వాటర్ బాటిల్‌తో పాటు వాటర్ క్యాన్‌ను క్లీన్ చేసే సులువైన చిట్కాలు

ఈ రోజుల్లో చాలా మంది 20 లీటర్ వాటర్ క్యాన్లను ఎక్కువగా వాడుతున్నారు. తాగు నీరు తెచ్చుకోవడానికి వీటిని ఉపయోగిస్తున్నారు. ఇళ్లు మాత్రమే కాదు ఆఫీసుల్లో కూడా వీటి వాడకం బాగా పెరిగింది. ఇక, వాటర్ క్యాన్లకే ఓ ట్యాప్ అమర్చి రోజూ తాగే నీటిని వాడుకుంటున్నారు. అయితే, 20 లీటర్లు లేదా 10 లీటర్ల వాటర్ క్యాన్లను క్రమం తప్పకుండా శుభ్రం చేసుకోవడం చాలా ముఖ్యం.

చాలా మంది ఒకే క్యాన్ నుంచి రెండు లేదా మూడు రోజులు నీరు తాగుతారు. అంతేకాకుండా వీటిని క్లీన్ చేయడంలో అలసత్వం చూపిస్తారు. 2018లో పబ్లిష్ అయిన ఓ స్టడీ ప్రకారం వాటర్ క్యాన్లను సరిగ్గా శుభ్రం చేసుకోకపోతే వాటి లోపల ఆల్గే పేరుకుపోతుంది. అంతేకాకుండా దుర్వాసన కూడా వస్తుంది. వాటర్ బాటిల్స్ పరిస్థితి కూడా ఇదే.

వాటర్ బాటిల్స్ సరిగ్గా క్లీన్ చేయకపోయినా పాచి పడుతుంది, బ్యాక్టీరియా పెరుగుతుంది. అందుకే లోపల పాచి పట్టకుండా, బ్యాక్టీరియా చేరకుండా ఉండటానికి కొన్ని చిట్కాలు పాటించాలి. హెల్త్ లైన్, వెబ్ఎమ్‌డి నివేదికల ప్రకారం వాటర్ క్యాన్లను క్లీన్ చేసేందుకు కొన్ని సులువైన చిట్కాల్ని ఇక్కడ అందించాం.

వాటర్ క్యాన్ లేదా బాటిల్‌లో బ్యాక్టీరియా ఉందని ఎలా గుర్తించాలి?

కంటికి కనిపించే పాచి, మురికి మాత్రమే కాదు కొన్ని సంకేతాల ద్వారా బ్యాక్టీరియాను కూడా గుర్తించవచ్చని క్లీవ్‌ల్యాండ్ క్లినిక్‌లో పబ్లిష్ అయిన నివేదిక చెబుతుంది.

జిగటగా ఉండటం: బాటిల్ లోపల వేలితో తాకినప్పుడు సన్నని జిగట పొర తగిలితే అక్కడ బ్యాక్టీరియా పేరుకుపోతుందని అర్థం.

కంటికి కనిపించే సంకేతాలు: వాటర్ క్యాన్ లేదా బాటిల్‌ లోపల ఆకుపచ్చ, నలుపు లేదా తెలుపు రంగులో చిన్న చిన్న చుక్కలు కనిపిస్తాయి.

దుర్వాసన: బాటిల్ లేదా క్యాన్ వాష్ చేసిన తర్వాత కూడా ఒక రకవైన వాసన వస్తే లోపల ఆల్గే లేదా ఫంగస్ ఉందని అర్థం.

నీరు మసకగా ఉండటం: క్యాన్ లేదా వాటర్ బాటిల్‌లో పోసిన నీరు స్పష్టంగా లేకుండా కొంచెం మసకగా లేదా తెల్లగా కనిపిస్తే అందులో బ్యాక్టీరియా ఉందని అర్థం చేసుకోవచ్చు.

నీటి రుచి మారడం: నీటి రుచిలో మార్పు వస్తుంది. నీటి రుచి వింతగా అనిపిస్తే అలర్ట్ అవ్వండి. వాటర్ క్యాన్ క్లీన్ చేసే చిట్కాలు గురించి తెలుసుకుందాం.

బేకింగ్ సోడా, వెనిగర్

​ఇది క్యాన్ లోపల ఉండే మొండి వాసనను, పాచిని పోగొట్టడానికి బాగా పనిచేస్తుంది.

