కాలికి కట్టుతో రిషబ్ పంత్ ఇన్‌స్టాగ్రామ్ స్టోరీ.. 'ఐ హేట్' అంటూ ఎమోషనల్

టీమిండియా మోస్ట్ ఎంటర్‌టైన్ బ్యాటర్ రిషబ్ పంత్ చాలా ఫీలవుతున్నాడు. 'నేను దీన్ని చాలా ద్వేషిస్తున్నాను' అంటూ ఇన్‌స్టాగ్రామ్ వేదికగా పోస్ట్ చేసి.. బాగా బాధపడుతున్న ఎమోజీని దాని మీద పెట్టాడు. గ్రౌండ్‌లో చలాకీగా ఉంటూ.. వికెట్ల వెనుక అల్లరి చేసే రిషబ్ పంత్ ఇప్పుడు ఇంత బాధ పడటం అందర్నీ కలచి వేస్తోంది.

టీమిండియా టెస్ట్ జట్టు వైస్ కెప్టెన్ రిషబ్ పంత్ అండర్సన్ - టెండూల్కర్ ట్రోఫీలో గాయపడ్డాడు. కీలకమైన నాలుగో టెస్టులో కాలికి గాయం కావడంతో సిరీస్‌కే దూరమయ్యాడు. టీమిండియా సిరీస్‌ను 2-2తో సమం చేసినప్పటికీ చాలా మంది ప్లేయర్లు మాత్రం గాయపడ్డారు. అందులో రిషబ్ పంత్ గాయం మాత్రం అందర్నీ ఎమోషనల్‌కి గురి చేసింది. తన కాలు ఫొటో తీసి ఇన్‌స్టాగ్రామ్ స్టోరీగా రిషబ్ పంత్ పోస్ట్ చేశాడు. ఇలాంటి సిచ్యుయేషన్‌ని నేను ద్వేషిస్తున్నాను అంటూ బాధపడుతున్న ఎమోజీని పోస్ట్ చేశాడు.

మాంచెస్టర్ వేదికగా ఇంగ్లండ్‌తో జరిగిన నాలుగో టెస్టు‌లో రిషబ్ పంత్ తీవ్రంగా గాయపడ్డాడు. జూలై 23న జరిగిన ఈ టెస్టు మొదటి రోజు బ్యాటింగ్ చేస్తున్న సమయంలో రిషబ్ పంత్ కాలికి గాయమైంది. క్రిస్ వోక్స్ వేసిన బంతిని రివర్స్ షాట్ ఆడే ప్రయత్నం చేయగా.. బంతి బ్యాట్‌కి మిస్సయి కాలికి తగిలింది. షూ విప్పి చూడగా కాలికి గాయమైంది. ఫిజియో వచ్చి ప్రథమ చికిత్స చేసినప్పటికీ లాభం లేకపోవడంతో గ్రౌండ్‌ని విడవాల్సి వచ్చింది.

మెడికల్ టెస్టుల అనంతరం కనీసం ఆరు వారాల రెస్ట్ అవసరమని వైద్యులు నిర్థారించారు. తొలి రోజు రిటైర్డ్ హర్ట్‌గా బయటకు వచ్చిన పంత్.. ఇక గ్రౌండ్‌లోకి అడుగుపెట్టరని అందరూ అనుకున్నారు. కానీ భారత్‌కు కీలకమైన ఈ మ్యాచ్‌లో బ్యాటింగ్‌కి రావడమే కాకుండా హాఫ్ సెంచరీ కూడా నమోదు చేశాడు. కీపింగ్‌కి మాత్రం ధృవ్ జురెల్ వచ్చాడు. రెండో ఇన్నింగ్స్ సమయంలోనూ కాలు సహకరించకపోయినా బ్యాటింగ్‌కి వచ్చి ప్రశంసలు అందుకున్నాడు.

టీ20 వరల్డ్‌కప్ 2022 తర్వాత ఇంటికి వస్తున్న సమయంలో రిషబ్ పంత్ ఓ పెద్ద ప్రమాదానికి గురయ్యాడు. కారు యాక్సిడెంట్‌కు గురైన రిషబ్ పంత్ చాలా కాలం పాటు క్రికెట్‌కు దూరమయ్యాడు. ఇక క్రికెట్‌కు దూరమవుతాడు అని అనుకుంటే విధిని ఎదిరించి మరీ మళ్లీ క్రికెట్‌లోకి అడుగుపెట్టి ఎన్నో రికార్డులు సాధించాడు. మళ్లీ 2025లో అండర్సన్ - టెండూల్కర్ ట్రోఫీలో బంతికి కాలు తగిలి ఇప్పుడు మళ్లీ బెడ్ రెస్ట్‌కి వచ్చాడు.