సునీతా విలియమ్స్‌ను నేను అందుకే కలవలేదు..: ట్రంప్

9 నెలల పాటు అంతరిక్షంలోనే చిక్కకుకున్న వ్యోమగాములు సునీతా విలియమ్స్, బుల్ విల్‌మోర్‌లు ఎట్టకేలకు తిరిగి భూమ్మీదకు వచ్చారు. సుదీర్ఘ కాలం పాటు అక్కడే ఉన్న వీరు బుధవారం రోజు తెల్లవారు జామున 3.27 గంటలకు అమెరికాలోని ఫ్లోరిడా తీరంలో క్షేమంగా ల్యాండ్ అయ్యారు. వ్యోమగాములు సురిక్షితంగా భూమి మీదకు రావడంతో.. ప్రపంచం అంతా ఊపిరి పీల్చుకుంది. అయితే వీరి రాక కోసం ఎంతగానే కృషి చేసిన అమెరికా అధ్యక్షుడు డొనాల్డ్ ట్రంప్ అయితే దీనిపై ఇప్పటి వరకు స్పందించలేదు.

ముఖ్యంగా వ్యోమగాములు సునీతా విలియమ్స్, బుల్ విల్‌మోర్‌లను కనీసం కలవలేదు. శ్వేత సౌధానికి కూడా ఆహ్వానించ లేదు. అయితే దీనిపై ఆయనకు మీడియా ప్రతినిధి నుంచి ప్రశ్న ఎదురు కాగా.. షాకింగ్ సమాధానం చెప్పారు. తాను వారిని కలవకపోవడానికి, వైట్‌హౌస్‌కు రమ్మని పిలవక పోవడానికి ఓ కారణం ఉందని చెప్పుకొచ్చారు. మరి ఆ కారణం ఏంటో మనం ఇప్పుడు తెలుసుకుందాం.

సునీతా విలియమ్స్, బుల్ విల్‌మోర్‌లు ఇంతకాలంగా అంతరిక్షంలో ఉన్నారని.. అక్కడ మానవ శారీరక స్థితిలో చాలా మార్పులు చోటు చేసుకుంటాయని ట్రంప్ చెప్పారు. శరీరం తేలికగా కదులుతుందని.. మారుతుందని వివరించారు. అలాగే గురుత్వాకర్షణ శక్తి ఉండదని.. ఆ పరిస్థితుల నుంచి వ్యోమగాములు సునీతా విలియమ్స్, బుల్ విల్‌మోర్‌లు భూమికి చేరుకున్నారని చెప్పారు. ఇక్కడి వాతావరణానికి మళ్లీ వారు అలవాటు పడడం అంత సులభం కాదని చెబుతూనే.. వారికి కాస్త సమయం ఇవ్వాలని భావించినట్లు చెప్పారు.

అప్పుడే వారిద్దరినీ ఓవల్ ఆఫీసుకు ఆహ్వానిస్తా..!

వారికి వైద్య సేవలు చాలా ఉపయోగం అని భావించడం వల్లే తాను ఈరోజు వెళ్లి వారిని కలవలేదని డొనాల్ట్ ట్రంప్ వ్యాఖ్యానించారు. అంతేకాకుండా శ్వేత సౌధానికి ఆహ్వానించాలనే ఉద్దేశం ఉన్నప్పటికీ.. దీన్ని మనసులో పెట్టుకునే పిలవలేదన్నారు. కానీ భవిష్యత్తులో కచ్చితంగా ఆహ్వానిస్తానని.. అయితే అందుకు ఇంకా చాలా సయమం ఉందని చెప్పారు. వ్యోమగాముల ఇద్దరి పరిస్థితి పూర్తిగా మెరుగు పడిన తర్వాత ఓవల్ ఆఫీసుకు పిలుస్తానని చెప్పారు.

మరోవైపు తాజాగా శ్వేతసౌధం.. వ్యోమగాములు తిరిగి సురక్షితంగా భూమిని చేరుకోవడంపై సోషల్ మీడియా వేదికగా స్పందించింది. హామీ ఇచ్చారు.. నిలబెట్టుకున్నారని రాసుకొచ్చింది. 9 నెలల పాటు అంతరిక్షంలో చిక్కుకుపోయిన వ్యోమగాములను ట్రంప్ సురక్షితంగా కిందకు తీసుకొచ్చారని వివరించింది. అలాగే ఇందుకోసం సహకరించిన ఎలాన్ మస్క్, స్పేస్ ఎక్స్, నాసాకు కృతజ్ఞతలు తెలిపింది.