ఆ అలవాట్లు, లక్షణాలు మూర్ఖులు లేదా తెలివితక్కువ వారికే ఉంటాయి

ఏ వ్యక్తికి అయినా సరే కొన్ని అలవాట్లు, లక్షణాలు ఉంటాయి. ఈ అలవాట్లు, లక్షణాలతో ఆ వ్యక్తి ఎలాంటి వారో కనిపెట్టవచ్చు. మంచి అలవాట్లు ఉంటే ఆ వ్యక్తిని సమాజంలో అందరూ ఇష్టపడతారు. కానీ, కొన్ని లక్షణాలు, అలవాట్లు ఉన్నవారిని చూడటానికి కూడా ఎవరూ ఇష్టపడరు. అలాంటి వారిని మూర్ఖులు లేదా తెలివితక్కువ వారితో పోలుస్తారు. మూర్ఖులు వింతగా ప్రవర్తిస్తుంటారు. ప్రతి బ్యాచులో కూడా ఒక్కరైనా సరే ఇలాంటివారు ఉంటారు. ఇలాంటి వారు బ్యాచులో ఉంటే నష్టం తప్ప లాభమేమీ ఉండదు. వీరి వల్ల మిగతావారికి కూడా సమస్యలు వచ్చి పడతాయి. అందుకే మూర్ఖుల్ని లేదా తెలివి తక్కువవారిని సకాలంలో గుర్తించి దూరం పెట్టాలి. మూర్ఖులకు ఉండే కొన్ని లక్షణాలు, అలవాట్లు గురించి ఇక్కడ తెలుసుకుందాం.

అంతా తనకే తెలుసు అనుకోవడం

​మూర్ఖుడి అతి పెద్ద లక్షణం ఏంటంటే తనను తాను అత్యంత తెలివైనవాడిగా భావిస్తాడు. అంతా తనకే తెలుసున్న భ్రమలో ఉంటాడు. అన్నీ ఉన్నా ఆకు అణిగిమణిగి ఉంటుంది. ఏమి లేని ఆకు ఎగిరి ఎగిరి పడుతూ ఉంటుందన్న సామెత మనం వినే ఉంటాం. ఈ సామెత నిజం. తెలివైన వారు ప్రశాంతంగా ఉంటే.. మూర్ఖులు మాత్రం అన్నీ తమకే తెలుసని ఎగిరి పడుతుంటారు. మూర్ఖులు తమ జ్ఞానం గురించి ఎక్కువగా గొప్పులు చెప్పుకుంటారు. ఇలాంటి వారు ఎల్లప్పూడూ పనికిరాని సలహాలు ఇవ్వడానికి సిద్ధంగా ఉంటారు. వీరి సలహాలు పాటిస్తే బొక్కబొర్లాపడటం ఖాయం. అందుకే వీరిని ఎవరూ పట్టించుకోరు.

సహనం లేకపోవడం

మూర్ఖుడి మరో లక్షణం సహనం లేకపోవడం. తెలివైన వ్యక్తులు ఏ పరిస్థితిలోనైనా సరే ప్రశాంతంగా ఉంటారు. ప్రశాంతంగా ఎలా ఉండాలో వారికి తెలుసు. అయితే, మూర్ఖుడు ప్రతి చిన్న విషయానికి కూడా సహనం కోల్పోతాడు. చిన్న మాటలకే చికాకు పడతాడు. మూర్ఖుడుకి కోపం ఎక్కువగా ఉంటుంది. చిన్న చిన్న విషయాలకే కోపం, ఎదుటివారితో వితండవాదం చేయడం, ఎదుటి వారిని దుర్భాషలాడటం లాంటి అలవాట్లు మూర్ఖులకు ఉంటాయి.

ఎప్పుడూ తనను తాను ప్రశంసించుకునే వ్యక్తి

మూర్ఖుడి ప్రత్యేక లక్షణం ఏమిటంటే, ఎప్పుడూ తనను తాను ప్రశంసించుకుంటాడు. అలాంటి వారికి ఇతరుల ప్రశంసలు నచ్చవు. మూర్ఖులు ఎప్పుడూ తమను తాము పొగుడుకోవడానికి ఇష్టపడతారు. లేనిపోని బడాయి మాటలు, కబుర్లు చెబుతుంటారు. అలాంటి వారికి అహంకారం అంటే గర్వం ఉంటుంది. అలాంటి వ్యక్తులు ఇతరుల విజయాలను గుర్తించరు. ఎదుటివారి విజయాలకు కూడా తమను తాము ప్రశంసించుకుంటారు. దీంతో ఇతరులకు వీరిపై గౌరవం తగ్గిపోతుంది.

ఆలోచించకుండా ప్రతి పని చేయడం

మూర్ఖులు మరో లక్షణం ఇదే. ఆలోచించకుండా ఏ పని పడితే ఆ పని చేస్తుంటారు. సరిగ్గా ఆలోచించకుండానే ప్రతి పని తమకే తెలుసు అన్న భ్రమలో ఉంటారు. దీంతో, వారు తరచుగా ఇబ్బందులు, నష్టాలు ఎదుర్కొంటారు. మూర్ఖుల లక్షణం ఏంటంటే వారు ఎల్లప్పుడూ ఏ నిర్ణయాన్నైనా సరే తొందరపడే తీసుకుంటారు. దీని వల్ల చాలా సార్లు ఇబ్బందుల్లో పడతారు. అంతేకాకుండా కుటుంబాన్ని, స్నేహితులకు కూడా సమస్యలు సృష్టిస్తారు.

ఇతరులను అవమానిస్తారు

తెలివితేటలు తక్కువగా ఉన్నవారు తమను తాము ఉన్నతంగా భావిస్తారు. ఈ భావన వారికి ఎక్కువగా ఉంటుంది. దీంతో ఇతరుల్ని తక్కువ చూపు చూస్తారు. అంతేకాకుండా ఇతరుల్ని అవమానిస్తారు. మూర్ఖులు ఎల్లప్పుడూ అభద్రతతో ఉంటారు. దీన్ని దాచడానికి ఎల్లప్పుడూ ఇతరుల్ని కించపరుస్తూ ఉంటారు. తమ గురించి బడాయి కబుర్లు చెప్పుకుంటారు. ఈ ప్రవర్తన కారణంగా ఇలాంటి వాళ్లు దగ్గరి బంధువులు కూడా దూరమవుతారు. ఇలాంటి లక్షణాలు ఉన్నవారు మీ గ్రూపులో లేదా బంధువుల్లో ఉంటే జాగ్రత్తగా ఉండాలని నిపుణులు చెబుతున్నారు.