బీట్‌రూట్‌తో మచ్చల్లేని అందమైన ముఖం ,,,, ఎలా వాడాలో తెలుసా

ప్రతి ఒక్కరు అందంగా ఉండాలని కోరుకుంటారు. ప్రతి ఒక్కరూ మెరిసే చర్మం, గ్లాసీ స్కిన్ కావాలని కోరుకుంటారు. అమ్మాయిలైతే మచ్చలేని, మెరిసే చర్మం కోసం తాపత్రయ పడుతుంటారు. ఇక, అందమైన ముఖం కోసం చాలా ఖర్చు చేస్తుంటాం. మార్కెట్లో దొరికే ఖరీదైన ప్రొడక్ట్స్ వాడుతుంటాం. అయినా, ఫలితం ఉండకపోవచ్చు. దీంతో చాలా మంది ఇంత ఖర్చు చేసినా ఫలితం లేదని బాధపడుతుంటారు. అయితే, బీట్‌రూట్‌తో అందాన్ని పెంచుకోవచ్చని నిపుణులు అంటున్నారు. మచ్చ లేని అందమైన ముఖం కోసం బీట్‌రూట్‌ని ఎలా ఉపయోగించాలో తెలుసుకుందాం.

చర్మానికి బీట్‌రూట్ చేసే మేలు

​బీట్‌రూట్‌లో పోషకాలు మెండుగా ఉంటాయి. ఇందులో నైట్రేట్ మాత్రమే కాకుండా విటమిన్లు, మినరల్స్ కూడా లభిస్తాయి. రక్తహీనత సమస్యతో బాధపడేవారికి బీట్‌రూట్ బెస్ట్ ఆప్షన్. బీట్‌రూట్ తింటే హిమోగ్లోబిన్ లెవల్స్ పెరుగుతాయి. ఇది రక్తహీనత సమస్య లేకుండా చూస్తుంది. క్యాన్సర్‌తో పోరాడే లక్షణాలు బీట్‌రూట్‌లో ఉన్నాయి. ఇలా ఆరోగ్యానికి మేలు చేసే బీట్‌రూట్ వల్ల అందం కూడా రెట్టింపు అవుతుంది. బీట్‌రూట్‌లో యాంటీ ఆక్సిడెంట్లు పుష్కలంగా ఉంటాయి. ఇవి చర్మ కణాల్ని మరమ్మత్తు చేస్తాయి. సూర్మరశ్మి, కాలుష్యం వచ్చే సమస్యల్ని నివారిస్తాయి. బీట్‌రూట్ తినడం వల్ల చర్మం తాజాగా కనిపిస్తుంది. బీట్‌రూట్ పెదవులపై హైపర్‌పిగ్మెంటేషన్‌ను తొలగించి వాటిని సహజంగా గులాబీ రంగులోకి మారుస్తుంది.

బీట్‌రూట్‌ను ఎలా ఉపయోగించాలి

చర్మ సంరక్షణ కోసం బీట్‌రూట్‌ను ఉపయోగించడానికి బెస్ట్ ఆప్షన్ పొడిలా తయారు చేసి నిల్వ చేయడం. పొడి చేయడానికి, బీట్‌రూట్ తొక్క తీసి శుభ్రం చేయండి. దానిని సన్నని గుండ్రని ముక్కలుగా కట్ చేసి ఎండలో ఆరబెట్టండి. అది పూర్తిగా ఆరిపోయి గట్టిగా మారినప్పుడు దాని పొడిలా చేయండి. దీన్ని రిఫ్రిజిరేటర్‌లో ఒక నెల వరకు నిల్వ చేయవచ్చు. ఫేస్ ప్యాక్, ఫేస్ స్క్రబ్, లిప్ స్క్రబ్, ఫేస్ మాస్క్ వంటి ఏదైనా చర్మ సంరక్షణ దినచర్యలో దీన్ని భాగం చేసుకోవచ్చు.

బీట్‌రూట్ పొడిని ఎలా వాడాలంటే

2 టేబుల్ స్పూన్ల బీట్‌రూట్ పొడి, 2 టేబుల్ స్పూన్ల శనగపిండి, ½ టేబుల్ స్పూన్ పెరుగు కలిపి ఫేస్ ప్యాక్ సిద్ధం చేసుకోండి. దీన్ని ముఖానికి అప్లై చేసి 10 నిమిషాలు అలాగే ఉంచండి. సర్కులర్ మోషన్‌లో మసాజ్ చేస్తూ ప్యాక్‌ను తొలగించండి. ఆ తర్వాత శుభ్రమైన నీటితో ఫేస్‌ను వాష్ చేసుకోండి. ఈ ప్యాక్‌ను వారానికి ఒకసారి అప్లై చేయండి. ముఖం మీద మెరుపు కనిపించడం ప్రారంభమవుతుంది.

తేనెతో బీట్‌రూట్ పొడి

2 టేబుల్ స్పూన్ల బీట్‌రూట్ పొడిలో 2 టేబుల్ స్పూన్ల తేనె కలపండి . ఈ మిశ్రమంలో ఒక కాటన్ బాల్ ముంచి ముఖం, మెడపై అప్లై చేయండి. 15 నుంచి 20 నిమిషాలు అలాగే ఉంచండి. ఆ తర్వాత గోరువెచ్చని నీటితో శుభ్రం చేసుకోండి. బీట్‌రూట్‌లో ఉండే యాంటీఆక్సిడెంట్లు చర్మం యొక్క కొల్లాజెన్ స్థాయిని పెంచుతాయి. ఇది చర్మం యొక్క స్థితిస్థాపకతను మెరుగుపరుస్తుంది. చర్మాన్ని మృదువుగా, మెరిసేలా చేస్తుంది.​

నారింజ తొక్కల పొడి

1 టేబుల్ స్పూన్ బీట్‌రూట్ పొడి, 1 టేబుల్ స్పూన్ నారింజ తొక్కల పొడిని నీటితో కలిపి పేస్ట్ తయారు చేయండి. ఈ మిశ్రమాన్ని ముఖానికి బాగా అప్లై చేయండి. ఐరన్, విటమిన్ సి అధికంగా ఉండే బీట్‌రూట్ హైపర్‌పిగ్మెంటేషన్‌ను తొలగిస్తుంది. విటమిన్ సి అధికంగా ఉండే నారింజ తొక్క, నల్లటి మచ్చలను కాంతివంతం చేస్తుంది, చర్మానికి తక్షణ మెరుపును ఇస్తుంది.