ప్రపంచంలోని వింత కట్టడాల జాబితా,,,,హైదరాబాద్‌ ఫిష్ బిల్డింగ్‌కు చోటు

ఐటీ పార్కులు, చారిత్రక కట్టడాలకు కేరాఫ్ అడ్రస్‌గా నిలిచే హైదరాబాద్ నగరం ఇప్పుడు మరో అరుదైన ప్రపంచ గుర్తింపును సొంతం చేసుకుంది. నగరంలోని 'నేషనల్ ఫిషరీస్ డెవలప్‌మెంట్ బోర్డ్' ప్రధాన కార్యాలయం ప్రపంచంలోని అత్యంత వింతైన, అద్భుతమైన నిర్మాణాల జాబితాలో చోటు సంపాదించుకుంది.

2012లో నిర్మించిన ఈ నాలుగు అంతస్తుల భవనం, ఒక భారీ చేప ఆకారంలో ఉండటం దీని ప్రత్యేకత. ఈ బిల్డింగ్‌కి స్ఫూర్తి..1992లో పూర్తి అయిన బార్సిలోనా ఫ్రాంక్‌ గెహ్రీ స్మారక ఫిష్‌ శిల్పం. దాని ప్రేరణతో చేప ఆకారంలో బిల్డింగ్‌ని నిర్మించడం జరిగిందని అప్పటి ఫిషరీస్ అధికారులు మీడియాకు వెల్లడించారు. మిమెటిక్‌ ఆర్కిటెక్చర్‌కు ఒక ఉదాహరణగా ఉంటుందని ఆర్కిటెక్చర్ నిపుణులు చెబుతున్నారు. అంటే.. ఆ భవనం లోపల జరిగే పనిని ప్రతిబింబించేలా బయటి ఆకారం ఉంటుంది. మత్స్య శాఖకు సంబంధించిన కార్యాలయం కావడంతో.. దీనిని అచ్చం చేప ఆకారంలోనే నిర్మించారు. మెటాలిక్ షీన్, పెద్ద ఫిన్స్ (రెక్కలు), కళ్ల మాదిరిగా కనిపించే కిటికీలతో ఈ భవనం పర్యాటకులను విశేషంగా ఆకట్టుకుంటోంది. దీని ప్రవేశ ద్వారం రెండు మెట్లపై ఉన్న గుడారంలా నిర్మించారు.

పగటిపూట ఒక భారీ చేపలా కనిపించే ఈ భవనం.. రాత్రి వేళల్లో నీలిరంగు స్పాట్‌లైట్ల వెలుగులో మరింత వింతగా కనిపిస్తుంది. చీకట్లో నీలి కాంతుల మధ్య చూస్తుంటే.. ఒక భారీ చేప నీటిలో ఈదుతున్నట్లు భ్రమ కలుగుతుంది. సాధారణంగా ప్రభుత్వ కార్యాలయాలు అంటే కాంక్రీటు దిమ్మెల్లా ఉంటాయనే భావనను చెరిపివేస్తూ.. ఒక సృజనాత్మక కట్టడంగా ఇది నిలిచింది.

అంతర్జాతీయ స్థాయిలో అమెరికాలోని 'బాస్కెట్' ఆకారపు భవనం, పోలాండ్‌లోని 'క్రూక్డ్ హౌస్' (వంగిపోయిన ఇల్లు), ఫ్లోరిడాలోని 'గిటార్' ఆకారపు హోటళ్లతో పాటు ఇప్పుడు మన హైదరాబాద్ ' ఫిష్ బిల్డింగ్ ' కూడా ప్రపంచ వింత కట్టడాల జాబితాలో చేరింది. భారతదేశపు ప్రభుత్వ మౌలిక సదుపాయాల్లో ఇంతటి సృజనాత్మకత ఉండటం పట్ల అంతర్జాతీయంగా ప్రశంసలు వ్యక్తమవుతున్నాయి. ప్రస్తుతం ఈ భవనం కేవలం ఒక ప్రభుత్వ కార్యాలయంగానే కాకుండా.. నగరానికి వచ్చే పర్యాటకులు తప్పనిసరిగా సందర్శించే ఒక ల్యాండ్‌మార్క్‌గా మారిపోయింది.