ఫుల్లుగా తాగి రైలు పట్టాలపై ఎస్‌యూవీ నడిపిన యువకుడు.. దూసుకొచ్చిన గూడ్స్

ఫుల్లుగా మద్యం సేవించిన యువకుడు.. మత్తులో రైలు పట్టాలపై తన ఎస్‌యూవీని నడిపాడు. ఇదే సమయంలో అటుగా ఓ గూడ్సు రైలు దూసుకొచ్చింది. భయానక ఈ ఘటన రాజస్థాన్‌ రాజధాని జైపూర్‌లో చోటుచేసుకోగా.. దీనికి సంబంధించిన వీడియో సోషల్ మీడియాలో వైరల్‌ అవుతోంది. 51 సెకన్ల నిడివి గల వీడియో క్లిప్‌లో మహీంద్ర థార్ ఎస్‌యూవీ రైల్వే ట్రాక్‌పై ఇరుక్కుపోవడంతో స్థానికులు, పోలీసులు అక్కడ పెద్ద ఎత్తున గుమిగూడారు. ఈ క్రమంలో పట్టాల మధ్యలో ఇరుక్కున్న ఆ కారును బయటకు తీసిన అనంతరం అతడు అక్కడ నుంచి పారిపోతున్న దృశ్యాలు కూడా వీడియోలో ఉన్నాయి.

 మద్యం మత్తులో ఉన్న యువకుడు రీల్ కోసం రైలు పట్టాలపైకి తన కారును నడిపినట్లు తెలుస్తోంది. అదే సమయంలో ఆ మార్గంలో వస్తోన్న గూడ్స్ రైలు లోకో పైలట్ ప్రమాదాన్ని గమనించి, ఎమర్జెన్సీ బ్రేకులు వేసి నిలిపివేశాడు. ఆయన సకాలంలో స్పందించడంతో అదృష్టవశాత్తూ పెను ప్రమాదం తప్పింది. ఇక, ట్రాక్‌పై నుంచి ఎస్‌యూవీని పక్కకు తీయడానికి స్థానికులు సాయం చేశారు. 20 నుంచి 30 మీటర్ల మేర రివర్స్ చేసి.. ఆ వెంటనే పక్కనే ఉన్న రోడ్డుపైకి ఎక్కి వాహనంతో పరారయ్యాడు. ఈ సమయంలో కొందర్ని ఢీకొట్టడంతో ముగ్గురికి గాయాలయ్యాయి.

పారిపోతున్న మందుబాబును పోలీసులు వెంబడించి కొద్దిసేపటి తర్వాత అరెస్టు చేశారు. అయితే, సోషల్ మీడియాలో లైక్‌లు, వ్యూస్ పిచ్చికోసం రైలు పట్టాలపై ప్రమాదకర స్టంట్లు, ఫీట్లు చేయడం ఇదే మొదటిసారి కాదు. గతంలో చాలా మంది ఈ విధంగా రీల్స్ చేస్తూ రైళ్లు ఢీకొట్టి ప్రమాదానికి గురైన ప్రాణాలు కోల్పోవడం, తీవ్రంగా గాయపడటం వంటి ఘటనలు ఉన్నాయి. ఇక, తాగి వాహనాలు నడిపే ప్రమాదాలు చేసేవారికే లేక్కలేదు. మైనర్ల సైతం కార్లు నడిపి ప్రాణాలు తీస్తున్న ఘటనలు ఇటీవల చోటుచేసుకుంటున్నాయి.

ఆగస్టులో కాన్పూర్‌కు చెందిన మహిళ తన కుమార్తెతో స్కూటీపై వెళ్తుండా.. ఓ మైనర్ వేగంగా కారు నడుపుతూ బైక్‌ను ఢీకొట్టింది. దీంతో మహిళ మృతిచెందింది. ఆమె కుమార్తె తీవ్రంగా గాయపడింది. దీనికి ముందు మహారాష్ట్రలోని పుణేలో ఓ రియల్ ఎస్టేట్ వ్యాపారి మైనర్ కొడుకు కారు యాక్సిడెంట్ చేసిన ఘటన దేశవ్యాప్తంగా సంచలనం సృష్టించింది. ఈ కేసు నుంచి కొడుకును బయటపడేయడానికి పోలీసులు, వైద్యులు, చివరకు న్యాయమూర్తిని కూడా డబ్బుతో మేనేజ్ చేశాడు. అయితే, బెయిల్ షరతుల కింద 300 పదాల వ్యాసం రాయాలని, 15 రోజుల ట్రాఫిక్ పోలీసులతో కలిసి పనిచేయాలని జడ్జి ఇచ్చిన ఆదేశాలే కేసు గతిని మార్చి.. మొత్తం వ్యవహారం బయటపడేలా చేసింది.