అమెరికా పెత్తనం చెలాయించాలనుకుంటోంది,: భారత్‌కు జెఫ్రీ సాచ్స్ వార్నింగ్

అగ్రరాజ్యం అమెరికా అధ్యక్షుడు డొనాల్డ్ ట్రంప్ విధించిన వాణిజ్య సుంకాలపై అంతర్జాతీయంగా చర్చ జరుగుతోంది. తాజాగా ప్రపంచ ప్రఖ్యాత ఆర్థికవేత్త జెఫ్రీ సాచ్స్.. ట్రంప్ తీసుకున్న ఈ నిర్ణయంపై తీవ్ర విమర్శలు గుప్పించారు. అమెరికా తన ఆర్థిక, రాజకీయ పెత్తనాన్ని ప్రపంచ దేశాలపై కొనసాగించాలనుకుంటుందని అన్నారు. అక్కడితో ఆగకుండా భారత్‌పై ట్రంప్ విధించిన సుంకాలు మూర్ఖత్వంతో కూడినవని, పూర్తి భ్రమలతో నిండినవని కుండబద్దలు కొట్టారు. ఎప్పటికీ అగ్రరాజ్యాన్ని ఎవరూ నమ్మొద్దంటూ సంచలన వ్యాఖ్యలు చేశారు.

ట్రంప్ ప్రభుత్వం భారత్ నుంచి దిగుమతి అయ్యే వస్తువులపై 50 శాతం పన్నులు విధించడం అమెరికాకు కూడా హానికరమే అని జెఫ్రీ సాచ్స్ తెలిపారు. రష్యా నుంచి చమురు కొనుగోలు చేయడం భారత్‌కు చారిత్రకంగా ముఖ్యమైనదని గుర్తు చేశారు. కానీ ఈ నిర్ణయాన్ని ట్రంప్ అంగీకరించలేక.. భారత్‌ను బెదిరించడానికి ఈ సుంకాలను ఆయుధంగా వాడుకున్నారని సాచ్స్ స్పష్టం చేశారు. ఈ రకమైన రాజకీయ జోక్యం ప్రపంచ వాణిజ్య నియమాలను ఉల్లంఘించడమే కాకుండా దీర్ఘకాలంలో అమెరికా ఆర్థిక వ్యవస్థకు కూడా తీవ్ర నష్టాన్ని కలిగిస్తుందని ఆయన విశ్లేషించారు.

 ముఖ్యంగా భారత్ భవిష్యత్తు కోసం అమెరికాను కేవలం ఒక భాగస్వామిగా మాత్రమే చూడాలని.. రక్షణ, వాణిజ్య అవసరాల కోసం దానిపై పూర్తిగా ఆధార పడకూడదని సాచ్స్ న్యూ ఢిల్లీకి కీలక సందేశం ఇచ్చారు. అమెరికాలోని రాజకీయ నాయకులకు భారతదేశ దీర్ఘకాల ప్రయోజనాలపై శ్రద్ధ లేదని.. వారి లక్ష్యాలు కేవలం రాజకీయ ప్రయోజనాలు, ఎన్నికల విజయాలు మాత్రమేనని చెప్పారు. అలాగే అమెరికా కంటే కూడా చైనా, రష్యా, బ్రెజిల్ వంటి దేశాలే భారత్‌కు నిజమైన భాగస్వాములని ఆయన పేర్కొన్నారు. బహుళ ధ్రువ ప్రపంచం ఆవిర్భవిస్తున్న ఈ సమయంలో.. భారత్ ఈ దేశాలతో వ్యూహాత్మక సంబంధాలను బలోపేతం చేసుకోవాలని ఆయన సలహా ఇచ్చారు.

ట్రంప్ అనుసరించే "అమెరికా ఫస్ట్" విధానం ప్రపంచ ఆర్థిక వ్యవస్థను అస్థిరపరుస్తోందని.. దీనివల్ల కేవలం గందరగోళం, సంఘర్షణలే పెరుగుతాయని ఆయన హెచ్చరించారు. జెఫ్రీ సాచ్స్ చేసిన ఈ వ్యాఖ్యలు.. భారత్ తన స్వతంత్రతను కాపాడుకుంటూ.. ప్రపంచంలో తన స్థానాన్ని మరింత బలోపేతం చేసుకోవడానికి అనుసరించాల్సిన మార్గాలపై పూర్తి క్లారిటీ ఇచ్చాయి. ముఖ్యంగా అమెరికా ఆధిపత్య ధోరణిని వ్యతిరేకిస్తూ.. సదరు దేశంపై ఆధార పడకూడదని, అస్సలే నమ్మకూడదనే విషయం అవగతం అవుతోంది.