పద్ధతి: క్యాన్‌లో 2 స్పూన్ల బేకింగ్ సోడా, అర కప్పు వెనిగర్ వేసి.. ఆ తర్వాత కొంచెం గోరువెచ్చని నీరు పోయండి.

క్యాన్ మూత పెట్టి బాగా కలపండి అంటే షేక్ చేయండి. ఒక 15 నిమిషాలు అలాగే ఉంచి. తర్వాత మంచినీటితో 2-3 సార్లు కడిగేయండి.

బియ్యం లేదా కల్లు ఉప్పు 

క్యాన్ లోపలికి చెయ్యి వెళ్లదు. అందుకే లోపల పేరుకుపోయిన మురికిని వదిలించడానికి ఈ సహజమైన మార్గాన్ని ఉపయోగించవచ్చు.

​పద్ధతి: క్యాన్‌లో గుప్పెడు బియ్యం లేదా కల్లు ఉప్పు వేసి, కొద్దిగా నీరు పోయండి.

క్యాన్‌ను అన్ని వైపులా తిప్పుతూ వేగంగా ఊపండి. బియ్యం గింజలు లేదా ఉప్పు రాపిడి వల్ల లోపల ఉన్న పాచి వదిలిపోతుంది.

ఈ చిట్కాలు కూడా పనికొస్తాయి

​క్యాన్ నుంచి ప్లాస్టిక్ వాసన వస్తున్నట్లయితే.. దానిని వదిలించడానికి నిమ్మరసం బాగా పనికొస్తుంది. రెండు నిమ్మకాయల రసాన్ని క్యాన్‌లో వేసి సగం వరకు నీటితో నింపండి. ఒక గంట తర్వాత కడిగేస్తే క్యాన్ తాజాగా మారుతుంది.

కొద్దిగా గిన్నెలు కడిగే లిక్విడ్ వేసి, గోరువెచ్చని నీటితో నింపి బాగా షేక్ చేయండి. మరీ ఎక్కువ సబ్బు వాడకండి. ఎందుకంటే ఆ వాసన త్వరగా పోదు. కడిగిన తర్వాత సబ్బు వాసన రాకుండా జాగ్రత్త పడండి.

వాటిర్ బాటిల్‌ను శుభ్రం చేసే సరైన పద్ధతి

​క్లీవ్‌ల్యాండ్ క్లీనిక్ నివేదిక ప్రకారం వారానికి కనీసం ఒక్కసారైనా బాటిల్‌ను బాగా క్లీన్ చేయాలి.

​భాగాలుగా విడదీయండి: ముందుగా బాటిల్ మూత, మూత లోపం ఉండే రబ్బరు రింగుల్ని వేరు చేయండి. బ్యాక్టీరియా ఎక్కువగా ఈ ఇరుకైన సందుల్లోనే పెరుగుతుంది.

వేడి నీరు, లిక్విడ్ సోప్: లిక్విడ్ సోప్ వేసి, బాటిల్ క్లీనింగ్ బ్రష్ సాయంతో లోపల మూలల వరకు బాగా క్లీన్ చేయండి.

బాగా కడగండి: సబ్బు లేదా వెనిగర్ వాసన పోయే వరకు వేడి నీటితో శుభ్రంగా కడగండి.

తీసుకోవాల్సిన జాగ్రత్తలు

ఎండలో ఉంచండి: క్యాన్ కడిగిన తర్వాత బోర్లించి ఉంచకుండా.. కాసేపు ఎండలో ఉంచితే బ్యాక్టీరియా నశిస్తుంది.

బ్రష్ వాడకం: మార్కెట్లో పొడవైన హ్యాండిల్ ఉన్న బ్రష్‌లు దొరుకుతాయి. వీటితో మూలల్లో ఉన్న మురికిని సులభంగా శుభ్రం చేయవచ్చు.

రెగ్యులర్ క్లీనింగ్: వాటర్ క్యాన్‌లో నీరు నింపే ముందు కనీసం ఒక్కసారైనా మంచి నీటితో శుభ్రం చేయండి. అంతేకాకుండా వారానికి ఒక్కసారి అయినా పైన చెప్పిన పద్ధతుల్లో డీప్ క్లీనింగ్ చేయండి.