ఇన్‌స్టాగ్రామ్, వాట్సాప్‌లను గుత్తాధిపత్యం కోసమే కొన్నారని ఎఫ్.టీ.సి ఆరోపణ

టెక్ దిగ్గజం మెటా సీఈఓ మార్క్ జుకర్‌బర్గ్ ప్రస్తుతం ఒక క్లిష్టమైన యాంటీట్రస్ట్ విచారణను ఎదుర్కొంటున్నారు. తమ ఆధిపత్యాన్ని నిలుపుకునేందుకు పోటీ సంస్థలను చట్టవిరుద్ధంగా కొనుగోలు చేశారన్న ఆరోపణలపై యూఎస్ ఫెడరల్ ట్రేడ్ కమిషన్  మెటాపై దావా వేసింది. ఈ కేసు విచారణ వాషింగ్టన్‌లో తాజాగా ప్రారంభమైంది. ఒకవేళ ఎఫ్.టీ.సి వాదనలు నెగ్గితే, మెటా తన యాజమాన్యంలోని ప్రముఖ ప్లాట్‌ఫాంలు ఇన్‌స్టాగ్రామ్, వాట్సాప్‌లను విక్రయించాల్సిన పరిస్థితి ఏర్పడవచ్చు.సోషల్ మీడియా రంగంలో పోటీని పూర్తిగా తొలగించి, గుత్తాధిపత్యం చెలాయించేందుకే మెటా ఈ వ్యూహాన్ని అనుసరించిందని ఎఫ్.టీ.సి ప్రధానంగా ఆరోపిస్తోంది. ముఖ్యంగా, 2012లో 1 బిలియన్ డాలర్లకు ఇన్‌స్టాగ్రామ్‌ను, 2014లో 19 బిలియన్ డాలర్లకు వాట్సాప్‌ను కొనుగోలు చేయడాన్ని ఎఫ్.టీ.సి తప్పుబడుతోంది. ఇవి కేవలం వ్యాపార విస్తరణ కొనుగోళ్లు కావని, ఎదుగుతున్న పోటీదారులను అణచివేసేందుకే ఈ స్వాధీనాలు జరిగాయని ఎఫ్.టీ.సి వాదిస్తోంది. ఇన్‌స్టాగ్రామ్ "బీభత్సంగా ఎదుగుతోంది" అని జుకర్‌బర్గ్ అంతర్గత సంభాషణల్లో పేర్కొన్నారని, పోటీ పడటం కంటే ప్రత్యర్థులను కొనడమే మేలని ఆయన భావించినట్లు ఎఫ్.టీ.సి తమ ఫిర్యాదులో ఉటంకించింది. ఈ కొనుగోళ్ల వల్ల వినియోగదారులు మెరుగైన ఎంపికలు, నాణ్యత, ఆవిష్కరణలను కోల్పోయారని, మార్కెట్లో న్యాయమైన పోటీని పునరుద్ధరించాలంటే మెటాను విభజించడమే మార్గమని ఎఫ్.టీ.సి పేర్కొంది.అయితే, ఎఫ్.టీ.సి ఆరోపణలను మెటా తీవ్రంగా ఖండిస్తోంది. ఈ ఆరోపణలు నిరాధారమని, దశాబ్దం క్రితం నియంత్రణ సంస్థల ఆమోదంతోనే ఈ కొనుగోళ్లు జరిగాయని గుర్తు చేస్తోంది. తమ పెట్టుబడులు, సాంకేతిక సహకారం వల్లే ఇన్‌స్టాగ్రామ్, వాట్సాప్‌లు నేటి ప్రపంచ స్థాయి ప్లాట్‌ఫాంలుగా ఎదిగాయని మెటా వాదిస్తోంది. అంతేకాకుండా, టిక్‌టాక్, యూట్యూబ్, స్నాప్‌చాట్, ఎక్స్ వంటి సంస్థల నుంచి తాము తీవ్రమైన పోటీని ఎదుర్కొంటున్నామని, కాబట్టి తమకు గుత్తాధిపత్యం లేదని స్పష్టం చేసింది. ఎఫ్.టీ.సి దావా వాస్తవ దూరంగా ఉందని, ఇది అమెరికా ఆవిష్కరణల స్ఫూర్తిని దెబ్బతీస్తుందని మెటా ప్రతినిధి ఒకరు వ్యాఖ్యానించారు.ఈ చరిత్రాత్మక విచారణకు జడ్జి జేమ్స్ బోస్‌బర్గ్ నేతృత్వం వహిస్తున్నారు. మెటా చర్యలు చట్టవిరుద్ధమైన గుత్తాధిపత్య ప్రవర్తన కిందకు వస్తాయా లేదా అనే విషయాన్ని ఆయన అంచనా వేస్తారు. ఒకవేళ ఎఫ్.టీ.సి విజయం సాధిస్తే, 1980లలో ఏటీ&టీ గుత్తాధిపత్యాన్ని విచ్ఛిన్నం చేసిన తర్వాత, ఒక అతిపెద్ద టెక్ సంస్థను విభజించాలని ఆదేశించడం ఇదే మొదటిసారి అవుతుంది. ఈ విచారణ కొన్ని వారాల పాటు కొనసాగే అవకాశం ఉంది. మెటా తరఫున మార్క్ జుకర్‌బర్గ్ కూడా సాక్ష్యం ఇవ్వనున్నారు.