భారీగా పతనమైన చికెన్ ధరలు

మాంసం ప్రియులకు సండే ఒక పండగలా ఉంటుంది. ఎవరి ఇంట్లో చూసినా.. చికెన్, మటన్, చేపలు లేనిదే ముద్ద దిగదు. అలా నాన్ వెజ్‌కు ప్రత్యేకమైన రోజు ఏదైనా ఉంది అంటే.. అది ఆదివారమే అని చెప్పుకోవాలి. కానీ నేడు శ్రీరామనవమి కావడంతో.. చికెన్, మటన్ షాపుల వద్ద క్యూ లైన్లు, కిటకిటలాడే గిరాకీ కనిపించడం లేదు. ఏపీ రాష్ట్ర వ్యాప్తంగా కూడా ఇదే ధోరణి కనపడుతోంది. ఎప్పుడూ జనసద్రంగా మారే మార్కెట్లు పూర్తిగా నిర్మానుష్యంగా కనిపిస్తున్నాయి. ఇదే సీన్ గత వారం ఉగాది రోజు కూడా కనిపించింది.

దీంతో బ్యాక్ టు బ్యాక్ పండుగల నేపథ్యంలో అమ్మకాలు పూర్తిగా తగ్గిపోయాయని చికెన్ షాపు యజమానులు చెబుతున్నారు. దీనికి తోడు బర్డ్ ఫ్లూ భయం వెంటాడుతుండంతో రేట్లు భారీగా తగ్గిపోయాయి. ప్రస్తుతం ఏపీలో బర్డ్‌ఫ్లూ కలకలం కొనసాగుతూనే ఉంది. రాష్ట్రంలో ఈ వైరస్ వ్యాప్తి చెందుతుండటంతో చికెన్ వినియోగదారులు తీవ్ర భయాందోళనలకు గురవుతున్నారు. ఇటీవల గుంటూరు జిల్లా నరసరావుపేటకు చెందిన రెండేళ్ల చిన్నారి బర్డ్‌ఫ్లూతో మరణించడం దేశవ్యాప్తంగా విషాదాన్ని నింపింది. ఈ ఘటన ప్రజల్లో మరింత ఆందోళనను పెంచింది. బర్డ్‌ఫ్లూ కారణంగా రాష్ట్రంలో తొలి మరణం నమోదు కావడంతో ప్రజలు చికెన్ తినాలంటేనే వెనకడుగు వేస్తున్నారు.

ఈ పరిణామాల నేపథ్యంలో రాష్ట్రంలో చికెన్ ధరలు భారీగా పతనమయ్యాయి. డిమాండ్ లేకపోవడంతో వ్యాపారులు తక్కువ ధరలకే విక్రయించాల్సి వస్తోంది. మరోవైపు.. ఈరోజు శ్రీరామనవమి కావడంతో చాలా మంది మాంసాహారులైనప్పటికీ ఉపవాసం ఉంటున్నారు. ఇది కూడా చికెన్ అమ్మకాలు తగ్గడానికి ఒక కారణంగా వ్యాపారులు చెబుతున్నారు.

విజయవాడలో కేజీ రూ.310 నుంచి రూ.270 కి తగ్గింది. అంటే దాదాపు 40 రూపాయల వరకు తగ్గింది. మరికొన్ని ప్రాంతాల్లో కేజీ చికెన్ ధర రూ.70 వరకు తగ్గింది. అంతే కాకుండా రాష్ట్రవ్యాప్తంగా కూడా చికెన్ ధరలు బాగా తగ్గిపోయినట్లు చికెన్ వ్యాపారస్తులే చెబుతున్నారు. ఇక తెలంగాణలో కూడా ఇదే పరిస్థితి నెలకొంది. హైదరాబాద్‌లో గత వారం స్కిన్ లెస్ చికెన్ కేజీ రూ.280 ఉండగా నేడు రూ.230 కి తగ్గింది.