ఆస్ట్రేలియాకు బిగ్ షాక్.. స్టీవ్ స్మిత్‌కు తీవ్ర గాయం

ప్రపంచ టెస్టు ఛాంపియన్ షిప్ 2025 ఫైనల్‌లో ఆస్ట్రేలియాకు బిగ్ షాక్ తగిలింది. ఆ జట్టు స్టార్ ప్లేయర్ స్టీవ్ స్మిత్‌కు తీవ్ర గాయమైంది. ఈ మ్యాచులో ఫీల్డింగ్ చేస్తుండగా.. స్మిత్ వేలికి గాయమైంది. గాయం తీవ్రత ఎక్కువగా ఉండటంతో అతడు ప్రపంచ టెస్టు ఛాంపియన్ షిప్ ఫైనల్ నుంచి అర్ధంతరంగా తప్పుకున్నాడు. స్టీవ్ స్మిత్‌కు తీవ్ర గాయం అయినట్లు క్రికెట్ ఆస్ట్రేలియా ప్రకటించింది.

ఈ మ్యాచులో దక్షిణాఫ్రికా ముందు ఆస్ట్రేలియా 282 పరుగుల లక్ష్యాన్ని నిలిపింది. అయితే ఇన్నింగ్స్ 20వ ఓవర్‌లో స్మిత్ గాయపడ్డాడు. ఈ ఓవర్‌ను స్టార్క్ వేశాడు. అయితే స్టార్క్ వేసిన బంతిని స్ట్రైకింగ్‌లో ఉన్న టెంబా బవుమా సరిగా అంచనా వేయలేకపోయాడు. దీంతో బంతి బ్యాట్ అంచును తాకి.. స్లిప్‌లోకి వెళ్లింది. అక్కడే ఫీల్డింగ్ చేస్తున్న స్మిత్.. బంతిని క్యాచ్ పట్టే ప్రయత్నం చేశాడు.

కానీ బంతి వేగంగా వచ్చి స్మిత్ చిటికిన వేలికి బలంగా తగిలింది. దీంతో క్యాచ్ చేజారింది. అయితే బంతి బలంగా తాకడంతో స్మిత్ నొప్పితో విల‌విల‌లాడుతూ మైదానం వీడాడు. స్మిత్ వేలు విరిగిపోయినట్లుగా ఉన్న ఫొటోలు వైరల్‌గా మారాయి. దీంతో అతడికి తీవ్ర గాయమైనట్లు అంతా అంచనా వేశారు.

టీ సెష‌న్‌కు ముందు డ్రెస్సింగ్ రూమ్‌కు వెళ్లిన అత‌డు.. మళ్లీ ఫీల్డింగ్‌కు రాలేదు. ఆస్ట్రేలియా వైద్య బృందం స్మిత్‌కు స్కానింగ్ ప‌రీక్ష‌లు నిర్వ‌హించ‌గా.. కుడిచేతి చిటికెన వేలులో ఎముక స్థాన‌భ్రంశం చెందిన‌ట్టు తేలింది. అతడు ఈ మ్యాచులో మళ్లీ ఆడలేడని వైద్య బృందం తెలిపింది. స్మిత్ కుడిచేతి చిటికెన వేలు ఎముక ప‌క్క‌కు జ‌రిగింద‌ని ఓ ప్ర‌క‌ట‌న‌లో వెల్లడించింది దీంతో స్మిత్.. డ్రెస్సింగ్ రూమ్‌కే పరిమితమయ్యాడు.

ద‌క్షిణాఫ్రికాతో జ‌రుగుతున్న‌ డ‌బ్ల్యూటీసీ ఫైన‌ల్లో స్టీవ్ స్మిత్ అద్భుత ఇన్నింగ్స్ ఆడాడు. మిగతా బ్యాటర్లు విఫలమైనా.. తొలి ఇన్నింగ్స్‌లో హాఫ్ సెంచరీ స్కోరు చేశాడు. కానీ రెండో ఇన్నింగ్స్‌లో మాత్రం 13 రన్స్ మాత్రమే చేసి ఔట్ అయ్యాడు. పూర్తి స్థాయి పరీక్షలు చేసిన తర్వాత గాయం తీవ్రతకు సంబంధించి వివరాలు తెలియనున్నాయి. అతడు ఎన్ని రోజులు మైదానానికి దూరంగా ఉంటాడనే విషయంపై స్పష్టత రానుంది.