30 ఏళ్లుగా స్నేహం, ఫ్రెండ్ భార్యపై కన్నేసిన వ్యక్తి.. భార్య, ఫ్రెండ్ చేతిలో హతమైన భర్త

వారిద్దరూ చిన్ననాటి స్నేహితులు. 30 ఏళ్లుగా వారిద్దరి మధ్య ఫ్రెండ్‌షిప్ కొనసాగుతోంది. నిక్కర్లు వేసుకున్నప్పటి నుంచి.. ఆడుతూ పాడుతూ కలిసి తిరిగేవారు. అయితే 3 దశాబ్దాలుగా కలిసి ఉన్న స్నేహితుడిని.. అతడు మోసం చేశాడు. చివరికి తన ఫ్రెండ్ భార్యపైనే కన్నేశాడు. ఈ క్రమంలోనే పెళ్లి అయినా.. తన భర్త ఫ్రెండ్‌ మోజులో పడిన ఆ భార్య.. భర్తకు తెలియకుండా వివాహేతర సంబంధం కొనసాగించింది. ఈ క్రమంలోనే ఒకరోజు ఫ్రెండ్, భార్య.. ఏకాంతంగా గడుపుతున్న సమయంలో భర్త కంట పడ్డారు. వారిద్దరినీ అలా చూసిన భర్త.. కాపురాన్ని మరోచోటుకు మార్చాడు. అయినప్పటికీ వారిద్దరూ తమ సంబంధాన్ని కొనసాగించారు. ఇక తమ సంబంధానికి అడ్డుగా ఉన్నాడని భర్తను.. భార్య, అతని ఫ్రెండ్ కలిసి హతమార్చారు. చివరికి పోలీసుల విచారణలో దొరకడంతో వారిద్దరినీ అరెస్ట్ చేశారు. కర్ణాటక రాజధాని బెంగళూరులో ఈ ఘటన ఆలస్యంగా వెలుగులోకి వచ్చింది.

బెంగళూరు నగరానికి చెందిన 39 ఏళ్ల విజయ్ కుమార్‌, ధనుంజయ్ చిన్నప్పటి నుంచీ ప్రాణ స్నేహితులు. నగరంలోని మగది ప్రాంతంలోనే పెరిగి పెద్దవారు అయ్యారు. ప్రస్తుతం విజయ్ కుమార్.. రియల్ ఎస్టేట్ వ్యాపారం చేస్తుండగా.. 10 ఏళ్ల క్రితం ఆశ అనే యువతిని పెళ్లి చేసుకున్నాడు. ఆ తర్వాత ఈ జంట కామాక్షిపాళ్య ప్రాంతంలో నివాసం ఉండేవారు. అయితే విజయ్ స్నేహితుడు ధనుంజయ్‌కి ఆశతో పరిచయం ఏర్పడింది. అయితే ఈ పరిచయం కాస్తా.. వీరిద్దరి మధ్య వివాహేతర సంబంధానికి కారణం అయింది.

ధనుంజయ్, ఆశ వివాహేతర సంబంధం గురించి.. కొన్ని నెలల క్రితమే విజయ్ కుమార్‌కు తెలిసింది. వారిద్దరూ ఏకాంతంగా గడుపుతున్న సమయంలో.. విజయ్ కుమార్‌‍కు రెడ్ హ్యాండెడ్‌గా దొరికిపోయారు. ఈ క్రమంలోనే వారిద్దరినీ విజయ్ కుమార్ నిలదీయగా.. అసలు విషయం అతనికి తెలిసింది. దీంతో విజయ్ కుమార్ తన భార్య ఆశను తీసుకుని.. కామాక్షిపాళ్య నుంచి మకాం మాచోహళ్లికి మార్చారు. అక్కడ గత కొన్ని నెలలుగా అద్దె ఇంట్లో నివాసం ఉంటున్నారు.

అయినప్పటికీ.. ధనుంజయ్, ఆశల మధ్య వివాహేతర సంబంధం మాత్రం కొనసాగుతూనే వచ్చింది. వారిద్దరూ తరచూ కలుస్తూనే ఉండేవారని పోలీసులు తెలిపారు. తమ వివాహేతర సంబంధానికి విజయ్ కుమార్ అడ్డుగా ఉన్నాడని వారిద్దరూ భావించారు. దీంతో పక్కా ప్లాన్‌ రచించి.. విజయ్ కుమార్‌ను భార్య ఆశ, ఫ్రెండ్ ధనుంజయ్ అత్యంత క్రూరంగా చంపేశారు. ఇక విజయ్ కుమార్ మృతదేహాన్ని గుర్తించిన పోలీసులు.. కేసు నమోదు చేసుకుని దర్యాప్తు చేపట్టారు. ఈ క్రమంలోనే పోలీసుల విచారణలో ధనుంజయ్, ఆశల వివాహేతర సంబంధం బయటికి వచ్చింది. దీంతో ఆశను అదుపులోకి తీసుకుని పోలీసులు విచారణ జరుపుతున్నారు. ప్రస్తుతం ధనుంజయ్ పరారీలో ఉన్నాడని.. అతడి కోసం గాలిస్తున్నట్లు పోలీసులు వెల్లడించారు.