పోలీస్ స్టేషన్‌లో చెప్పుతో కొట్టా.. కానీ,,,,పోలీసులను బెదిరించాననే వార్తల్లో నిజం లేదు... అనంతలక్ష్మి క్లారిటీ

6

శాఖ: 

Authored byవంకం వెంకటరమణ | Samayam Telugu | Updated: 9 Apr 2025, 5:26 pm

Subscribe

విశాఖపట్నం తెలుగు మహిళా అధ్యక్షురాలు అనంతలక్ష్మి ఇటీవల వార్తల్లో నిలిచిన సంగతి తెలిసిందే. పోలీస్ స్టేషన్‍లో ఓ వ్యక్తిని చెప్పుతో కొట్టిన వ్యవహారంపై విశాఖపట్నం తెలుగు మహిళా విభాగం అధ్యక్షురాలు అనంతలక్ష్మి క్లారిటీ ఇచ్చారు. మార్చి రెండో తేదీన ఈ ఘటన జరిగితే.. 35 రోజుల తర్వాత సీసీటీవీ ఫుటేజీ విడుదల చేశారని తెలిపారు. పోలీసులు తన పట్ల కక్షపూరితంగా వ్యవహరిస్తున్నారని ఆరోపించారు. కొత్తూరు నరేంద్రకు తాను 25 లక్షలు ఇచ్చానని.. అయితే తనను నరేంద్ర మోసం చేశారన్నారు. తనతో పాటు మరికొందరిని కూడా నరేంద్ర మోసం చేసినట్లు చెప్పారు. డబ్బులు తీసుకుని మోసం చేసిన నరేంద్ర పోలీస్ స్టేషన్‌లో కనిపించేసరికి ఆవేశంలో కొట్టినట్లు అనంతలక్ష్మి తెలిపారు. ఈ ఘటన తన వ్యక్తిగత అంశమని.. పార్టీకి దీనితో సంబంధం లేదని క్లారిటీ ఇచ్చారు.

కొత్తూరు నరేంద్ర వలన మోసపోయిన మహిళలు పోలీసులకు ఫిర్యాదు చేస్తే.. పోలీసులు అతన్ని తీసుకొచ్చారని తెలిసి స్టేషన్ వద్దకు వెళ్లినట్లు అనంతలక్ష్మి తెలిపారు. ఆ రోజు అతన్ని చూడగానే సహనం కోల్పోయి కొట్టానని, తప్పేనని అంగీకరించారు. అయితే తాను కొట్టిన సీసీ ఫుటేజీ విడుదల చేసిన వారు.. సీఐను ట్రాన్స్‌ఫర్ చేయిస్తానంటూ బెదిరించాననే దానిపై ఎందుకు వివరాలను బయటపెట్టడం లేదని ప్రశ్నించారు. సీఐను ట్రాన్స్‌ఫర్ చేయిస్తానంటూ బెదిరించాననడం పూర్తిగా అబద్ధమని అనంతలక్ష్మి మీడియా సమావేశంలో తెలిపారు.

మరోవైపు పోలీస్ స్టేషన్‌లోనే ఓ వ్యక్తిని చెప్పుతో కొట్టారంటూ విశాఖపట్నం తెలుగు మహిళా విభాగం అధ్యక్షురాలిగా ఉన్న సర్వసిద్ది అనంతలక్ష్మిపై గాజువాక పోలీస్ స్టేషన్‌లో కేసు నమోదైంది. ఈ వ్యవహారం ఇటీవల రాష్ట్రవ్యాప్తంగా చర్చనీయాంశమైంది. అయితే పోలీసులను కూడా అనంతలక్ష్మి బెదిరించారంటూ వార్తలు రాగా.. ఆమె క్లారిటీ ఇచ్చారు. కొట్టిన మాట వాస్తవమేనని కానీ.. పోలీసులను బెదిరించాననడంలో నిజం లేదని క్లారిటీ ఇచ్చారు. తనపై ఆరోపణలు చేస్తున్న వారు.. ఇందుకు ఆధారాలు ఉంటే బయటపెట్టాలని ఛాలెంజ్ చేశారు. తాను బెదిరించినట్లుగా ఫోన్ కాల్, లేదా సీసీ ఫుటేజీ వంటి ఆధారాలు ఏమైనా ఉన్నాయా అంటూ నిలదీశారు. ఆధారాలు లేకుండా ఆరోపణలు చేయడం సరికాదని మండిపడ్డారు.