తెలంగాణ రైతులకు భారీ ఊరట.. సబ్సిడీ నేరుగా అకౌంట్లలోకి

తెలంగాణలో రాబోయే ఖరీఫ్ సీజన్ ఏర్పాట్లపై రాష్ట్ర వ్యవసాయ శాఖ మంత్రి తుమ్మల నాగేశ్వరరావు కీలక సమీక్ష సమావేశం నిర్వహించారు. రైతుల సంక్షేమాన్ని ప్రధాన లక్ష్యంగా పెట్టుకుని ప్రభుత్వం పలు చర్యలను చేపడుతోంది.గతంలో వ్యవసాయ యాంత్రీకరణ పథకం కింద రైతులు కొనుగోలు చేసే ట్రాక్టర్లు, ఇతర వ్యవసాయ యంత్రాలపై ఇచ్చే 40 శాతం సబ్సిడీ నేరుగా కంపెనీలకు వెళ్లేది. దీంతో నిధుల వినియోగంలో పూర్తిస్థాయి పారదర్శకత లేకపోతుందని ప్రభుత్వం గుర్తించింది. అందుకే ఇకపై ఆ సబ్సిడీ మొత్తాన్ని నేరుగా రైతుల బ్యాంకు ఖాతాల్లోకి డైరెక్ట్ బెనిఫిట్ ట్రాన్స్‌ఫర్ (DBT) విధానంలో జమ చేయాలని నిర్ణయం తీసుకుంది. దీంతో రైతులు తమకు నచ్చిన కంపెనీల నుంచి నాణ్యమైన యంత్రాలను ఎంపిక చేసుకునే అవకాశం పొందడంతో పాటు మధ్యవర్తుల ప్రభావం కూడా తగ్గే అవకాశం ఉంది.రాబోయే వానాకాలం (ఖరీఫ్) సీజన్‌లో రాష్ట్రవ్యాప్తంగా సుమారు 60.60 లక్షల హెక్టార్లలో పంటలు సాగయ్యే అవకాశం ఉందని ప్రభుత్వం అంచనా వేస్తోంది. సాగు విస్తీర్ణం పెరిగే అవకాశాన్ని దృష్టిలో ఉంచుకుని రైతులకు ఎలాంటి ఇబ్బందులు కలగకుండా ముందస్తు చర్యలు తీసుకోవాలని మంత్రి అధికారులను ఆదేశించారు. ముఖ్యంగా విత్తనాలు వేసే సమయానికి ఎరువుల కొరత తలెత్తకుండా ఇప్పటి నుంచే జిల్లాల వారీగా బఫర్ స్టాక్ సిద్ధం చేయాలని సూచించారు. అలాగే నేల సారాన్ని పెంచేందుకు అవసరమైన పచ్చిరొట్ట విత్తనాలను ఏప్రిల్ నెలాఖరులోపు రైతులకు అందుబాటులో ఉంచాలని స్పష్టం చేశారు.వ్యవసాయ రంగాన్ని మరింత ఆధునీకరించేందుకు ప్రభుత్వం ప్రత్యేక ప్రణాళికలు రూపొందిస్తోంది. ప్రతి గ్రామంలోని రైతు వేదికల ద్వారా రైతులకు వ్యవసాయంపై అవగాహన కార్యక్రమాలు నిర్వహించేందుకు సిద్ధమవుతున్నారు. శాస్త్రవేత్తలు, వ్యవసాయ అధికారులు నేరుగా పొలాలకు వెళ్లి రైతులకు సాంకేతిక సలహాలు ఇచ్చేలా ప్రత్యేక బృందాలను ఏర్పాటు చేస్తున్నారు. అదనంగా డిజిటల్ క్రాప్ సర్వే ద్వారా ఏ ప్రాంతంలో ఏ పంట ఎంత విస్తీర్ణంలో సాగవుతుందో ఖచ్చితమైన వివరాలను సేకరించి, దానికి అనుగుణంగా మార్కెటింగ్ సదుపాయాలను కల్పించనున్నారు. ఈ చర్యల ద్వారా వ్యవసాయాన్ని మరింత లాభదాయకంగా మార్చడమే కాకుండా ప్రభుత్వ రాయితీలు అర్హులైన ప్రతి రైతుకూ పారదర్శకంగా చేరేలా పటిష్టమైన వ్యవస్థను మంత్రి తుమ్మల రూపొందిస్తున్నారు.