ఎందుకు అరెస్ట్ చేస్తున్నారో చెప్పకపోతే బెయిల్ ఇవ్వొచ్చు..: అలహాబాద్ హైకోర్టు

ఏ కేసులో అయినా సరే ఓ వ్యక్తిని అదుపులోకి తీసుకునేటప్పుడు పోలీసులు.. సదరు వ్యక్తికి ఎందుకు అరెస్ట్ చేస్తున్నామనే కారణాన్ని కచ్చితంగా తెలియజేయాలని లేకపోతే వారికి బెయిల్ ఇవ్వొచ్చని అలహాబాద్ హైకోర్టు స్పష్టం చేసింది. రాజ్యాంగంలోని ఆర్టికల్ 22(1) ప్రకారం అరెస్టుకు కారణాన్ని తెలియజేయడం తప్పనిసరి అని పేర్కొంది. ఓ కేసులో అరెస్ట్ అయి చాలా రోజులుగా జైల్లోనే ఉన్న వ్యక్తికి బెయిల్ కూడా మంజూరు చేసింది. అసలు ఈ కేసులో పోలీసులు నిందితుడికి అరెస్టుకు కారణాలు చెప్పకుండా అదుపులోకి తీసుకున్నారు, ఆ తర్వాత ఏం జరిగిందో మనం ఇప్పుడు తెలుసుకుందాం.

2024 ఫిబ్రవరి 15వ తేదీన ఉత్తర ప్రదేశ్‌కు చెందిన మంజీత్ సింగ్‌పై మోసం, బెదిరింపు, శాంతికి భంగం కల్గించాడనే పలు సెక్షన్ల కింద కేసులు నమోదు అయ్యాయి. అయితే పోలీసులు అతడిని వెంటనే అరెస్ట్ చేశారు. ఈక్రమంలోనే అతడు ఎన్ని సార్లు పోలీసులను ఎందుకు అరెస్ట్ చేస్తున్నారో చెప్పమని కోరినా చెప్పలేదు. అయితే 2024 డిసెంబర్ 26వ తేదీన మంజీస్ సింగ్‌ను రాంపూర్ కోర్టుకు తీసుకెళ్లగా.. జ్యుడీషియల్ కస్టడీకి ఆదేశాలు జారీ చేసింది. అయితే ఈ ఉత్తర్వును సవాల్ చేస్తూ మంజీత్ సింగ్ అలహాబాద్ హైకోర్టును ఆశ్రయించారు. ఈక్రమంలోనే నేడు ధర్మాసనం విచారణ జరిపింది.

అయితే ఎఫ్ఐఆర్‌లో పేర్కొన్న ఆరోపణలు అన్నీ తప్పని, చట్ట విరుద్ధంగా మంజీత్ సింగ్‌ను అరెస్ట్ చేశారంటూ ఆయన తరఫు న్యాయవాది కోర్టుకు తెలిపారు. అలాగే రిమాండ్ విచారణలో విధాన పరమైన లోపాలు ఉన్నాయని ఆరోపించారు. రాజ్యాంగంలోని ఆర్టికల్ 22(1) ప్రకారం.. మంజీత్ సింగ్‌ను అరెస్టు చేసిన సమయంలో ఎందుకు అదుపులోకి తీసుకున్నారనే కారణాలను కూడా అతడికి తెలియజేయ లేదని వెల్లడించారు. ఇరువైపులా వాదనలు విన్న అలహాబాద్ హైకోర్టు పిటిషనర్ తరఫు న్యాయవాది వాదనలను సమర్థించింది. రాజ్యాంగంలోని ఆర్టికల్ 22(1) ప్రకారం అరెస్ట్ చేయబడుతున్న వ్యక్తికి కారణాలు చెప్పడం తప్పనిసరి అని స్పష్టం చేసింది.

అంతేకాకుండా ఆర్టికల్ 22(1)ను ఉల్లంఘించినప్పుడు నిందితులను వెంటనే విడుదల చేయాలని ఆదేశించడం న్యాయస్థానం విధి అని చెప్పుకొచ్చింది. చట్టబద్ధమైన ఆంక్షలు ఉన్నప్పటికీ మంజూరు చేయడానికి కారణం అవుతుందని న్యాయమూర్తులు మహేష్ చంద్ర త్రిపాఠి, ప్రశాంత్ కుమార్‌లతో కూడిన డివిజన్ బెంచ్ వెల్లడించింది. ఈక్రమంలోనే మంజీత్ సింగ్ అరెస్టును రద్దు చేస్తూ తీర్పును ఇచ్చింది. ఏప్రిల్ 9వ తేదీన ఇందుకు సంబంధించిన ఉత్తర్వులను జారీ చేసింది.