హోరాహోరీగా ప్రపంచ టెస్టు ఛాంపియన్ షిప్ ఫైనల్

ప్రపంచ టెస్టు ఛాంపియన్ షిప్ 2025 ఫైనల్ రసవత్తర ముగింపు దిశగా సాగుతోంది. ఆధిపత్యం దోబూచులాడుతున్న ఈ మ్యాచులో.. మూడో రోజు టీ బ్రేక్ సమయానికి ఇరు జట్లూ సమానంగా విజయావకాశాలను కలిగి ఉన్నాయి . 282 పరుగుల లక్ష్య ఛేదనలో ప్రస్తుతం దక్షిణాఫ్రికా 94/2తో ఉంది. క్రీజులో ఎయిడెన్ మార్‌క్రమ్ (49), టెంబా బవూమా (11) ఉన్నారు. దక్షిణాఫ్రికా విజయానికి ఇంకా 188 పరుగులు అవసరం కాగా.. ఆస్ట్రేలియాకు 8 వికెట్లు కావాలి.

ఓవర్ నైట్ స్కోరు.. 144/8తో మూడో రోజు ఆట ప్రారంభించిన ఆస్ట్రేలియా 207 పరుగులు చేసింది. మిచెల్ స్టార్క్.. 136 బంతుల్లో 58 పరుగులతో నాటౌట్‌గా నిలిచి జట్టుకు మెరుగైన స్కోరు అందించాడు. రెండో ఇన్నింగ్స్‌లో ఓ దశలో 73 పరుగులకే 7 వికెట్లు కోల్పోయిన ఆస్ట్రేలియా.. ఆ తర్వాత స్టార్క్ పోరాటంతో అనూహ్యంగా పుంజుకుంది. ఏకంగా 282 పరుగుల లక్ష్యాన్ని నిలిపింది. దక్షిణాఫ్రికా బౌలర్లలో కగిసో రబాడ 4 వికెట్లు తీయగా.. లుంగీ ఎంగిడి 3, మార్కో జాన్సెన్, ముల్డర్ర్, మార్‌క్రమ్ ఒక్కో వికెట్ తీశారు.

దక్షిణాఫ్రికాను తొలి ఇన్నింగ్స్‌లో 138పరుగులకే ఆలౌట్ చేసిన ఆస్ట్రేలియా.. 282 పరుగుల లక్ష్యం నిలిపి.. మెరుగైన స్థితిలో నిలిచింది. దీంతో పూర్తి ఆత్మవిశ్వాసంతో ఈ టెస్టులో చివరి ఇన్నింగ్స్‌ ఆటకు సిద్ధమైంది. అయితే ప్రపంచ టెస్టు ఛాంపియన్ షిప్ 2025 టేబుల్ టాపర్‌గ నిలిచిన దక్షిణాఫ్రికా పట్టుదలతో బ్యాటింగ్ చేస్తోది. ఓపెనర్ ర్యాన్ రికల్టన్ (6) త్వరగానే ఔట్ అయినా.. ఎయిడెన్ మార్‌క్రమ్ మాత్రం పోరాడుతున్నాడు. తొలి ఇన్నింగ్స్‌లో డకౌట్ అయిన ఈ ప్లేయర్.. ఈసారి మాత్రం ఆసీస్ బౌలర్లను సమర్థవంతంగా ఎదుర్కొంటున్నాడు.

ఈ క్రమంలోనే వియాన్ ముల్డర్‌ (27)తో కలిసి కీలకమైన రెండో వికెట్‌కు 61 పరుగుల భాగస్వామ్యాన్ని అందించాడు. అతడు ఔట్ అయ్యాక క్రీజులోకి వచ్చిన కెప్టెన్ టెంబా బవూమా (11) కూడా చక్కగా బ్యాటింగ్ చేస్తున్నాడు. దీంతో నాలుగో రోజు టీ సమయానికి దక్షిణాఫ్రికా 94/2తో నిలిచింది. ఆ జట్టు విజయానికి ఇంకా 188 పరుగులు అవసరం. ఇక ఆస్ట్రేలియా బౌలర్లలో మిచెల్ స్టార్క్ ఒక్కడే రెండు వికెట్లు పడగొట్టాడు. ఈ మ్యాచులో గెలవాలంటే ఆస్ట్రేలియా మరో 8 వికెట్లు తీయాల్సి ఉంది.