లగేజ్‌కు కూడా ఛార్జ్ చెల్లించాల్సిందే,,,మెట్రో ప్రయాణికులకు మరో షాక్

సామాన్యుల జేబుకు చిల్లు పెట్టే ఏ చిన్న అవకాశాన్ని ఎవరు వదులుకోలేరేమో అనిపిస్తుంది కొన్ని సంఘటనలు చూస్తే. ఉద్యోగ, ఉపాధి అవకాశాల కోసం నగరంలో ఉంటున్న వారి తిప్పల గురించి ఎంత చెప్పినా తక్కువే. నగరంలో ప్రతిది ఆర్థిక భారమే. ఇక ప్రయాణాల సంగతి అయితే చెప్పక్కర్లేదు. సొంతంగా వాహనాలు ఉన్నా సరే.. ట్రాఫిక్‌ కష్టాలకు భయపడి చాలా మంది మెట్రోలో ప్రయాణానికే మొగ్గు చూపుతుంటారు. ఇక మెట్రో ఛార్జీలు మాములుగా ఉండవు. దీనికి తోడు ఇప్పడు ప్రయాణికులకు మరో చిల్లు పెట్టేందుకు మెట్రో రెడీ అవుతోంది. అదే లగేజ్‌కి కూడా ఛార్జ్ వసూలు చేస్తుంది. ఆ వివరాలు..

లగేజ్ ఛార్జీ వసూలు అనేది బెంగళూరు మెట్రోలో. దేశంలోనే అత్యంత ఖరీదైన మెట్రోగా గుర్తింపు తెచ్చుకున్న బెంగళూరు మెట్రో(నమ్మ మెట్రో) తాజాగా మరోసారి ప్రయాణికుల జేబుకు చిల్లు పెట్టేందుకు రెడీ అయ్యింది. ప్రయాణికుల నుంచి అదనపు లగేజ్ రుసుమును విధిస్తుంది. దీనిపై ప్రయాణికులు తీవ్రంగా మండిపడుతున్నారు. ప్రయాణికులపై ఇంకెంత భారం మోపుతారని ప్రశ్నిస్తుండగా.. కొందరు మాత్రం.. మెట్రో నిర్ణయాన్ని సమర్థిస్తున్నారు. ఓ ప్రయాణికుడు అదనపు లగేజ్ ఛార్జీ గురించి సోషల్ మీడియాలో పోస్ట్ చేయడంతో ఇది కాస్త వైరల్ అవుతోంది.

భారీ పరిమాణంలో ఉన్న తన లగేజీకి బెంగళూరు మెట్రో అదనంగా ఛార్జీ వసూలు చేసిందంటూ ఓ ప్రయాణికుడు అసహనం వ్యక్తం చేస్తూ.. ఎక్స్‌లో పోస్ట్ చేయడంతో ఇది కాస్త వైరల్‌గా మారింది. లగేజ్ మీద ఇలాంటి అదనంగా ఛార్జ్ వసూలు చేయడం ఎంతవరకు సమర్థనీయం అంటూ పోస్ట్ చేయడంతో దీనిపై నెట్టింట జోరుగా చర్చ సాగుతోంది. అవినాష్ చంచల్ అనే వ్యక్తి.. తన బ్యాంగ్ ఫొటో పోస్ట్ చేస్తూ.. దానికిగాను బెంగళూరు మెట్రో తన దగ్గర నుంచి అదనంగా రూ.30 వసూలు చేసిందని తెలిపారు. బెంగళూరు మెట్రో ఇప్పటికే దేశంలోనే అత్యంత ఖరీదైనదిగా గుర్తింపు తెచ్చుకుంది. ఇప్పుడు అదనపు లగేజ్ ఛార్జ్‌తో మరింత భారంగా మారనుంది అంటూ పోస్ట్ చేశారు.

ఈ పోస్ట్ వైరల్ కావడమే కాక దీనిపై నెటిజనుల నుంచి మిశ్రమ స్పందన వస్తుంది. అదనపు ఛార్జ్ అంశంలో కొందరు చంచల్‌కు మద్దతివ్వగా.. మరి కొందరు మాత్రం.. అంత పెద్ద పెద్ద బ్యాగులు తీసుకుని మెట్రో ఎక్కినప్పుడు.. అవి మరింత స్థలాన్ని ఆక్రమిస్తాయి. అందుకు అదనపు లగేజ్ ఛార్జ్ వసూలు చేస్తున్నారు. ఇది సరైందే అంటున్నారు. పైగా బ్యాగ్ స్కానర్‌లో సరిపోయే దానికంటే పెద్దదిగా ఉంటేనే ఎక్స్‌ట్రా ఛార్జ్ వసూలు చేస్తారని తెలిపారు. తాను ఎన్నో పార్లు.. ఎలాంటి లగేజ్ ఛార్జ్ చెల్లించకుండానే సూట్‌కేస్, బ్యాక్‌ప్యాక్‌ను తీసుకెళ్లానని చెప్పుకొచ్చాడు. మరికొందరేమో లగేజీకి ప్రత్యేకంగా నిల్వ స్థలం కేటాయించి.. అప్పుడు లగేజ్‌కి రుసుము విధిస్తే బాగుంటుందని అంటున్నారు. మరి దీనిపై మెట్రో యాజమాన్యం ఎలా స్పందిస్తుందో చూడాలి.