ఓట్స్‌తో కరకరలాడే క్రిస్పీ దోశ,,,, ఒకటికి రెండు ఎక్స్‌ట్రా తింటారు

ప్రతి ఇంట్లో ఉదయాన్నే సాధారణంగా అడిగే ప్రశ్న ఈ రోజు ఏం టిఫెన్. ముఖ్యంగా పిల్లలు ఈ ప్రశ్న అడుగుతుంటారు. ఎందుకంటే వారు టేస్టీ టిఫెన్ తినాలని భావిస్తారు. చాలా మంది ఇళ్లలో ఇడ్లీ, దోశ, ఉప్మా వంటి టిఫెన్స్ కామన్‌గా చేసుకుంటారు. అయితే, వీటిని రోజూ తింటే బోర్ కొడుతుంది. నాలుక కూడా ఏదైనా కొత్త రుచి చూడాలని అనుకుంటుందిగా. అందుకే మీ ముందుకు టేస్టీ టేస్టీ హెల్తీ ఓట్స్ దోశ తయారీ విధానం తీసుకువచ్చాం. ఫైబర్ ఎంతో ఉండే ఓట్స్‌తో చేసిన దోశతో ఆరోగ్య ప్రయోజనాలు కూడా ఉంటాయి. ఓట్స్‌ దోశకి కావాల్సిన పదార్థాలేంటి, ఎలా చేసుకోవాలో ఇక్కడ తెలుసుకుందాం.

కావాల్సిన పదార్థాలు

* ఓట్స్ - ఒక కప్పు

* గోధుమ రవ్వ - ఒక టేబుల్ స్పూన్

* బియ్యం పిండి లేదా గోధుమ పిండి- ఒక టేబుల్ స్పూన్

* మెంతులు - 1/4 స్పూన్

* ఉప్పు - రుచికి తగినంత

* ఇంగువ - చిటికెడు

* నల్ల మిరియాలు - 1/2 స్పూన్

* కరివేపాకు - 7-8 ఆకులు

* అల్లం -ఒక టీ స్పూన్

* సన్నగా తరిగిన పచ్చి మిర్చి - ఒక టీ స్పూన్

* సన్నగా తరిగిన కొత్తిమీర - ఒక టీ స్పూన్

* సన్నగా తరిగిన చిన్న ఉల్లిపాయ

* నూనె - ఒక టేబుల్ స్పూన్

* పెరుగు - ఒక టీ స్పూన్

పిండిని ఎలా కలుపుకోవాలి?

* ముందుగా ఓట్స్ ను తేలికగా వేయించుకోవాలి. ఇప్పుడు వాటిని చల్లబరిచి, కొన్ని మెంతులు జోడించి పొడిలా చేయండి.

* ఈ పొడిని ఒక గిన్నెలోకి తీసుకుని అందులో ఒక చెంచా ఉప్మా రవ్వ లేదా గోధుమ రవ్వ, బియ్యం పిండి కలపండి.

* బియ్యం పిండి లేకపోతే.. దానికి ఒక చెంచా గోధుమ పిండిని కూడా జోడించండి.

* ఇప్పుడు ఒక చెంచా పెరుగు, రుచికి తగినంత ఉప్పు, నల్ల మిరియాలు, ఇంగువ, కరివేపాకు, తురిమిన అల్లం ప్రతిదీ వేసి మిశ్రమాన్ని బాగా కలపండి.

* అవసరాన్ని బట్టి కొంచెం నీళ్లు పోసీ మరీ లూజ్ కాకుండా సరైన విధంగా పిండిని కలుపుకోండి.

దోశ తయారీ విధానం

* బాగా కలిపిన పిండిని 15 నుంచి 20 నిమిషాల పాటు అలాగే ఉండనివ్వండి.

* ఇప్పుడు పిండికి సన్నగా తరిగిన పచ్చిమిర్చి, కరివేపాకు, సన్నగా తరిగిన ఉల్లిపాయల్ని జోడించండి.

* దోసె పాన్ వేడి చేసి నీళ్లు చిలకరించి శుభ్రం చేసుకోండి. ఇప్పుడు పాన్‌కి నూనె రాసి పిండి వేసి వృత్తాకారం షేపులో దోసె వేయండి.

* దోసె అంచుల వరకు బాగా కాలేదాక పాన్ మీద అలాగే ఉండనివ్వండి. ఇప్పుడు మరోవైపుకి తిప్పి, కాస్త నూనె వేసి దోసె కాలనివ్వండి. ఇంకేముంది టేస్టీ టేస్టీ ఓట్స్ దోశ రెడీ. ఇప్పుడు చట్నీ లేదా సాంబార్‌తో దోసెను ఆరగించండి.

* పైన చెప్పిన కొలతల ప్రకారం దోశ వేసుకుని తింటే ఒకటి రెండు ఎక్‌ట్రా తింటారు.

హెల్దీ ఫుడ్ కూడా

ఓట్స్ ఆరోగ్యానికి ఎంతో మేలు చేస్తాయి. ఓట్స్‌లో ఫైబర్ ఎక్కువగా ఉంటుంది. ఓట్స్‌లో ఫైబర్‌తో పాటు ప్రోటీన్, విటమిన్లు, మెగ్నిషియం, ఐరన్, జింక్ వంటి ఖనిజాలతో పాటు ఎన్నో పోషకాలు ఉంటాయి. ఓట్స్‌లో ఫైబర్ అధికంగా ఉంటుందియ. ఇది కడుపు నిండిన భావనను కలిగిస్తుంది. దీంతో, ఇది బరువు తగ్గాలనుకునేవారికి బెస్ట్ ఆప్షన్. ఓట్స్‌లో కరిగే ఫైబర్ బీటా - గ్లూకాన్ ఉంటుంది. ఇది కొలెస్ట్రాల్ స్థాయిల్ని తగ్గించడంలో సాయపడుతుంది. ఓట్స్ జీర్ణక్రియకు సాయపడతాయి. మలబద్దకాన్ని నివారిస్తాయి. ఓట్స్ తినడం వల్ల గుండె ఆరోగ్యానికి కూడా మేలు చేస్తుంది.