శ్రీశైలం మల్లన్న హుండీకి భారీగా ఆదాయం.. 26 రోజుల్లో ఎన్ని కోట్లంటే

శ్రీశైలం మహాక్షేత్రంలో భ్రమరాంబ మల్లికార్జున స్వామివార్లకు మరోసారి భారీగా హుండీ ఆదాయం సమకూరింది. చంద్రావతి కళ్యాణ మండపంలో భక్తులు సమర్పించిన కానుకలను లెక్కించారు. పటిష్టమైన భద్రతా, సీసీ కెమెరాలు, అధికారుల పర్యవేక్షణలో ఈ హుండీ లెక్కింపును నిర్వహించారు. ఈ హుండీ లెక్కింపులో ఆలయ అన్ని విభాగాల అధిపతులు, సిబ్బంది, శివసేవకులు పాల్గొన్నారు. గత 26 రోజుల్లో హుండీల లెక్కింపు ద్వారా రూ.4,14,15,623 ఆదాయం నగదు రూపంలో వచ్చింది. నగదుతో పాటుగా 32.230 తులాల బంగారు, 8.5 కిలోల వెండి వచ్చాయి. అలాగే 739 యూఎస్‌ఏ డాలర్లు, 1020 మెక్సికో పిసో, 1000 ఉగాండా షిల్లింగ్స్, 205 సింగపూర్‌ డాలర్లు, 200 ఘనా సీడిస్‌, 135 ఆస్ట్రేలియా డాలర్లు, 100 కెనడా డాలర్లు,50 యూఏఈ దిర్హమ్స్‌ విదేశీ కరెన్సీ ఆదాయంగా వచ్చింది.

 శ్రీశైలంలో భ్రమరాంబ, మల్లికార్జున స్వామివార్ల స్వర్ణ రథోత్సవం వైభవంగా నిర్వహించారు. మంగళవారం ఆరుద్ర నక్షత్రం కావడంతో వేకువజామున మల్లికార్జునస్వామికి మహాన్యాస పూర్వక ఏకాదశి రుద్రాభిషేకం, అన్నాభిషేకం, విశేష పూజలు నిర్వహించారు. అనంతరం స్వామి, అమ్మవార్ల ఉత్సవమూర్తులను శోభాయమానంగా ముస్తాబు చేసిన స్వర్ణ రథంపై కొలువుదీర్చి అర్చకులు మంగళ హారతులు ఇచ్చి పూజలు చేశారు. ఆలయ ఈవో చంద్రశేఖర్‌ ఆజాద్‌ స్వామివార్లకు కర్పూర హారతులు, నారికేళం సమర్పించారు.. రథం ఎదురుగా భక్తుల శివనామ స్మరణలు మార్మోగాయి. రథం ముందు కళాకారిణులు కోలాట నృత్యాలతో సందడి చేయగా.. ఆలయ నలువైపులా ఉన్న మాడవీధుల్లో స్వామి, అమ్మవార్లు స్వర్ణ రథంపై భక్తులకు దర్శనమిచ్చారు.

శ్రీశైలం దేవస్థానం నూతన ఈవోగా ఎస్‌ఎస్ చంద్రశేఖర్ ఆజాద్ పదవీ బాధ్యతలు స్వీకరించారు. అంతకముందు మల్లిఖార్జున స్వామి సహా అమ్మవార్లను దర్శించుకున్నారు. అనంతరం దేవస్థానానికి కొత్త ఈవోగా పదవీ బాధ్యతలు(Charged) స్వీకరించారు. ఈ కార్యక్రమంలో పలువురు అధికారులు పాల్గొన్నారు. గత నెలలో శ్రీశైలం ఈవోగా ఉన్న పెద్దిరాజును బదిలీ చేయగా.. ఆలయంలో అసిస్టెంట్ కమిషనర్‌గా ఉన్న చంద్రశేఖర్ రెడ్డిని శ్రీశైలం ఆలయానికి ఇంఛార్జ్ ఈవోగా నియమించారు. రాయలసీమ ఆర్జేసీగా ఉన్న చంద్రశేఖర్ ఆజాద్‌ను శ్రీశైలం దేవస్థానానికి పూర్తి స్థాయి ఈవోగా నియమిస్తూ దేవదాయశాఖ గతవారం ఉత్తర్వులు జారీ చేసింది. .