6 వికెట్లతో చెలరేగిన కెప్టెన్ కమిన్స్.. దక్షిణాఫ్రికా 138 ఆలౌట్

 లార్డ్స్ మైదానంలో జరుగుతున్న ప్రపంచ టెస్టు ఛాంపియన్‌షిప్‌ (డబ్ల్యూటీసీ) ఫైనల్ ఆసక్తికరంగా సాగుతోంది. తొలిరోజు దక్షిణాఫ్రికా పేసర్ల ధాటికి.. ఆస్ట్రేలియా 212 రన్స్ మాత్రమే చేయగా.. అనంతరం సౌతాఫ్రికా బ్యాటర్లు కూడా వరుసపెట్టి పెవిలియన్ చేరారు. రెండో రోజు ఆరంభంలో దక్షిణాఫ్రికా కాస్త పోరాటం చూపినప్పటికీ.. చివరికి 138 పరుగులకే ఆలౌట్ అయింది. దీంతో కంగారూ జట్టుకు తొలి ఇన్నింగ్స్‌లో 74 పరుగుల కీలక ఆధిక్యం లభించింది. ఈ మ్యాచ్‌లో ఆస్ట్రేలియా పట్టు బిగిస్తోంది. సౌతాఫ్రికా బ్యాటర్లలో బెడింఘమ్ (45) టాప్ స్కోరర్. ఆ జట్టు కెప్టెన్ బవుమా 36 పరుగులతో రాణించాడు. ఆస్ట్రేలియా బౌలర్లలో కమిన్స్ 6 వికెట్లు పడగొట్టాడు.

43-4 స్కోరుతో రెండోరోజు ఆట ప్రారంభించిన సౌతాఫ్రికాను.. బవుమా, బెడింఘమ్ ఆదుకున్నారు. ఓపికతో ఆడుతూ.. స్కోరు బోర్డును మెల్లగా ముందుకు తీసుకెళ్లారు. ఆస్ట్రేలియా బౌలర్లను సమర్థంగా ఎదుర్కొన్నారు. ఈ క్రమంలోనే ఐదో వికెట్‌కు 64 పరుగులు జోడించాక.. కమిన్స్ ఆసీస్‌కు మంచి బ్రేక్ త్రూ ఇచ్చాడు. అతడి బౌలింగ్‌లో.. లబుషేన్ అద్భుత క్యాచ్‌తో బవుమా పెవిలియన్ చేరాడు. తర్వాత వెరిన్ (13) కాస్త నిలదొక్కుకున్నట్లే కనిపించినా 13 పరుగులకే వెనుదిరిగాడు. ఇక బెడింఘమ్ ఒకవైపు క్రీజులో పాతుకుపోయినా మరో ఎండ్‌లో సహకరించే వారే లేకపోయారు. ఈ క్రమంలోనే వేగంగా ఆడే క్రమంలో అతడు కూడా 8వ వికెట్‌గా వెనుదిరిగాడు. బెడింఘమ్ అవుటయ్యాక 10 బంతుల్లోపే సౌతాఫ్రికా ఇన్నింగ్స్ ముగిసింది.

ఆస్ట్రేలియా 212 ఆలౌట్..

అంతకుముందు తొలి రోజు ఆటలో కూడా పేసర్ల ఆధిపత్యం స్పష్టంగా కనిపించింది. దక్షిణాఫ్రికా కెప్టెన్ బావుమా టాస్ గెలిచి ఫీల్డింగ్ ఎంచుకున్న నిర్ణయం సరైందని నిరూపిస్తూ, కగిసో రబాడ (5/51), మార్కో యాన్సెన్ (3/49) ఆస్ట్రేలియా బ్యాటర్లను హడలెత్తించారు. సీమ్, స్వింగ్‌కు సహకరిస్తున్న పిచ్‌పై వీరిద్దరి ధాటికి ఆస్ట్రేలియా 212 రన్స్‌కే ఆలౌట్ అయింది. ఆల్‌రౌండర్ వెబ్‌స్టర్ (72) టాప్ స్కోరర్ కాగా.. స్టీవ్ స్మిత్ కూడా 66 పరుగులతో రాణించాడు. ఐదో వికెట్‌కు స్మిత్, వెబ్‌స్టర్ 79 పరుగులు జోడించారు. ఆఖరి సెషన్‌లో దక్షిణాఫ్రికా మళ్లీ పుంజుకుంది.

ఆస్ట్రేలియాను తక్కువ స్కోరుకే ఆలౌట్ చేసినా.. దక్షిణాఫ్రికా తొలి రోజును నిరాశగానే ముగించింది. బ్యాటుతో ఆ జట్టు కంగారూల కంటే ఎక్కువగా తడబడింది. స్టార్క్, కమిన్స్, హేజిల్‌వుడ్ చెలరేగడంతో తొలి రోజు ఆట ముగిసే సమయానికి దక్షిణాఫ్రికా 43 పరుగులకే నాలుగు వికెట్లు కోల్పోయి కష్టాల్లో పడింది. స్టార్క్ ఓపెనర్లిద్దరినీ అవుట్ చేసిన స్టార్క్ దక్షిణాఫ్రికాను గట్టి దెబ్బతీశాడు. ఇక రెండో రోజు కమిన్స్ చెలరేగి సౌతాఫ్రికా పతనాన్ని శాసించాడు.