విధి వంచించిన వేళ.. ప్రాణాపాయంలో తల్లీకొడుకులు.. ఆపన్నహస్తం కోసం ఆర్తనాదాలు

భద్రాద్రి కొత్తగూడెం జిల్లా పాల్వంచ మండలం పుల్లయ్యగూడెం గ్రామానికి చెందిన ఒక నిరుపేద కుటుంబంపై విధి పగబట్టింది. ఆ ఇంట్లో దీపంలా వెలగాల్సిన యువకుడు, అతనికి నీడగా నిలవాల్సిన తల్లి ఇద్దరూ ఒకేసారి ప్రాణాంతక వ్యాధుల బారిన పడటంతో ఆ కుటుంబం దిక్కుతోచని స్థితిలో కొట్టుమిట్టాడుతోంది. కటిక పేదరికంలో ఉన్న వీరికి కనీసం పూట గడవడమే కష్టంగా మారిన తరుణంలో, లక్షల రూపాయల ఖర్చయ్యే వైద్యం భారం కావడంతో చావుబతుకుల మధ్య పోరాడుతున్నారు.
ఆ కుటుంబానికి చేదోడువాదోడుగా ఉండాల్సిన యువకుడు కాశీమల్ల కమలాకర్ 'పెంకియాన్' అనే అరుదైన మరియు వింత వ్యాధితో బాధపడుతున్నాడు. ప్రస్తుతం అతను ఆసుపత్రిలో చికిత్స పొందుతూ మంచానికే పరిమితమయ్యాడు. ఈ వింత వ్యాధి అతడి శరీరాన్ని క్షీణింపజేస్తుండటంతో, తను మళ్ళీ మామూలు మనిషి అవుతానో లేదో అన్న ఆందోళన ఆ యువకుడి కళ్లలో స్పష్టంగా కనిపిస్తోంది. వైద్యం కోసం ఖరీదైన మందులు, పరీక్షలు అవసరం కావడంతో ఆ కుటుంబం ఆర్థికంగా పూర్తిగా కుంగిపోయింది.
ఒకవైపు కొడుకు పరిస్థితి చూసి కన్నీరుమున్నీరవుతున్న ఆ తల్లిని మరోవైపు గుండె జబ్బు వేధిస్తోంది. ఆమె పరిస్థితి అత్యంత విషమంగా ఉందని, తక్షణమే గుండెకు 'స్టంట్' వేయాలని వైద్యులు స్పష్టం చేశారు. కొడుకును కాపాడుకోవాలా లేక తన ప్రాణాన్ని నిలబెట్టుకోవాలా అన్న సందిగ్ధంలో ఆమె కొట్టుమిట్టాడుతోంది. చేతిలో చిల్లిగవ్వ లేక, సరైన వైద్యం అందక ఆ తల్లి పడుతున్న ఆవేదన వర్ణనాతీతంగా ఉంది. వారి కష్టాలు వింటుంటే స్థానికుల కళ్లు సైతం చెమర్చుతున్నాయి.
ఈ క్లిష్ట సమయంలో ఆ కుటుంబానికి దాతల సహకారం అత్యవసరం. తమ కళ్లముందే ప్రాణాలు పోతుంటే ఏమీ చేయలేక నిస్సహాయ స్థితిలో ఉన్న ఆ తల్లీకొడుకులను కాపాడటానికి దాతలు ముందుకు రావాలని గ్రామస్తులు కోరుతున్నారు. చిన్నపాటి సాయం కూడా ఆ నిరుపేద కుటుంబంలో మళ్ళీ వెలుగులు నింపుతుందని, మానవత్వంతో స్పందించి ఆపన్నహస్తం అందించాలని వారు వేడుకుంటున్నారు. ప్రభుత్వం మరియు స్వచ్ఛంద సంస్థలు స్పందించి ఈ ఆపదలో ఉన్న కుటుంబాన్ని ఆదుకోవాల్సిన అవసరం ఎంతైనా ఉంది.