలని కోరారు. పండుగ ఆనందం ఆవిరి కాకుండా ఉండాలంటే ఈ చిన్నపాటి జాగ్రత్తలు తీసుకోవడం ఎంతో అవసరమని ఆయన గుర్తుచేశారు. పోలీసులు నిరంతరం మీ భద్రత కోసం శ్రమిస్తున్నారని, నిశ్చింతగా పండుగ జరుపుకోవాలని సీపీ సజ్జనార్ సూచించారు.