నిద్రవేళలతో పాటు నిద్రించే విధానం కూడా అంతే ముఖ్యం

మనిషి ఆరోగ్యంగా ఉండాలంటే సమతుల్య ఆహారం, మంచి జీవనశైలి, వ్యాయామం ఎంతో ముఖ్యమో మంచి నిద్ర కూడా అంతే అవసరం. రోజంతా అలసిపోయిన తర్వాత ఎవరికైనా అత్యంత అవసరమైనది ప్రశాంతమైన, గాఢమైన నిద్ర. ఆరోగ్య నిపుణులు కూడా నిద్ర ఎంత ముఖ్యమో తరుచుగా చెబుతున్న సంగతి తెలిసిందే. అయితే, ఈ రోజుల్లో చాలా మంది నిద్రపై కేర్ తీసుకోవడం లేదు. దీంతో నిద్రలేమి సమస్యలతో బాధపడుతున్నారు. నిద్రవేళలతో పాటు నిద్రించే విధానం కూడా అంతే ముఖ్యం. మీరు కొంచెం ఆశ్చర్యపోవచ్చు.. పడుకునే మంచం చుట్టూ కొన్ని వస్తువులు ఉండకూడదు. ఇవి మిమ్మల్ని రిస్క్‌లో పడేయవచ్చు. అంతేకాకుండా మీ ఆరోగ్యాన్ని కూడా ప్రభావితం చేయవచ్చు. పడుకునేటప్పుడు మంచంపై లేదా మంచం పక్కన ఉండకూడని వస్తువులేంటో ఇక్కడ తెలుసుకుందాం.​ఈ రోజుల్లో చాలా మందికి స్మార్ట్ ఫోన్లు, ల్యాప్ టాప్స్, టాబ్లెట్లు లేదా ఇతర ఎలక్ట్రానిక్ పరికరాలు జీవితంలో చాలా ముఖ్యమైన భాగంగా మారాయి. చాలా మంది వాటిని దూరం పెట్టాలంటే ఏదో కోల్పోయినట్టు ఫీల్ అవుతారు. కొన్ని నిమిషాల పాటు కూడా వాటిని దూరం పెట్టరు. ముఖ్యం ఫోన్లు. అయితే, ఇలాంటి ఎలక్ట్రానిక్ పరికరాల్ని నిద్రించే సమయంలో బెడ్‌పై, బెడ్ పక్కన పెట్టుకోకూడదంటున్నారు నిపుణులు. ఈ ఎలక్ట్రానిక్ గ్యాడ్జెట్స్ బ్లూ లైట్, విద్యుదయస్కాంత తరంగాలను విడుదల చేస్తాయి. ఇవి మీ నిద్రను ప్రభావితం చేస్తాయి. అంతేకాకుండా ఆరోగ్యానికి హానికరం. అదే విధంగా ఇవి పేలే ప్రమాదం కూడా ఉంది. అందుకే వీటిని దూరంగా పెట్టి నిద్రపోండి

ఈ రోజుల్లో చాలా మంది ఆఫీస్ వర్క్ లేదా పని ఒత్తిడితో బాధపడుతున్నారు. ఇంటి దగ్గర కూడా పనికే ప్రాధాన్యత ఇస్తున్నారు కొందరు. ఇలా ఆఫీసులో రోజంతా పనిచేసి అలసిపోయి పడుకునేటప్పుడు పనిని మర్చిపోయి నిద్రపోవాలి. అయితే, మంచం చుట్టూ ఆఫీస్‌ వర్క్ లేదా ఆఫీసుకి సంబంధించిన వస్తువులు ఉంటే అవి మిమ్మల్ని డిస్టర్బ్ చేస్తాయి. మీకు నిద్ర కూడా సరిగ్గా పట్టదు. నిజానికి దీని వెనుక ఒక స్వచ్చమైన మానసిక కారణం ఉంది. మీ చుట్టూ పనికి సంబంధించిన విషయాలు ఉన్నప్పుడు, ఎప్పుడైనా సరే పని వైపు దృష్టి మళ్లుతుంది. దీంతో ఒత్తిడి, నిద్రలేమి వంటి సమస్యలతో బాధపడాల్సి వస్తుంది

​మంచి నిద్ర కోసం ప్రశాంత వాతావరణంతో పరిశుభ్రత కూడా సమానంగా ఉండాలి. అందుకే నిద్రపోయే ముందు మంచం సిద్ధం చేయడానికి కేవలం ఐదు నిమిషాలు కేటాయించండి. మంచం మీద చెల్లాచెదురుగా ఉన్న వస్తువులు, చిన్న చిన్న వస్తువులు, మురికి బట్టలు, మెడిసిన్ వంటి వాటిని దూరంగా ఉంచండి. వీటి వల్ల హాయిగా నిద్రపడుతుంది. లేదంటే చిన్న చిన్న వస్తువులు మీకు గుచ్చుకుని నిద్రకు భంగం కలిగించవచ్చు. అంతేకాకుండా ఆహార పదార్థాలు బెడ్ మీద లేకుండా చూసుకోండి. లేదంటే చీమలు, బొద్దింకలు వాటి కోసం వచ్చి మీ నిద్రను భంగం చేసే అవకాశం ఉంది.

ఈ రోజుల్లో పిల్లలు మాత్రమే కాదు కొందరు పెద్దలు కూడా పెద్ద టెడ్డీ బేర్ లేదా మృదువైన బొమ్మలతో పక్కన పెట్టుకుని నిద్రపోతున్నారు. అయితే, ఈ అలవాటు మీ ఆరోగ్యంపై ప్రతికూల ప్రభావాన్ని చూపే అవకాశం ఉంది. నిజానికి రోజులు గడిచే కొద్ది బొమ్మలపై దుమ్ము, తేమ కారణంగా బ్యాక్టీరియా, జెర్మ్స్ వంటివి పేరుకుపోతాయి. ఇది ఆరోగ్యానికి హానికరం. లేదు ఇవి లేకపోతే నిద్రపట్టదు అనుకుంటే వాటిని తరుచుగా శుభ్రం చేసుకోండి.

* చాలా మంది తెలిసో తెలియక పదునైన వస్తువుల్ని పక్కన పెట్టి నిద్రిస్తారు. నిద్రలో తెలియకుండా వీటి మీద పడితే మీకు హాని జరిగే ప్రమాదముంది. అందుకే వీటిని దూరం పెట్టండి.

* జెట్ కాయిల్స్, ఫైర్‌కి సంబంధించిన వస్తువుల్ని కూడా దూరంగా ఉంచండి. వీటి వల్ల అగ్ని ప్రమాదాలు జరిగే అవకాశం ఉంది.

* శ్వాసకోస సమస్యలతో బాధపడేవారు జెట్ కాయిల్స్ వెలిగించడం, దోమల కోసం పొగపెట్టడం లాంటి పనులు చేయకండి. ఇవి, ఊపిరాడకుండా చేసే ప్రమాదముంది.