తిరుమల శ్రీవారికి వైజాగ్ భక్తుడి భారీ విరాళం

తిరుమల శ్రీవారి ఆలయానికి మరో భారీ విరాళం అందింది. వైజాగ్‌కు చెందిన భక్తుడు టీటీడీకి కోటి రూపాయలు విరాళంగా అందించారు. వైజాగ్‌కు చెందిన మైత్రి ఇన్‌ఫ్రాస్ట్రక్చర్ అండ్ మైనింగ్ ప్రైవేట్ లిమిటెడ్ సంస్థ చైర్మన్ శ్రీనివాసరావు.. శ్రీవేంకటేశ్వర అన్న ప్రసాదం ట్రస్టుకు రూ. కోటి విరాళంగా అందించారు. శనివారం తిరుమల టీటీడీ ఛైర్మన్ కార్యాలయంలో ఛైర్మన్ బీఆర్ నాయుడును కలిసి విరాళానికి సంబంధించిన డీడీని శ్రీనివాసరావు అందించారు. ఈ సందర్భంగా దాతను టీటీడీ ఛైర్మన్ బీఆర్ నాయుడు అభినందించారు.

మరోవైపు తిరుమలలో తుంబురు తీర్థ ముక్కోటి ఘనంగా జరిగింది. శేషాచల అడవుల్లోని తుంబురు తీర్థ ముక్కోటిలో 14,500 మందికి పైగా భక్తులు పాల్గొన్నట్లు టీటీడీ తెలిపింది. ఏప్రిల్ 11న సుమారు 3,500 మంది, ఏప్రిల్ 12న 11వేల మంది భక్తులు తుంబురు తీర్థంలో పుణ్యస్నానం ఆచరించినట్లు టీటీడీ తెలిపింది. తుంబురు తీర్థ ముక్కోటి కోసం టీటీడీ పెద్దఎత్తున ఏర్పాట్లు చేసింది. తుంబురు తీర్థానికి వెళ్లే భక్తుల కోసం ఏప్రిల్ 11వ తేదీ ఉదయం 5 గంట‌ల నుంచి అన్న ప్రసాదాలు, మజ్జిగ, తాగునీరు పంపిణీ చేశారు.

భక్తులు భోజనం చేసేందుకు అవసరమైన షెడ్లు ఏర్పాటు చేశారు. అలాగే తుంబురు తీర్థానికి చేరుకునేందుకు నిచ్చెనలు, తాగునీటి కుళాయిలు ఏర్పాటు చేశారు. ఆస్తమా, స్థూలకాయం, గుండె సంబంధిత వ్యాధులు వంటి దీర్ఘకాలిక సమస్యలతో బాధపడే వారిని అనుమతించలేదు. తుంబురు తీర్థానికి అటవీ మార్గంలో వెళ్ళే సమయంలో తీసుకోవాల్సిన జాగ్రత్తలపై భక్తులకు అవగాహన కల్పించారు. అత్యవసర పరిస్థితుల్లో భక్తులకు సేవలందించేందుకు అంబులెన్స్‌లు, పారామెడికల్‌ సిబ్బందిని అందుబాటులో ఉంచారు.

తిరుమల శ్రీవారి సాలకట్ల వసంతోత్సవాలు ఘనంగా ముగిశాయి. ఆల‌యం వెనుక వైపున ఉన్న వసంతోత్సవ మండపంలో మూడు రోజులు వసంతోత్సవాలు నిర్వహించారు. వసంతోత్సవాల సందర్భంగా పలు ఆర్జిత సేవలను టీటీడీ రద్దు చేసింది. అలాగే ప్రతినెలా పౌర్ణమి రోజున తిరుమలలో నిర్వహించే గరుడుసేవను వార్షిక వసంతోత్సవాల కారణంగా టీటీడీ రద్దు చేసింది.